Jobe 4 - Bhiblia Yo Sawuleka

Kuwombawomba ko khata ka Elifazi Yi hokile mbimo yako yo xaniseka

¹ Sekoko Elifazi, Mutemani, a to xamula, a txi khene:

² Ngako hi txi duketa ku kugela, ina u na henya kani? Aniko i mani a nga sikotako kumita mapswi kani?

³ Wona taku u gondisile votala kambe u tsanisile manza o karala.

⁴ Mapswi ako ma wusile vale va nga wiswa, kambe u tsanisile mazolo o karala.

⁵ Sekoko kata kwako kukarala; ku txi ta kugwesa, ka kuxanisa.

⁶ Ina hi nga kuthava Txizimu i kuthemba yako, ni kuverela kwako hi nga tinzila tako ta tinene kani?

⁷ Alakanya konkuwa: Ngu wihi wamnene a khalako kulova kani? Niku ngu hani va nga khundumuswa vavanene kani?

⁸ Ani ni khala kuwona vale va dimako wubihi, ve phaya wubihi ni kutshumela ve elula.

⁹ Va loviswa ngu kuhefemula ka Txizimu; kambe va hetwa ngu kufuteta ka kuhenya ka txona.

¹⁰ Kubhonga ka ngonyamo, ni dipswi da ngonyamo ya tshofu, ni makwasa a singonyamwana ma funyekela.

¹¹ Ya lova ngonyamo yo kumba nguko kha ku nga ni txo txi daya, ni vanana va ngonyamo ya makati, va hangalakela.

Ku nga maneka wo lulama masoni ka Txizimu kani?

¹² Ni getwe dipswi ngu malengo; se tinzeve tangu ti zivile txihunja txa kona.

¹³ Mndani ka kupimisa ngu siwoniso sa wusiku, mbimo yile vavamna va manwako ngu wukohe wo tshima,

¹⁴ ni tetwe ngu kuxamala ni kudhudhumela, se otshe marambu angu ma to nguda-nguda.

¹⁵ Sekoko moya wokari wu to pinda ngu masoni kwangu; wu vhivhinikisa misisi ya nyama yangu.

¹⁶ Wu to ema, aniko ni si zivi zumbelo ya wona; ku ti ti woneka txokari masoni kwangu; aha ni nga malala, ni pfite dipswi di txi kha dona:

¹⁷ Ina m'thu a ngava i di wo lulama ngutu kupinda Txizimu kani? Ina wamwamna a ngava a ti sawulekile kupinda M'vangi wakwe kani?

¹⁸ Txizimu kha txi thembi tingelozi ta txona, kambe txa mana tingelozi ti di xangile.

¹⁹ Ngutu-ngutu vale va zumbako ka tinyumba ta ndope, makhato a kona i ku lithulu, va sikotako kuphwaraselwa kufana ni sumba!

²⁰ Va phatulelwa kukhukhela mixo kala minova; se ve loviswa ngu ha ku si gwitiko, ku si nga ni mhaka ngu tona.

²¹ Ina kha va lovi nawo wudhundo wawe kani? Vafa, aniko va si nga ni wutxhari.