1 कुरि 11 - पहाड़ी महासुई1 ज़िणौ हाऊं मसीह ज़िणी च़ाल च़ालाऊ तिणी ई तुमै भी मुं ज़िणी च़ाल च़ालौ। आराधना कौरदी बारै मूंड दुमणौ 2 ओ मैरै प्यारै साथी विश्वासिउओ, हाऊं तुमारी तारीफ कौराऊ कि सारी बुशेऊ दी तुमै मुं याद छ़ाड़ाई। ज़ो कुछ़ मुंइऐ तुमुकै आ शिखाऔ औन्दौ। तेथ माथै च़ालदै थाकौ लागी। 3 पर एक बूश आ ज़ो हाऊं तुमुकै बोलणौ च़ाहा ऊ कि, मसीह सारै मौरदु रौ मुख्यौ आ। और मौरद आपणी छ़ेउड़ी रौ मुख्यौ आ, और मसीह रौ मुख्यौ परमेश्वर आ। 4 ज़ुण मौरद टोपै लाइयौ सारेऊ काऐ प्राथना या भविष्यवाणी कौरा सा, ता सेऊ मसीह री बेइज़्ज़ती कौरा आ। 5 पर ज़ुण छ़ेउड़ी नांगी मुंडै प्राथना या भविष्यवाणी कौरा सा सै भी आपणै बोउटै री बेइज़्ज़ती कौरा सा। सै तिंआ छ़ेउड़ी बाशीऐ आ ज़ासरै आपणौ मूंड कून्डौ औन्दौ आ। 6 अगर ज़ुण छ़ेउड़ी ढाठु या चुन्नी मुंडा माथै नाईं ला ली ता बाल़ भी पोरु कुँडावा ली। अगर छ़ेउड़ी लै बाल़ कुँडणै या मुंडन कौराउणौ लाज़ी री बूश इऐ आ, ता सै ढाठु ला या चुन्नी पा। 7 ओ मौरदा लै आपणौ मूंड दुमणौ ठीक नाईं, कैलैकि सेऊ परमेश्वरा री शौकली दी आ चाणौ औन्दौ और सेऊ परमेश्वरा री महिमा देखावा सा। पर छ़ेउड़ी मौरदा री महिमा देखावा सा। 8 कैलैकि सारेऊ कु पैहलौ मौरद (आदम) छ़ेउड़ी कु नाईं हुऔ, पर पैहली छ़ेउड़ी (हव्वा) मौरदा कु हुई आ। 9 और मौरद छ़ेउड़ी रै फाइदै लै नाईं चाणौ पर छ़ेउड़ी मौरदा री मज़दा लै चाणी थी। 10 एथीलै सौरगदूतु रौ ध्यान छ़ाड़ियौ छ़ेउड़ीऊ ऐ आपणौ मूंड डौकीयौ इणौ च़ांई देखाउणौ कि सै आपणै बोउटै रै अधीन आ। 11 तैबै भी विश्वासिऊ रै बिचा दी ना ता छ़ेउड़ी मौरदा कु और ना मौरद छ़ेउड़ी कु अलग आसती। 12 कैलैकि ज़िणी छ़ेउड़ी मौरदा कु आ तिणी ई मौरद भी छ़ेउड़ी कौरीऐ आ। पर सारी च़िज़ै परमेश्वरा कौरीऐ आ। 13 तुमै आपु ई बिच़ार कौरौ कि का छ़ेउड़ी सारेऊ मांझ़िऐ नांगी मुंडै परमेश्वरा कु प्राथना कौरदी बारै ढौभा सा? 14 का सिधै तरिकै कौरी भी तुमै नाईं ज़ाणदै कि अगर मौरद लाम्बै बाल़ छ़ाड़ा लौ ता तेसलै बेइज़्ज़ती आ। 15 पर अगर छ़ेउड़ी लाम्बै बाल़ छ़ाड़ा ली ता तिंआलै इज़्ज़त आ, कैलैकि बाल़ तिंआ कालै दुमणै रै रुपा दी दैऔ औन्दै। 16 पर अगर कुण इणौ सुंच़ा कि हाऊं गलत ऊ लागौ औन्दौ बोलदै। ता इणौ ज़ाणालौ कि इऐ ना ता आमारी और ना परमेश्वरा री, पर कलिसिया री इऐ रीती आ। प्रभु भोज़ा रै बारै दी ( मत्ती 26:26-29 ; मरकुस 14:22-25 ; लुका 22:14-20 ) 17 पर इंऐ हुकम दैंदी बारै हाऊं तुमारी तारीफ नाईं कौरदौ, एथीलै कि तुमारै कौठै हुणै कु भौलाई नाईं पर नुकसान हुआ सा। 18 कैलैकि पैहलै ता हाऊं इणौ शुणाऊं कि ज़ैबै तुमै कलिसिया दी आराधना लै कौट्ठै हुआई ता तुमु मांझ़िऐ झ़ौगड़ौ हुआ सा, और हाऊं एथ माथै विश्वास भी कौराऊ कि एथदी कुछ़ सौच़्च़ाई आ। 19 कैलैकि गुटबाज़ी भी तुमु मांझ़िऐ ज़रूर औन्दी औली, एथीलै कि ज़ो लोग परमेश्वरा रै ई चुनै औन्दै सै पौगड़ै हुआ। 20 ज़िणौ तुमै रोटी खाणा लै एकी ज़ागाह दी कौट्ठै हुआई, तेथलै प्रभु-भोज़ नाईं बोलदै, 21 कैलैकि खाणै रै बौगतै एकी दुजै कु पैहलै आपणौ भोज़ खा ई। एथरौ नौतिज़ौ इणौ हुआ सा कोई ता रौआ भुखौ और केज़ौ बौणा शराबड़ौ। 22 का खाणा-पिणा लै तुमुकै आपणौ घौर नाईं आसतौ? या तुमै परमेश्वरा री कलिसिया बेकार ज़ाणाई, और ज़ासकै नाईं आसतौ तिऊं री बेइज़्ज़ती कौरा ई? हाऊं तुमुलै का बोलु? का एज़ी बुशा लै तुमारी तारीफ कौरु? नाईं, हाऊं तारीफ नाईं कौरदौ। 23 कैलैकि इऐ बूश मुकै प्रभु कु पहुंच़ी आ, और मुंइऐ तुमु काऐ भी पहुंच़ाई गोई, कि प्रभु यीशुऐ ज़ेज़ी राचीऐ सेऊ पौकड़ाऔ, रोटी कौरी, 24 और धन्यबाद कौरीयौ सै रोटी चोड़ी और बोलौ, “एऊ मैरौ शरीर आ ज़ो तुमुलै आ, मेरी याद कौरना लै इणौ ई कौरणौ।” 25 एज़ी रीती कौरीऐ तेथ बासिऐ खोरु भी निऔं और बोलौ, “एऊ खोरु मैरै लोऊ दी नौंवौ वायदौ आ, ज़ेबी केबी पियालै, ता मेरी याद कौरना लै इणौ ई कौरौ।” 26 कैलैकि ज़ैबै केबी तुमै इऐं रोटी खा ई और एस खोरु मांझ़िया कु पिया ई, तैबै प्रभु री मौत ज़ेबी झ़ांऊ सेऊ दुजी बारै ना आशौ, परचार कौरी आ 27 एथीलै ज़ुण-कुण प्रभु री रोटी गलत रीती कौरी खा और तेसरै खोरु कु पिया, सेऊ प्रभु रै शरीर और लोऊ रै विरोधा दी पाप कौरा आ। 28 एथीलै आदमी आपणौ मन पौरखा और देखीयौ इणी रीती कौरीऐ इऐं रोटी मांझ़िया कु खा, और एस खोरु भिता कु पिया। 29 कैलैकि ज़ुण खांदी-पिंदी बारै प्रभु रौ शरीर नाईं प्राणदै, सेऊ एस खाणै-पिणै कु आपु माथै सौज़ा आणा सा। 30 एज़ी वज़ाह कु तुमु मांझ़िऐ भौरी लोग कमज़ोर और रोगी आ, और भौरी लोग मौरी गोऐ। 31 अगर आमै पैहलै आपु पौरखा थै ता सौज़ा नाईं हुआ थी। 32 पर प्रभु आमु सौज़ा देइयौ सुधारा सा। ताकी आमै इऐं धौतरी रै लोगु आइलै गुनैहगार ना बौणा। 33 एथीलै, ओ मैरै प्यारै साथी विश्वासिउओ, ज़ैबै तुमै प्रभु भोज खान्दै कौठै हुआई ता एकी दुजै लै रुकणी। 34 अगर कुण भोखौ आ ता सेऊ आपणै घौरा कै रोटी खा लौ, ज़ेथ कौरी तुमारौ कौठै हुणौ सौज़ा रौ कारण ना हुआ। बाकी बुशै हाऊं आपु आशीयौ ठीक कौराऊ। |
This work is licensed under Creative Commons Attribution-ShareAlike 4.0 License.