Judha 1 - Bhiblia Yo Sawuleka

Dipswi do thanga

¹ Judha, txithumi txa Jesu Kristu, mwanawe Jakobe, ka vale va nga dhanwa, va randekako ka Txizimu Tate, ni kuveketwa ngu Jesu Kristu:

² Wumbilu, kudikha, ni lirando si na mi talele.

Vagondisi va makuhu

³ Vorandeka, ni di ngadi ni txi xuva ku mi bhalela madingano ni kuhanyiswa kuwa i ku ka hotshethu, ni ti woni ti di ni fanelo ku mi bhalela, ni mi laya, ti to mi lwela likholo li Txizimu txi nga ninga vasawuleki va txona kumweko dwe.

⁴ Nguku ku txholovete vathu vokari hagari kwathu, ava ku nga bhalwa ngu kale ti to va na abaniswa, vathu va kwa mbi thava Txizimu, va hindulako kateko ya Txizimu txathu, ve yi maha txivhikelo txa wubhemba wawe, ve lamba kukholwa ka wu i ku ene ekha M'gondisi ni Mkoma wathu, Jesu Kristu.

⁵ Ni lava ku mi alakanyisa, hambiko totshe tiya mi ti zivako ta tinene ti to Mkoma, msana ka kutirula vathu vakwe ditikoni ka Egipta, a fuvisile va va nga ti si kholwi.

⁶ Se tingelozi ti ti nga mbi veketa wukoma wa tona, aniko ti nga leka wukhalo wa tona, a ti vekile mtemani, ti di sungilwe ngu makhodha o mbi guma, ti verela kulamulwa ka ditshiku da hombe.

⁷ Kufana ni toneto, Sodhoma ni Gomora, ni mamwani madhoropa a hafuhi, ngu mhaka ya kutiningetetela ka wugelegele, ni ka mithumo ya wugango wo hambana ni ntumbuluko, madhoropeyo ma mahilwe txialakanyiso masoni ka votshe vathu, me ningelwa kutsayiswani ka mndilo wo mbi guma.

⁸ Se ava va hanyisako toneto, kusisalelwani kwawe, va nyenyezisa mmidi wawe, ve kanyisa wukoma wa Txizimu, ni kuruketela mitumi ya nzumani.

⁹ Kambe ngelozi ya hombe Migeli, mbimo yi a nga txi kanetisana ni Sathani ngu mhaka ya txirumbi txa Mosi, kha tsana kuwomba dipswi da kumruka, aniko a to gwitela kuwomba, a txi khene: “Mkoma a na ku kawuke!”

¹⁰ Kambe vathu vava va ruketela sotshe si va si si ziviko; se asile va si zivako ngu mazivelo o fana ni a sihari so mbi na mapimo, eso si thuma ku va lovisa.

¹¹ Va na ni dikhombo, nguko va tsimbila ngu nzila ya Kayini; ngu kulunzwa ngu kuhola male, va ti ningete ka manyala a Bhalahamu, se ve ti lovisa ngu kukaneta ko fana ni ka Kora;

¹² vathu vava ngu vona i ku sikhuvekiso mibusoni kwanu ka lirando; vadya va si na tingana, ve ti dyisa vapune, va fana ni marefu o mbi na mati, ma pengapengiswako ngu moya; mindonga ya wuxika yi si velekiko mihando, mindonga yi nga fa kumbidi yi txi dulwa ni mikoloti ya yona;

¹³ i mavimbi o leva a linene; mithumo yawe ya tingana yi pupuma nga diphutu; ndinyeleti to pepuka ati ti nga lulamiselwa txidema txa hombe txo mbi na magwito.

¹⁴ Enoki, i ku wa wutxhanu ni vambidi kukhukhela ka Adhamu, a profetile ngu vona vava, a txi khene: “Wonani, Mkoma wata kumweko ni mabutho akwe o sawuleka, a mazanazana,

¹⁵ ku ta lamula votshe vathu, ni ku ta thethisa votshe va va si thaviko Txizimu, ngu mhaka ya yotshe mithumo yawe yo biha, va nga yi maha, ni mhaka ya otshe mapswi a kubiha, aawa vaonhi va nga txi ruka ngu ona.”

¹⁶ Avava i ku vathu vo ngungurukela, va kuzumba ngu kuvilela, va hanyako ngu kulondetela minavelo yawe yo biha; sisofu sawe si womba-womba mapswi o tikulisa, kambe i vathu va kuxengetela, ngako va txi lava kuwuyelwa.

Siziviso ni Silayelo

¹⁷ Aniko, anu, vorandeka, alakanyani mapswi awa ma nga wombwa kale ngu vapostoli va Mkoma Wathu Jesu Kristu,

¹⁸ nguko vona va mi gete va txi kha vona: “Ka masiku o gwitisa, va na humelela vatseketseli, ava va no hanya ngu kulondetela minavelo yawe yo biha.”

¹⁹ Ngu vona va vangako mibhando, va fumwako ngu minavelo yo biha ya nyama, va si fumwiko ngu Moya.

²⁰ Aniko anu, vorandeka, kulani amu ka likholo lanu lo sawuleka ngutu, khongelani mi di ti tshanganisile ni Moya wo Sawuleka,

²¹ ti veketeni lirandoni ka Txizimu, mi txi veka kuthemba kwanu ka wumbilu wa Mkoma Wathu Jesu Kristu, kasi ku mi na mana wutomi wo mbi guma.

²² Tsanisani likholo la va va kanakanako;

²³ hanyisani vamwani, mi va yokola ha mndiloni; ka vamwani kambe va pfeleni wusiwana, na mi txi ti wonela, mi txi nyenya hambi ni nguwo yawe, yi yi nga nyetwa ngu txionho txa mmidi.

Mkombelo wa kudhumisa

²⁴ Ka txona Txizimu txi ku ni mtamo wo mi xayisa kasi ku mi si khuvekiswi, ni ku mi heleketa txi mi hokisa mi di tsakile, na mi si nga ni txionho masoni ka wudhumo wa txona,

²⁵ ka txona txokha i ku Txizimu ni Muhanyisi wathu, txi nga hi hulukisa ngu Mkoma Wathu Jesu Kristu, wudhumo, wuhombe, mtamo ni kufuma, si nave ka txona kukhukhela ka totshe timbimo ti ti nga pinda, ni konkuwa, ni ka malembe ni malembe. Amen.