Jobe 39 - Bhiblia Yo Sawuleka

I mani a nga va nga sihari ni zumbelo ya sona kani?

¹ Awe wa yi ziva mbimo yile timhoti ti ku ni simhotyana, mwendo u woni kulumwa ka timhoti ta mikati kani?

² U nga balela mitxima ya kuverela ka tona, mwendo u ziva mbimo ya kuveleka ka tona kani?

³ Tona ta khizama ti veleka simhotyana, se kupanda ka tona kutsula kule.

⁴ Simhotyana sa kona sa tsana, si kulisa ku nga fulaho, si txi khukha kha si wuyi kambe ka vamame va sona.

⁵ I mani a nga txhatxha mbongola ya txitinga e yi leka, niku i mani a nga txhatxha txhini ka mbongola ya txigevenga,

⁶ ayi ni nga yi veka txiwulani kuva m'tini ka yona, ni kuzumba ka makhalo a mnyu kani?

⁷ Yi sekiswa ngu diguwa da didhoropa; kha yi pfi diguwa da m'gadhi wa yona.

⁸ Asi yi si tumbulako mimangoni, ngudya ka yona, se yi tsimbila yi lavetetela sotshe so nakana.

⁹ Ina nyari yi na ti lava ku kuthumela, mwendo yi na zumba ka txibala txako kani?

¹⁰ Mwendo u nga jokela nyari ka digejo ngu ngoti, mwendo yi nga kubhandela misele kani?

¹¹ Mwendo u nga themba nyari, ngu mtamo wa yona wa hombe, mwendo u nga yi ninga mthumo wako kani?

¹² Mwendo u na yi themba kuya teka siyalo, se a txi si tisa mu u hulako kona kani?

¹³ Mbuwu yi zuza tibhapi ta yona yi di tsakile, mitenga ya kona nga ya nyawukolwe;

¹⁴ yi veka manda a yona ha mafuni, yi txi ma futumeta ngu lithulu.

¹⁵ Yi divala taku mkondo wokari wu na ma ganyata, hambi kukuletelwa ngu sihari sa txitinga.

¹⁶ Mbuwu yi xupha vanana va yona, nga hi nga va yona; yi thuma walo, kha yi thavi kuluzekelwa.

¹⁷ Nguko Txizimu txi yi toni wutxhari, kambe kha txa yi ninga mapimo.

¹⁸ Ngu mbimo ya kona yi gulekela txitimwi; yi txi seka dihantxhi ni m'gadhi wa dona.

¹⁹ Mwendo awe u nga ninga mtamo dihantxhi, mwendo u nga fenengeta mkolo wa dona ngu mthiva kani?

²⁰ Mwendo u ngadi dhukisa nga bhandala kani? Kuhefemula ka tithonvu ta yona ka thisa.

²¹ Da kela-kela mafu di tsakela mtamo wa dona, se di txi huma di hingeta vale va nga xoma.

²² Di seka va dizowa, kha di thavi, kambe kha di tshumeleli msana ngu kuwona ditxhari.

²³ Tingove wuketxeketxe ti txi lava dona, mseve wa simbi wa phatima, kumweko ni txiholoma.

²⁴ Di maha wujalajala, di tutuma-tutuma, di txi kela-kela mafu, kambe kha di nga ni mhaka ni diguwa da mpundu.

²⁵ Mbimo yi ku pfalako mipundu, di kha dona: Ti nave! Se ngu kule di nungetela yimbi, ni ku diguwa da vathangeli ni tshodi.

²⁶ Mwendo nyamatate a purumiswa ngu wutxhari wako, a txi gwimba tibhapi takwe eya wuphemba kani?

²⁷ Mwendo digama di londeta kuruma kwako, ni kuveka txitimwi txisaka txa dona kani?

²⁸ Di zumba marigwini di hanya kona; titshokani ka marigwi, ni makhalo o tsana.

²⁹ Di wona so dingana ku si ñola di ti koneyo; maso a dona ma si wona si di ngadi kule.

³⁰ Mavhondo a dona ma ndinda mnoha; kambe aha ku ku ni sirumbi, di koneho.