1 कुरि 13 - पहाड़ी महासुईप्यार-एक सौभी कु आच़्छ़ी बाट 1 अगर हाऊं आदमी और सौरगदूतु री बोली बोलु और दुजेऊ आइलै प्यार ना छ़ाड़ु, ता हाऊं टण-पणादौ पितल़ और छ़ण-छ़णांदी झांझ ऊ। 2 और अगर हाऊं भविष्यवाणी कौरी बोलु, और सारै भेद और सारै रौंगा रै ज्ञान सौमझ़ु, और इदरा झ़ांऊ कि मुकै पुरौ विश्वास आ कि हाऊं धारै टिरै एकी ज़ागाह कु दुजी ज़ागाह लै हटाऊ। पर दुजेऊ आइलै प्यार ना छ़ाड़ु, ता हाऊं कुछ़ भी नाईं आसतौ। 3 अगर हाऊं आपणी सारी धन-ज़यदाद गरीबु लै खिलाऊ, या आपणौ शरीर ज़ाल़ना लै देऊ, और दुजेऊ आइलै प्यार ना छ़ाड़ु, ता मुकै कुछ़ भी फाइदौ नाईं। 4 प्यार सौबरा वाल़ौ आ, और कृपा वाल़ौ आ प्यार ज़ौल़दौ नाईं, प्यार आपणी बौड़ाई नाईं कौरदौ, और शेखी नाईं मारदौ। 5 प्यार दुजेऊ री बेइज़्ज़ती नाईं कौरदौ, सेऊ आपणौ भौलाई नाईं च़ांहादौ, झुंझलांदौ नाईं, बुरौ नाईं मानदौ। 6 बुरै कामा कु खुश नाईं हुंदौ, पर सौच़्च़ाई कु खुश हुआ सा। 7 सेऊ सारी बुशै सहन कौरा सा, सारी बुशु माथै विश्वास कौरा सा, सारी बुशु री आश छ़ाड़ा सा, सारी बुशु दी सौबर छ़ाड़ा सा। 8 प्यार केबी टौल़दौ नाईं, भविष्यवाणी री तागत भी नाईं रौउंदी। ज़ो तागत दुजी बोली बोलणै वाल़ी ज़िभा दी आ सै ज़िभै एकी दिनै च़ुटुकच़ार थाका ई। ज्ञान औलौ ता, सेऊ भी पोरु मिटा सा। 9 कैलैकि आमारौ ज्ञान अधुरौ सा, और आमारी भविष्यवाणी भी अधुरी ई। 10 पर ज़ैबै सर्वशक्तिमान, सारै ज्ञान ज़ाणनै वाल़ौ आशा लौ, ज़ो ज़ो अधुरौ आ सेऊ सारौ खातम हुआ सा। 11 ज़ेबी हाऊं छ़ोटौ छ़ोहरु थौ, ता हाऊं छ़ोहरु बाशीऐ बोला थौ, छ़ोहरु रै ज़िणौ मन थौ, और छ़ोहरु री ज़िणी औकल थी। पर ज़ैबै स्याणौ हुई गौ आ ता छ़ोहरु वाल़ी बुशै जाणै देई गोई आ। 12 आबै आमुकै शिशै दी धुंधलौ ज़ेई दिशा सा, पर सेज़ै बौगतै आमनै-सामनै देखीलै। एज़ै बौगतै मैरौ ज्ञान अधुरौ आ, पर तेबी मैरौ ज्ञान तिणी ई हुआ ज़िणौ तेबी मैरै बारै दी परमेश्वरा रौ आ। 13 ता आबै आमुऐ इऐ चीन च़िज़ै च़ांई कौरणी: परमेश्वरा माथै विश्वास, तेसरै वायदै री आश, और दुजेऊ आइलै प्यार कौरणौ च़ांई। इऊं चिया च़िज़ा कु बौड़ियौ दुजेऊ आइलै प्यार कौरणौ आ। |
This work is licensed under Creative Commons Attribution-ShareAlike 4.0 License.