Jobe 5 - Bhiblia Yo Sawuleka

Athu hipune ha tisa kuxaniseka

¹ Dhana konkuwa! Ina waho a kuxamulako kani? Se u na rendekela ka wihi msawuleki kani?

² Nguko txiviti txa fuvisa txiphukuphuku; se wuphuphulu wa yisa kufani.

³ Ni txi wonisisile kha kwati txiphukuphuku txi txi zima mikoloti, aniko koneko ni nyenyile nyumba ya txona.

⁴ Vanana va txona va kule ni kuhanyiswa; se va phaphawulelwa sikenini, aniko kha ku nga ni wo va hulukisa.

⁵ Sakudya sa txona si hetwa ngu nyanzale, a tsanako ni kuya si thavisa amu ka mipa; se mxaseli e mana thomba.

⁶ Nguko kuxaniseka kha kuti ngu mu ka lithulu; ni mthumo kha wu humi ngu mafuni.

⁷ Aniko m'thu a veleketwe kuxaniseka, ku nga titshatsha ta mndilo ti khukhako ti puruma.

Txizimu txa ninga kuthemba ka vale vo pwata mtamo

⁸ Aniko ani, ni na xota Txizimu, se ka txona, ni na womba kukelelelwa kwangu.

⁹ Txona txi maha mithumo ya hombe ngutu, kha yi koteki ni ku yi bala; ni sixamaliso sasingi sa kwa mbi balwa.

¹⁰ Txa nisa nzuma txitimwi ka mafu, ni kuninga mati tithembweni.

¹¹ Kasi kuveka ka wukhalo wa txitimwi, vale vo karala; ni tile taku vo felwa ve guletwa kuhanyiswani.

¹² Txizimu txa retha mipimiso ya vo txhariha, kasi manza awe ma si thumi txilo ni txa tximwetxo.

¹³ Txa bzweta titxhari ka wutxhari wa tona tipune; se e wiswa silayelo sa vo biha.

¹⁴ Vona hambi di ti txite va maneka txidemani; se ni mitshikari va tsimbilisa kumbumbutela, nga ova wusiku.

¹⁵ Aniko awule wo pwata, txa mtxhatxhisa ngu ditxhari da txisofu, txi mtxhatxhisa manzani ka wule a ku ni mtamo.

¹⁶ Ngu toneto, txisiwana txi ni kuthemba; se wubihi wa tsiva txisofu txa wona.

Manza a Txizimu ma hanyisa

¹⁷ Wona taku a katekile wamwamna wule a tsayiswako ngu Txizimu; sekoko u nga kanyise txitsayiso txa wule wa Mtamo-Wotshe.

¹⁸ Nguko txa veka tivandwa, kambe txipune txa sungelela silonda; txa dayisa, aniko manza a txona ma kalamukisa.

¹⁹ Ka mtxhanu wa makhati a kuxaniseka txi na kutxhatxhisa, da wutxhanu ni mambidi wubihi kha wu na mbi kugwesa.

²⁰ Txi na ku hulukisa kudawa ngu nzala; ni yimbini txi na kuhulukisa ka phango ya ditxhari.

²¹ U na tsivelwa kukwapwa ngu lidimi; kambe khu na mbi dhudhumeliswa ngu txingumula ngako txi txita.

²² U na sekiswa ngu txingumula ni nzala; kambe khu na mbi dhukiswa ngu sihari sa mafuni.

²³ Nguko txitumelelano txako txi na va txa marigwi; se sihari sa txitinga si na va ni nawe.

²⁴ Kambe u na tiziva taku, ditenda dako di kuthuthani; se u na zumba nyumbani kwako, kambe khu na mbi pwata txilo.

²⁵ Kambe u na tiziva taku liveleko lako li na anda, ni vanana vako va na nga mwasi wo nakana.

²⁶ U na tshotshwa dithithani u ti kumbile, nga kule kusengeletwako tinyanda ta fulaho ngu mbimo ya kona.

²⁷ Wona taku atiya hi wotisete, ti zumbisile toneto; pfisisa ni kupimisa ngu tona, i nava tinene kwako.