1 कुरि 14 - पहाड़ी महासुईभविष्यवाणी और दुजी-दुजी रौंगा री बोली 1 एकी दुजेऊ आइलै प्यार कौरना लै पुरी-पुरी कोशिश कौरौ, और आत्मा रै वरदाना पाइणा लै बौड़ी इच़्छ़ा कौरौ, खास कौरीऐ भविष्यवाणी रै वरदाना री। 2 कैलैकि ज़ो दुजी बोली दी बुशै ला सेऊ आदमी आइलै नाईं बल्कि परमेश्वरा आइलै बुशै ला सा। एथीलै कि तेसरी बुशै कोइयौ ना सौमझ़दौ, कैलैकि सेऊ भेदा री बुशै पवित्र आत्मा री शक्ति कौरी बोला सा। 3 पर ज़ो भविष्यवाणी कौरा सा, सेऊ विश्वासिऊ री तरक्की और हिम्मत और सुख शान्ति री बुशै बोला सा। 4 ज़ो दुजी बोली दी बुशै बोला सा, सेऊ आपणै विश्वासा ई तरक्की कौरा सा। पर ज़ो भविष्यवाणी कौरा सा, सै कलिसिया रै विश्वासिऊ रै विश्वासा री तरक्की कौरा सा। 5 हाऊं च़ाहा ऊ कि तुमै सारै दुजी बोली दी बुशै लाऔ, पर एथकु ज़ादौ इणौ च़ाहा ऊ कि तुमै भविष्यवाणी कौरौ, कैलैकि अगर दुजी बोली बोलणै वाल़ौ कलिसिया री तरक्की कौरना लै अनुवाद ना कौरालौ ता भविष्यवाणी कौरणै वाल़ौ तेसकु बौड़ी च़ौड़ियौ आ। 6 एथीलै ओ मैरै प्यारै साथी विश्वासिउओ, अगर हाऊं तुमु काऐ आशीयौ दुजी बोली दी बुशै लाऊ ता मुकु तुमुलै का फाइदौ हुआ सा? एथकु तुमारौ फाइदौ तैबै हुआ ज़ैबै हाऊं प्याशै री, ज्ञाना री, या भविष्यवाणी या शिक्षा री बुशै तुमु आइलै बोलु लौ। 7 इणी ई अगर साज़-बाज़ ज़ेथकु आवाज़ निकल़ा सा, ज़िणी बांइशी या बीन, अगर तिउंरी आवाज़ा दी फरक नाईं औलौ ता, इणौ किणै कौरीऐ पौतौ लागा कि केज़ौ साज़ आ बाज़णै लाऔ औन्दौ? 8 और लौड़ाई दी, अगर कौरनाल़ री आवाज़ साफ ना औली, ता फौज़ी लौड़ाई कौरना लै तैयार नाईं औन्दै? 9 इणी ई अगर दुजी बोली बोलदी बारै तुमारै बोल साफ-साफ नाईं औलै, ता कुण सौमझ़ा कि का ई बोलदै लागै औन्दै? सेऊ ता इणौ हुऔ ज़िणौ बागुरा आइलै बुशै लाआ ई। 10 धौतरी माथै भौरी अलग-अलग बोली ई तिऊं हरेक बोलीऊ रौ मतलब आ। 11 पर अगर हाऊं केज़ी बोली रौ मतलब ना सौमझ़ु, ता बोलणै वाल़ै री नौज़रीऐ परदेशी ऊ, और बोलणै वाल़ौ मेरी नौज़री दी परदेशी आ। 12 एथीलै तुमै भी ज़ुण आत्मा रै वरदाना पाइणा लै उताउल़ै ई, ता इणी कोशिश कौरौ तुमारै वरदाना री तरक्की कु कलिसिया री तरक्की भी हुआ। 13 एज़ै कारणै ज़ो दुजी बोली बोलालौ, सेऊ प्राथना कौरा कि साथाई तेथारौ मतलब भी सौमझ़ाई बौल़ा 14 एथीलै अगर हाऊं दुजी बोली दी प्राथना कौरुलौ, ता मेरी आत्मा प्राथना कौरा सा। पर मेरी बुद्धी काम नाईं कौरदी कैलैकि हाऊं तिऐं नाईं सौमझ़दौ। 15 तैबै का च़ांई कौरणौ? इणौ ना, कि हाऊं आत्मा और बुद्धी कौरी प्राथना कौरु, और आत्मा और बुद्धी कौरीऐ भजन भी गा ऊ। 16 नाईं ता अगर तू आत्मा कौरी परमेश्वरा री स्तुति कौरालौ, ता बिणा ज्ञान वाल़ौ तैरै स्तुति कौरणै माथै आमीन किणै कौरीऐ बोला? कैलैकि सेऊ ता नाईं ज़ाणदौ कि तू का ई बोलदै लागौ औन्दौ? 17 तू ता आपकु आच़्छ़ै कौरी परमेश्वरा रौ धन्यबाद कौरा ई, पर दुजेऊ री विश्वासा दी तरक्की नाईं हुंदी। 18 हाऊं आपणै परमेश्वरा रौ धन्यबाद कौराऊ, कि हाऊं तुमु सारेऊ कु ज़ादौ दुजी बोली दी बोलाऊ। 19 पर कलिसिया दी दुजी बोली दी दस हज़ार बुशै बोलणै कु एऊ मुलै तौंइऐ भी आच़्छ़ौ ज़ाणिया आ, कि दुजै कु शिखाउणा लै बुद्धी कु पांज़ा बुशै बोलु। 20 ओ मैरै प्यारै साथी विश्वासिउओ, तुमै औकली कु छ़ोहरु ना बौणौ, बुराई दी ता छ़ोहरु रौ, पर सौमझ़ी दी स्याणै बौणौ। 21 पवित्रशास्त्रा दी प्रभु बोला आ, “हाऊं पराऐ और अणज़ाण लोगु रै ज़ौरिऐ आपणै लोगु आइलै बुशै लाआ ऊ। तैबै भी सै मेरी नाईं शुणदै।” 22 एथीलै दुजी बोली दी बुशै लाइणी विश्वासिऊ लै नाईं, पर अविश्वासिऊ लै निशाणी ई। और भविष्यवाणी कौरणी अविश्वासिऊ लै नाईं पर विश्वासिऊ लै निशाणी आ। 23 एथीलै अगर कलिसिया एकी ज़ागै कौठी औली, सै सारै दुजी बोली बोला, और ज़ुण इऐं बोली नाईं सौमझ़दै या ज़ुण विश्वास नाईं कौरदै सै भितरै आशालै ता सै पाक्कौ इणौ सुंच़ाई कि तुमै पागल ई। 24 पर अगर सब भविष्यवाणी कौरदै लागा लै, और तिऐ सै आशालै ज़ुण विश्वास नाईं कौरदै या इऐं बोली ना सौमझ़दै, ता सै तिउंरी बोली शुणियौ आपुलै पापी सौमझ़ाई और आपणै मन पौरखा ई। 25 और तिंउरै मौना दी भेद पौगड़ौ हुआई और तैबै सेऊ मुंआ री हांगिऐ धौनी पौड़ीयौ परमेश्वरा कु ढाल कौरा, और आच़्छ़ा कौरीऐ माना ई कि परमेश्वर तुमु मांझ़िऐ आ। उपासना दी अनुशासन 26 ओ मैरै प्यारै साथी विश्वासिउओ शुणौ, का च़ांई कौरणौ? ज़ैबै तुमै आराधना कौरना लै कौठै हुआई, ता केज़ौ भजन शुणावा, केज़ौ शिक्षा दिया आ, केज़ौ प्रभु रै ज़ौरिऐ पौगड़ी की ऐन्दी बुशै बोला आ, केज़ै दुजी बोली बोलाई, केज़ै बोलाई तेथरौ मतलब। इयौ सब कुछ़ विश्वासिऊ री मज़द और तरक्की लै हुणौ च़ांई। 27 अगर दुजी बोली दी बुशै लाइणी औली ता ज़ादै कु ज़ादै दुई या चीन आदमी एकी बौगता दी बोला और एक आदमी तिऊं बोलीऊ रौ मतलब सौमझ़ावा लै ज़ुरुरी औणौ च़ांई। 28 पर अगर मतलब सौमझ़ाउणा वाल़ौ ना औलौ ता, दुजी बोली बोलणै वाल़ौ कलिसिया दी च़ुटुकच़ार थाका लौ, और आपणै मौना कु और परमेश्वरा आइलै बुशै ला लौ। 29 भविष्यवाणी बोलणै वाल़ै मांझ़िया कु दुई या चीन बोलालै, और बाकी लोग तिंउरै वचन पौरखा लै। 30 पर अगर दुजै माथै, ज़ुण बोशौ औन्दौ आ, कुछ़ परमेश्वरा री तौरफा कु पौगड़ौ औआ ता पैहलौ भविष्यवाणी बोलणै वाल़ौ च़ुटुकच़ार च़ांई थाकणौ। 31 कैलैकि तुमै सारै एकी-एकी कौरीयौ भविष्यवाणी कौरी बौल़ा ई, ताकी सारै शिखा लै, और सारै शान्ति पा लै। 32 और भविष्यवाणी बोलणै वाल़ै री आत्मा आपणै वशा दी हुआ 33 कैलैकि परमेश्वर गड़बड़ी रौ नाईं पर शान्ति मेल-मिलापा रौ परमेश्वर आ। ज़िणौ पवित्र लोगु री सारी कलिसिया दी आ। 34 छ़ेउड़ी कलिसिया री खुम्बल़ी दी च़ुटुकच़ार थाकाली, कैलैकि तिउंलै बुशै लाइणा रौ हुकम नाईं पर अधीन रौइणा रौ हुकम सा, ज़िणौ मुसा रै नियमा दी आ लिखौ औन्दौ। 35 अगर सै कुछ़ शिखणौ च़ाहा ली, ता घौरा कै आपणै बोउटै कु पुछ़ा, कैलैकि छ़ेउड़ी री कलिसिया दी बुशै लाइणी ठीक नाईं आ। 36 का परमेश्वरा रौ वचन तुमु कु निकल़ौ आ? या सिरफ तुमु माथै पौगड़ौ हुऔ आ? 37 अगर कुण आदमी आपुलै भविष्यवाणी कौरणै वाल़ौ या आत्मिक आदमी सौमझ़ा लौ। ता सेऊ इणौ ज़ाणालौ कि ज़ो बुशै हाऊं तुमुलै लिखाऊ, सै प्रभु री आज्ञाऐं आ। 38 पर अगर कुण इऐं सौच़्च़ाई नाईं माना लौ, ता सेऊ भी ना मानिदौं। 39 एथीलै ओ मैरै प्यारै साथी विश्वासिउओ, भविष्यवाणी कौरणै री इच़्छ़ा कौरौ, और दुजी बोली बोलणा लै मौना नाईं कौरौ। 40 आराधना कौरदी बारै सारी बुशै ठीक ढौंगा कौरीऐ च़ांई कौरणी। |
This work is licensed under Creative Commons Attribution-ShareAlike 4.0 License.