मत्ती 28 - बारेली पावरी

अध्याय 28

येसुन जीव उठनो

¹ शब्बाथोन दाहळान ओवतेन हाप्तान पेहेले दाहळे भोवभोकवे मरीयम मगदलीनी एने दुसरी मरीयम मोळवाट्यो काजे देखणे आव्या.

² एने देखू, एक मोटलो भुंकप होयो, काहाकि प्रभून एक दूत सोरगसी उतऱ्यु एने साते आवीन चू दोगळा काजे ढोबवाव देदु, एने तीना पोर बोस गोयू.

³ तेरो रूप विजवी सारखो एने तेरा छिंदरा बर्फान तोसा धोव्वा होता.

⁴ तेरा बिकसी राखवाव्या काप उठ्या, आखा मोरलान तोसा होय गोया.

⁵ सोरग दूत बायरा काजे कोयू, “मा बिहू, मे जानतलु कि तुमु येसु काजे जिनाक ख्रुस पोर चोळावला होता हेरने बाज रोया.

⁶ चू न्या नि होय, बाकीन तेरा वचनोन अनसारे जीव उठ रोयू, आवू, यु जागू देखू, जा प्रभूक मेकला होता,

⁷ एने मामार जायीन तेरा चेला काजे कोयू कि चू मोरलामा गोथू जीव उठ्यू, एने चू पेहेले तुमुक गलील काजे जाय रोयू चा तेरो दर्शन जोळसे. देखू, मे तुमु काजे कोय देदु.”

⁸ चे बिक एने मोटली खुशी साते कबरमा गोथा निकवीन तेरा चेला काजे खोबर कोयने दोवळीन गोया.

⁹ देखू येसु हिनुक भेटायु एने कोयू, “सलाम” चे साते आवीन एने तेरा पाय धोरीन तीना काजे नोमोन कोऱ्या.

¹⁰ तेत्यार चे येसु तीनु काजे कोयु, “मा बिहु; मारा भाशो काजे जायीन कोयू कि गलील काजे जात रोये, चा मेसेक देखसु.”

राखवाव्यान खोबर

¹¹ चे जाणेत बाज रोया होता कि राखवाव्या मा गोथू एक नगरमा आवीन पुरो हाल प्रधान पुजारू काजे कोयीन सोमवाळ्यु.

¹² तेत्यार चे डाह-डाहा साते एखठा होयीन एकी कोऱ्या एने सिपायळा काजे जादा चांदी आपीन कोया,

¹³ “यो कोयजू कि राती आमु सुवरोया होता, ती तेरा चेला आवीन तीनाक चुरीन लीगोया.

¹⁴ एने ओगर जी वात सुभेदारोन कानटा पोर पूगी, ती आमु हिनाक सोमजाड देसू एने तुमुक सोंकोट सी वाचाड लेसू.”

¹⁵ आखरी चे रुप्या लीन जोसो सिकाळाय गोयलो होतो, तोसाच कोऱ्या जी वात आज तोक यहुदियामा हिमी बी चाल रोयी.

येसुन देखाय जाणो एने आखरी आग्या

¹⁶ ग्यारा चेला गलीलमा तिना बोयडा पोर गोया, जोसू येसु तीनुक कोयलु होतु.

¹⁷ चे हेरो दर्शन लीन हिनाक नोमोन कोऱ्या, बाकीन काहना काहनास काजे शंका होयू.

¹⁸ येसु तिंदरेनचा आवीन कोयू, “सोरग एने कोवीन आखो होक मेसेक आपाय गोयलो छे.

¹⁹ इनान कोरता तुमु जावू, आखा जात्यान माणसो काजे चेला बोनावू; एने तीनुक बास, एने पुऱ्यु, एने पवित्र आत्मान नावोसी बाप्तिस्मा आपु.

²⁰ एने चे आखा वाते जो मे तुमु काजे आग्या आपलु छे, मानने सिकाळ एने देखू, मे जोगोन आखरी तोक कायम तुमरे साते छे.”