Jobe 34 - Bhiblia Yo Sawuleka

Kuwombawomba ka wumbidi ka Elihu

¹ Elihu a to xamula kambe, a txi khene:

² Engisani ditshuri dangu, anu titxhari; ni nanu va wuzivi, namisani tinzeve kwangu.

³ Nguko nzeve ya xola mapswi ku nga txisofu txipfako sakudya.

⁴ A hi ti sawuleleni ti i ku to lulama; ni kuziva ti i ku tinene.

Txizimu kha txi dyeleli m'thu ni wammweyo

⁵ Nguko Jobe a ti khene: Ani ni lulamile, aniko Txizimu txi thavisile madingano angu.

⁶ Hambiko ni ku ni madingano angu, ni mahwa wa makuhu; txilonda txangu kha txi holi, hambiko ani ni kuwalo mnandu.

⁷ Mbwamwamna muni a kuho wo nga Jobe, wo sela sipoyilelo nga o sela mati kani?

⁸ Wo tsimbila ni vamahi va wubihi, kambe a tsimbilako ni vaonhi kani?

⁹ Nguko a ti khene: Kha ku nga ni dibhindu da txilo, kutsakiswa ngu Txizimu.

¹⁰ Ngu kumaha keto, anu vavamna va mapimo, ni engiseni: Kambe kule ni Txizimu wubihi, kule ni wa Mtamo-wotshe, wuhambunyeti.

¹¹ Nguko, txi tshumetela m'thu, madingano ni mithumo yakwe; txi maha ti to m'thu ni m'thu e mana, madingano ni dihanyo dakwe.

¹² Kambe, kha ditshuri, Txizimu kha txi mahi ngu wubihi; hambi wu wa Mtamo-wotshe, kha sanuli malamulelo.

¹³ I mani a nga ninga Txizimu kufuma mafu kani? Niku i mani a nga txi ninga dotshe ditiko kani?

¹⁴ I tiku Txizimu txo va ni mbilu yo wukela m'thu, txi thavisa moya ni muhefemulo ka m'thu,

¹⁵ yotshe nyama yi ndi na patana yi txi fa, se m'thu a ndi na tshumelela lithuluni.

Txizimu txi lulamile, kambe nja mtamo ngutu

¹⁶ Ngako koko, ku diho kwako kupimisa, engisa tiya; namisa nzeve ka dispwi da kuwomba kwangu.

¹⁷ Ina wule a nyenyako wululamo a ndi na fuma kani? Se awe u lava ku kona wule i ku wo lulama, wa mtamo, kani?

¹⁸ Mwendo ku nga wombwa ka mfumeli taku: O! Bheliyali kani? Hambi ka vathangeli, taku: Mi vaonhi, kani?

¹⁹ Ngutu-ngutu Txizimu txi si nyenyiko mthangeli, hambi kukhatalela nyatithombe kupinda txisiwana; nguko sotshe mthumo wa manza a txona.

²⁰ Vona, ngu mbimoanyana vafa; se hambi hagari ka wusiku vathu va xaniswa, ve pinda, ni va mtamo ngutu va tekwa, va si ti lweli.

²¹ Nguko maso a Txizimu ma wonetela dihanyo da m'thu ni m'thu, kambe txa wona kotshe mu hi kandako kona.

²² Kha ku nga ni txidema, hambi mtsudi wa lifo, ko dingana ku vaonhi va nga sisala kona.

²³ Nguko Txizimu kha txi lavi kulaphisa mbimo kasi kuyisa m'thu masoni ka txona, kuya lamulwa.

²⁴ Txizimu txa rera va mtamo, ku si maneki ni wa ku wotisa, se ka wukhalo wawe txi veka vamwani.

²⁵ Txizimu koko txa yi ziva mithumo yawe; ni wusiku txa va juja, ni ku va tshinda.

²⁶ Txa va tsayisa nga ova vaonhi, va di masoni ka vale va va wonako;

²⁷ nguko va tsute kule natxo, kambe kha va londeta ni nzila yimweyo ya Txizimu,

²⁸ kasi ku kudila ka txisiwana, ku txi hoka ka Txizimu, txi engisa kudila ka vanana vo xomuleka.

²⁹ Se ngako Txizimu txi txi malala i mani wa ku txi sola kani? Ngako txi txi ti tsiva khohe, i mani waku a nga txi wona, ka vathu votala, hambi ka m'thu mmweyo kani?

³⁰ Kasi ku mkanganyisi asi dhuki e fuma, ni ti to vathu va si riyelwi milawu.

Awe u ti emisete kuleka kumaha to biha kani?

³¹ Kha ditshuri i mani a nga womba ka Txizimu, a txi khene: Ni khawute, kha ni na mbi onha kambe;

³² ati ni si ti woniko, awe ni gondise; ngako ni di mahile wubihi wokari, na mbiswa ni wu maha kani?

³³ Ina hakhelo ya kona yi ta ngu kwako, ko na za u txi yi txhipisa kani? Sawula koko awe, na i si nga ani; ngu tihi kona kuwa, u ti zivako awe kani? Womba!

³⁴ Vathu vale va ku ni mapimo va na ni gela, ni vale vo txhariha va na kha vona:

³⁵ Jobe, a wombile a sa pimisa; aniko ka mapswi akwe kha ku nga ni wutxhari.

³⁶ Tata wangu! Jobe a na dukwe kala magwito, ngu mixamulo yakwe apune yo biha.

³⁷ Nguko wa engetela txionho txakwe ngu wuhambunyeti; hagari kwathu, wa peka manza, e tata kutiemela, e wukela Txizimu.