Matiye 28 - Bible Fulfulde Bénin New Testament

Yeesu fintii

¹ No *nyalaane siwteteene yawti, alal subaka, Mariyama Magadalaajo e Mariyama oo to dawi, yahi daaroygo saabeere nen.

² Ɗon de woore, leydi dimmii e semme. Malaykaajo Joomiraawo jippii diga dow kammu, talli hayre nen, jooɗii dow mayre.

³ Oo jalbitoo hande maaƴƴere, gineeji makko e rawni hande malamalluuje.

⁴ Reenuɓe ɓen huli faa e diwna, ɓe laatii hande maayɓe.

⁵ Malaykaajo wi'i rewɓe ɓen: «To on kulee onon! Mii anni Yeesu tigganooɗo nun daartoton.

⁶ O walaa ɗo, o fintii hande no o wi'unoo on. Garee, daaree to o fukkinoo.

⁷ Tinnee, batee aahiiɓe makko o fintii diga e maayde. O na'on heɗii on far *Galili, on ji'an mo ton. Ka goodumi mi bata on nun ɗon.»

⁸ Rewɓe ɓen yawti law diga to saabeere nen, go kulol e seyo waɗi ɓe puy. Ɓe doggi ɓe batoy aahiiɓe makko habaru on.

⁹ Ɗon maa ɗon, Yeesu fotti e maɓɓe, wi'i ɓe: «Mii sanna on!» Ɓe ɓattii mo, ɓe nanŋi koyɗe makko, ɓe cujidani mo.

¹⁰ Den Yeesu wi'i ɓe: «To on kulee! Jahee, batee banniraaɓe am, ɓe jaha Galili. Ton nun ɓe ji'atammi.»

Ka reenuɓe saabeere seedii

¹¹ Wakkati rewɓe ɓen yanti laawol, den woɓɓe der soogeeji deenuɗi saabeere nen naati e genni, e bata *hooreeɓe limaamiiɓe ko waɗi fu.

¹² Hooreeɓe limaamiiɓe, e dottiiɓe waɗi hawriine, ɓe baddi, ɓe kokki soogeeji ɗin ceede ɗuuɗɗe,

¹³ ɓe bi'i ɓe: «Bi'ee aahiiɓe makko nun wari jemma, tawi oon ɗaani, wujji ɓannu makko.

¹⁴ To hooreejo leydi nanii ka, minon nun anni ka batata mo, men burtina on e toora fu.»

¹⁵ Soogeeji jaɓi ceede mum, waɗi no wi'aa. Hande non haala kan sankitorii caka *Yahuduuɓe faa warugo hanne.

Yeesu hollitanake aahiiɓe mum

¹⁶ Aahiiɓe sappo e go'o yahi *Galili, dow waanne ne Yeesu tintinnoo ɓe ɓe jaha.

¹⁷ No ɓe ji'i mo, ɓe cujidani mo, amma woɓɓe maɓɓe waɗii seko.

¹⁸ O ɓattii, o wi'i ɓe: «Mi hokkaama baawɗe dow kammu e leydi fu.

¹⁹ Gam majjum jahee, gaɗee himɓe lenyi fu aahiiɓe am, gaɗee ɓe *batisi e inne *Baaba e *Ɓiɗɗo e *Ruuhu Ceniiɗo.

²⁰ Janŋinee ɓe ɓe tokkoo ko batumi on fu. Annee, mii wondi e mooɗon nyalaane fu, faa timmoode duuniyaaru.»