Youele 3 - GODE EA SIA: IDA:IWANE GALA

Hina Gode da Dunu Fifilai Huluane Gilisili ilima Fofada:mu

¹ Hina Gode da amane sia:sa, “Amo esoga, Na da Yuda fi amola Yelusaleme fi ilia hou bu hahamobeba:le, ilia da bu bagade gaguiwane ba:mu.

² Amasea, Na da dunu fifilai huluane fofada:musa:, Yihosiafa:de Fago soge amoga gilisimu. amogai Na dunu fi huluane ilia hou Na fi Isala:ili ilima hamoi Na da fofada:mu. Ilia da Isala:ili dunu fi da mogi amola ga fi amo ganodini esaloma:ne afagogolesi. amola ilia da Na soge fifili momogi.

³ Ilia da gegesu ganodini dunu gagulaligi amo lama:ne, ululuale hedei. Ilia goi amola a:fini amo ilia udigili bidi mae lale hawa: hamoma:ne, bidi lai. Amo bidi amoga ilia waini hano amola aheda:i uda bidi lai.

⁴ Daia, Saidone amola Filisidia! Dilia da Nama adi hou hamomusa: amasala:? Ma dilia da Nama dabemusa: amasala:? Defea, dilia amasa galea, Na hedolodafa dabemu.

⁵ Dilia da Na silifa amola gouli amola Na liligi ida:iwane galaamo dilia debolo diasu ganodini wamolegela asi.

⁶ Dilia da Yuda amola Yelusaleme fi dunu amo ilia sogega fadegale, hiouginana asili, Galigi fi ilima bidi lai dagoi.

⁷ Waha da Na ili bu oule misunu, amo dunu dilia bidi lai amo. Amola amo defele, dilia da ilima hamoi, amo Na dabemu.

⁸ Na da dilia didiwi amola egefe huluane Yuda fi dunuma bidi lalesimu. Na da ili da soge badiliadafa, Sabiane dunu fi soge amoga asunasimu. Na da Hina Gode amola Na da sia:i dagoi.

⁹ Goe sia: dunu fifi asi gala huluanema sisia: lama. Gegemusa: amola dilia dunu ha lai wa:ma amola gegesu dunu ilia mogodigili bulubulusa masa.

¹⁰ Dilia osobo dogosu afadenene bu gobihei agoai hamoma amola ifa dadamusu gobihei amo afadenene dadi agesoi agoai hamoma. Da:i dia:i dunu amolawane ilia da gegema:mu.

¹¹ Fifi asi gala huluane amo da Isala:ili sisiga:sa! Hedolowane misini, fago umi soge ganodini gagadoma! Ma! Hina Gode! Dia gegesu dunu ilima gegema:ne gududili asunasima.

¹² Dunu fifilai ilia da momagele ouesaloma amola Fofada:su Umi Soge amoga misa:ma. amogai, Na, Hina Gode da Fofada:su Fisu da:iya fila heda:le amola dunu fi la:idi huluane esalebe, ilima fofada:mu.

¹³ Ilia da wadela:i bagade hamosu dunu. Widi faimusa: damubi amo defele, amo dunu hedofama. Waini hano hamoma:ne waini fage labugili, waini ofodo da nabaiba:le aduga:le dabe amo defele amo dunu labugima.”

¹⁴ Dunu osea:idafa da Fofada:su Fago amo ganodini gagadoi dagoi ba:sa. amogai Hina Gode Ea Fofada:su Eso da hedolowane doaga:mu.

¹⁵ Eso amola mu amola da gasi agoane ba:mu amola gasumuni da bu hame nemu.

Gode da Ea Fi Dunu Ilima Hahawane Dogolegele Imunu

¹⁶ Hina Gode Ea sia gobagala:i amo Saione Goumi da:iya gadodafa amoga naba. amola Ea sia: amo gugelebe gobagala:i agoane Yelusaleme moilai bai bagadega naba. Mu amola osobo bagade da ugugusa. Be E da Ea Fi amo se mae nabima:ne gaga:mu.

¹⁷ “Amasea, Isala:ili fi! Na da dilia Hina Gode Saione sema goumia gado esala, amo dilia da dawa:mu. Yelusaleme da hadigi sema moilai bai bagade ba:mu amola dunu enodini misi ilia da mugululi osa:le heda:le bu hamedafa ba:mu.

¹⁸ Amo esohaga da goumi ea waini ha:i manu sagai da dedeboi dagoi ba:mu. amola bulamagau da agoloa huluane lafiadalebe ba:mu. Yuda ea hano da gilisi dalebe defele ba:mu. Hano da Hina Gode Ea Debolo diasu amodili dalebe ba:mu amola Aga:isia Fago da amo hanoga nasegagi dagoi ba:mu.

¹⁹ Idibidi soge da hafoga:i dagoi ba:mu amola Idome da wadela:lesi dagoi ba:mu. Bai ilia da Yuda fi ilima gegeiba:le amola asaboi dunu amo medole legeiba:le.

²⁰ -

²¹ Na da dunu fane legesu amo dabema:ne fane legemu amola Na da bidi hamosu dunu amo hame yolesimu. Be Yuda amola Yelusaleme amo ganodini, dunu da eso huluane mae fisili esalebe ba:mu. amola Na, Hina Gode, Na Saione goumi dabua gado esalumu.” Sia: ama dagoi