Jobe 37 - Bhiblia Yo Sawuleka

¹ Se ngu mhaka ya eto, mbilu yangu ya dhudhumela, yi ndaka ngu ha ka wukhalo wa yona;

² ni pfisisile diguwa da dipswi dako, ni kukwangula ko huma ngu txisofuni kwako.

³ Txizimu txa rumela txingwalangwanda ni liwoningo, ngu hahatshi ka nzuma, kala magwito ka mafu.

⁴ Msana ka tiya, txa bhonga ngu dipswi da hombe, txi dhinda ngu dipswi da txona; se di ti pfitwe dipswi da txona, kha si sweli kuwa.

⁵ Txizimu txa dhinda ngu dipswi da txona do xamalisa; Txi maha ta hombe taku kha hi ti zivi.

⁶ Nguko ka hunguva txi kha txona: Wana ha mafuni; hambi ka matshutshelo, ni ka mati a hombe.

⁷ Txizimu txa fumbaretisa manza a votshe vathu, ksai ku votshe vathu, va na ziva mithumo ya txona.

⁸ Sihari sa wulela kusisalani ka sona se si txi zumba mibhalani ka sona.

⁹ Txihuhuri txi khukhela wuphemba, se pheho yi txi ta ngu wutxani.

¹⁰ Ngu kufuteta ka Txizimu ma bangiswa mati, se mati o anama ngutu ma bangiswa.

¹¹ Kambe Txizimu txa humisa marefu o dhimba, se txi hangalasa direfu ngu kukeluka ka txona.

¹² Sekoko madingano ni txileleto txa txona txa ditshuri, txa ranganyeta direfu ngu kukeluka kasi ku di txi maha ti txi ngadi leleta tona, txitimwi ka mafu o zumba ka ona;

¹³ kumahela kuva txikhawuliso ka mafu mwendo kuva tikatekiso ka mafu, hambi kuninga kuhanya kakunene.

Wuzivi wa Txizimu wa kwa mbi gwitelwa

¹⁴ Ka tiya, pfisisa awe Jobe; pfisisa ni kulondeta sixamaliso sa Txizimu.

¹⁵ Ina u ngava u txi tiziva ti Txizimu txi mahisako tona, txi txi woninga ngu dituro ha ka direfu kani?

¹⁶ Ina awe wa ziva ti txi hayekisako tona marefu o dhimba, sixamaliso sa wule wa wuzivi wo hetelela kani?

¹⁷ Mwendo txi txi futumelisako syambalo sako, mbimo yile kupepa kutako ngu wuphemba kani?

¹⁸ Mwendo u gwimbile kumweko natxo nzuma, yo tsana kufana ni txibuko txo nyekiswa kani?

¹⁹ Hi gondise ti hi no txi gela; nguko kuwalo txi hi no txi lulamisa, ngu mhaka ya mtema.

²⁰ Ina txi to gelwa ti ni khalako kuwomba kani?

²¹ Se konkuwa, kha di woneki ditambo di diphatimako nzumani; aniko wu txi pinda moya wu txi si kuwula,

²² kuphatima ka nzalama kuta ngu wuphemba; nguko ka Txizimu ku ni kuthaviseka ka hombe.

²³ Ka wu wa Mtamo-wotshe kha hi na kuhoka; mbwa hombe amu ka mtamo; aniko kha lamuli ni wammweyo ngu timbiti, ni wuhombe wa wululamo.

²⁴ Ngu mhaka yeto, vathu va mthava; ene kha thavi vale va ku ni mbilu yo txhariha.