Jobe 8 - Bhiblia Yo Sawuleka

Kuwombawomba ko khata ka Bhilidhadhe Wuya ka Txizimu

¹ Sekoko Bhilidhadhe, M'suwita, a to xamula a txi khene:

² U na womba to nga eto kala yihi mbimo kani? Ditshuri da txisofu txako di na komba wuhi moya kani?

³ Ina txi ndi na sanula madingano Txizimu kani? Niku wa Mtamo-wotshe a ndi na sanula wululamo kani?

⁴ Ngako vanana vako va ti mu onhete, nene a va tshotshile manzani ka wuhambunyeti wawe.

⁵ Aniko ngako ngu mabimbi-kutxa u txi xota Txizimu, ni kukombela wumbilu ka wu wa Mtamo-wotshe,

⁶ ngako u ti wo sawuleka ni kululama, ngu ditshuri, Txizimu txi na kualakanya ngu kukuluveta, txi na wusa wukhalo wa wululamo wako.

⁷ Makhato ako ngu ditshuri ma nave madotho, aniko zumbelo yako yo gwitisa yi na anda kala titshokani.

Themba ya vo biha kha yi vhuni txilo

⁸ Nguko ani na ku kombela, wotisa konkuwa ka tihunzu ti ti nga pinda, ti lulamisele kuwotisela vatate vawe.

⁹ Nguko athu hi va nyamnova, kha hi zivi txilo; nguko masiku athu txitimwi ka mafu, ma fana ni mtsudi.

¹⁰ Ina marambu kha ma na mbi kugondisa, kha ma na mbi kugela, ngu mbiluni kwako kha ma na mbi maha ditshuri kani?

¹¹ Ina tiwungu ti nga deluka ti si nga ni ndope kani? Mwendo kuhanya liwungu ku si nga ni mati kani?

¹² Ti txi ngadi ti nakana, ti si se wilwa, ti maneka ti txi oma, hahanze ka wumwani mwasi.

¹³ Ti mahisa toneto tinzila ta vale va divalako Txizimu; se themba ya mkanganyisi yi na lova.

¹⁴ Tthemba yawe yi na thidhela, se themba yawe yi na nga txisaka txa nyazombe.

¹⁵ A na tshikila ha nyumbani kwakwe, aniko kha na mbi ti manela kutsana; a na m'hiketela, kambe kha na mbi ema;

¹⁶ a wuna di si se huma ditambo, mazokoro akwe a maphya, ma huma thembweni kwakwe;

¹⁷ mikoloti yakwe ya hoka txisimani; yi maha txiduko ka marigwi;

¹⁸ a txi mwalala ha wukhaloni kwakwe, ti na kanetwa va txi kha vona: Kha ni zivi ku kuwona;

¹⁹ wona taku litsako la nzila yakwe, se vamwani va na humelela ngu lithuluni.

²⁰ Wona taku Txizimu kha txi na mbi nyenya wo lulama; kambe kha txi va ñoli ngu diwoko vamahi va kubiha;

²¹ kala kuza mkanani kwako kutala ngu maseko, ni txisofu txako txi tala ngu kudhumisa.

²² Vaxamukisi vako va na ambala pfilu-pfilu, hambi ditenda da vo biha kha di na mbi vaho kambe.