Vaefesu 5 - Bhiblia Yo Sawuleka

Hanyani liwoningoni

¹ Ngu toneto, etetelani Txizimu, anu mi ku vanana va txona vo randeka ngutu.

² Se tsimbilani ngu lirando, kufana ni Kristu, na nanu vanani ni lirando, nguko Ene a mi randile. Ene a ti ningete apune ngu kota yathu, a txi ti maha gandelo ni mhamba yo bhumula ya kutsakisa Txizimu.

³ Kambe wugango ni mithumo yotshe ya nzambwa mwendo likungo, si nga ve ni kuwombwa hagari kwanu, nga ti ti fanelako vasawuleki.

⁴ Hambi mapswi a tingana, hambi a wubhemba mwendo sipoyilo, kha si laveki, aniko thumisani mapswi a kubonga.

⁵ Zivani ti to awalo m'thu wu a no mana thomba ya mfumo wa Kristu ni wa Txizimu, ngako i di m'gelezi mwendo wu a mahako mithumo ya nzambwa, mwendo mnaveli wa tithomba, awu i ku mkhozeli wa sa walo.

⁶ M'thu a nga thuke e mi kanganyisa ngu mapswi o mbi vhuna txilo, nguko simaha siya si dhana kuhenya ka Txizimu.

⁷ Mi nga pataneni navo ka mithumo yawe yo biha.

⁸ Kale mi ti hanyela mtemani, aniko mi hindukile mi maha liwoningo ngu ka Mkoma. Tsimbilani kha kwati, nga ti mi ku vanana va liwoningo.

⁹ Nguko mihando ya liwoningo ngu wunene ni kululama ni ditshuri.

¹⁰ Lavani ati ti tsakisako Mkoma.

¹¹ Mi nga wuleleni amu ka mithumo ya txidema, ayi yi si ningiko mihando, kambe yi vayileleni masoni ka votshe vathu.

¹² Nguko ati vona va ti mahako ngu kusisa, ta yila ni ku ti womba.

¹³ Aniko sotshe sakubiha sa soleka masoni ka sakuwonekela,

¹⁴ ani sotshe si si humiswako ha kubasani, sa hinduka si maha liwoningo. Ngu toneto, ti wombwako va txi kha vona: “Wuka awe u otelako, wuka hagari ka vafi, se Kristu a na kuwoninga.”

¹⁵ Ti di ngeto, wonisisani ta tinene mahanyelo anu; mi nga hanyiseni ku nga vathu va va si ziviko, aniko hanyani nga vathu va va zivako,

¹⁶ londolani mbimo yi mi ku nayo, nguko masiku a ngweno ma bihile.

¹⁷ Ngu toneto, mi nga ti maheni mabhemba, aniko lavani kuziva kuranda ka Txizimu.

¹⁸ Se mi nga leveni ngu vhinya, ayi ka yona ku ku ni mazunga, aniko talani ngu Moya;

¹⁹ mi txi womba-womba ngu masalmo ni tindando, mizeno ni tindando ta moya, mi embelela ni kudhumisa Mkoma timbiluni kwanu,

²⁰ yotshe mbimo mi bonga Txizimu txathu, i ku tate ngu sotshe si txi nga maha, ngu ditina da Mkoma wathu Jesu Kristu.

Vavasikati ni vamna vawe

²¹ Xoniphanani ngu txithavo ka Kristu.

²² Anu vavasikati, engisani vamna vanu, kota nga ti mi engisisako tona Mkoma;

²³ nguko wamwamna ngene i ku msungo wa wamsikati, kota nga ti Kristu nene i ku msungo wa Dibanza ni muhanyisi wa mmidi.

²⁴ Se kota nga kuwa Dibanza di engisako Kristu, ni vona vavasikati va na engise vamna vawe ka totshe timhaka.

²⁵ Nananu vavamna, randani vasikati vanu, kota nga ti Kristu a nga randisa tona Dibanza, a txi ti ningela ngu mhaka ya dona,

²⁶ kasiku a txi di kuwula ngu mati, ni ku di basisa ngu dipswi,

²⁷ kasiku a txi di emisa masoni kwakwe, i di Dibanza do tshura, adi di ku si nga ni sibawa mwendo tingonye, mwendo tximwani txo fana ni soneso; aniko di txi maneka i di do sawuleka, adi di ku si nga ni txionho.

²⁸ Ngu toneto, vavamna va fanelako kurandisa tona vasikati vawe nga mimidi yawe. Awu a randako msikati wakwe, wo ti randa apune;

²⁹ nguko ha kunene awalo m'thu wu a khalako a txi venga mmidi wakwe, aniko wa wu dyisa, a txi wu gonga, kota nga ti Kristu nene a nga mahela dibanza,

³⁰ nguko athu hi sihango sa mmidi wakwe.

³¹ Ngu kota yeto, wamwamna a na siya tate wakwe ni mame wakwe, a txi namarela ka msikati wakwe, va txi maha nyama yimweyo ngu wumbidi wawe.

³² Msisalo wuwa mbwa hombe: Ni womba wa kutshangana ka Kristu ni dibanza dakwe.

³³ Ngu toneto, mmweyo ni mmweyo wanu, ngu kwakwe, a fanete kuranda msikati wakwe, nga ti a ti randisako tona ene apune; nene wamsikati e xonipha mwamna wakwe.