Jobe 31 - Bhiblia Yo Sawuleka

Txizimu txi na ni veke txikaloni ko lulama

¹ Ni mahile txitumelelano ni maso angu; ni nga navelisa kutxani muhorana kani?

² Nguko txi ndi nava txihi txyavelo txa kuta ngu ka Txizimu txitimwi, mwendo thomba ya wule wa Mtamo-wotshe, yitako ngu txitimwi kani?

³ Ina hi nga kutimela ka m'bihi, ni phango ka vale va mahako to biha kani?

⁴ Ina Txizimu kha txi ti woni tinzila tangu, niku ina kha txi baleli mazambo angu kani?

⁵ Ngako ni di tsimbite ngu kukanganyisa, ni kungako mkondo wangu wu di tutumete ka wukanganyisi.

⁶ (Txizimu txi na ni veke sikaloni ko lulama, se txi na ziva kuthembeka kwangu);

Kha ni zivi kunavela, hambi kumaha wugango

⁷ Se ngako ni txi dhuka ni leka nzila, ni mbilu yangu yi txi xengwa ngu maso angu ni kungako manzani kwangu ku ti namarete txokari,

⁸ sekoko ni na phaye, mmwani a txi dya, ni liveleko langu li na dulwe ngu mikolotini.

⁹ Ngako mbilu yangu yi ti ndindekile ngu kunavela wamsikati, ni kungako ani ni ti horolokete ha txikeni ka mwakelani,

¹⁰ sekoko msikati wangu a na tsule eya sinza kumwani, kambe vamwani va na otele nayo.

¹¹ Nguko eto ti ndi nave tingana, to dingana kuya ka valamuli.

¹² Nguko mndilo wu tshokomisa kala kufani, kambe wu ndi na lovisa sotshe si ni ku naso.

Yotshe mbimo ni lulamile, ni ni wumbilu

¹³ Ku ngako ni di dyelete khumbi yangu ya txiwamna ni ya txisikati, mbimo yi ti nga txi lwisana ni nani,

¹⁴ sekoko ni ndi na txani ani, ngako Txizimu txi txi ni lamula kani? Se txi txi ni wotisa mhaka yiya, ni ndi na xamula txani kani?

¹⁵ Awule a nga ni wumba mndani ka mame, ina hi nga ene a nga wumba khumbi kani? Ina kha hi maha ngu mamahelo mamwewo mndani ka mame kani?

¹⁶ Ngako ni di zumbile ni sile si nga txi verelwa ngu sisiwana, ni kupfhumisa maso a noni;

¹⁷ mwendo ni dyite nokha sakudya, se wo felwa ngu vaveleki kha dya txilo.

¹⁸ (Nguko kukhukhela wanana wangu a kute ni nani, ni txi nga tate wakwe, ni mtsimbitisile kukhukhela mndani ka mwamwangu);

¹⁹ mwendo ni woni wokari a txi kelelelwa ngu so ambala, hambi txisiwana txo pwata so fenengela;

²⁰ ngako txiwunu txakwe txi sa ni katekisa, mwendo a sa futumetwa ngu matoya a sinvutana sangu;

²¹ mwendo ngu dianza dangu ni pekile wo felwa ngu vaveleki, ngu kuwona wa ku ni lwela ha txikeni,

²² sekoko txiphanga txangu txi na we ngu ha ka dikata, di na funyeke diwoko dangu ngu mu ka dirambu.

²³ Nguko txitsayiso txa Txizimu i ti ti txidhusa kwangu, se ani ni si sikoti kutsana ka wuhombe wa txona.

Kha ni zivi kwa mbi thembeka ka Txizimu

²⁴ Ngako ni ti vekile themba yangu ka nzalama, ni kungako ni ti wombile ka nzalama ku khani: Awe u themba yangu;

²⁵ Ngako ni di tsakile ngu ku khani, thomba yangu i ti ti yayingi, ni ti taku manza angu ma ti ti thumile so tala;

²⁶ ngako ni di woni ditambo di nga txi phatima, mwendo mtxima wu txi tsimbila ngu kudhundeka;

²⁷ ngako mbilu yangu yi di ndindilwe txihunjani, se txisofu txangu txi di pswopswile dianza,

²⁸ ni tona, tiya ti ndi nave tingana, to dingana kuyiswa ka mlamuli; ngutu koko, ni ndi na kaneta Txizimu txi txi ku txitimwi.

Kha ni zivi kulwisa, mwendo kupeka, hambi kukanganyisa

²⁹ Ngako ni di tsakisilwe ngu kuxaniseka ka wule a ni vengako, ni ku mwendo ni bhumile mbimo yi a nga welwa ngu to biha,

³⁰ (kambe kha na onha ngu txisofu txangu, ni txi kombelela kufa kwakwe ngu wubihi);

³¹ ni kungako vathu va ditendani kwangu va sa kha vona: A! I mani a nga mbi khura ngu nyama yakwe!

³² Mluveli a ti si oteli nzilani ni wusiku; matimba angu ni ti ti tulela vatsimbili.

³³ Se ngako ni di khubhunyetile sihambunyeto sangu ngako ni ku m'thu, ni sisa tingana tangu masoni kwangu,

³⁴ ni na dhudhumele masoni ka dibutho da hombe, ni kuxowokiswa ngu mimwaya ya vathu, se ani ni na malale, ni nga hume ha txikeni.

Ni gwitela hawa kutiemela kwangu

³⁵ O! Nga ku na mana wammweyo wo ni engisa! Wona taku, kunavela kwangu nguku awu wa Mtamo-wotshe, a txi ni xamula, mlala wangu a na bhale txisolo dibhukuni.

³⁶ Na tsanisa taku ni ndi na di pakata, ni ndi na di sunga, nga m'bhoti.

³⁷ Ni ndi na mkomba mtengo wa mazambo angu; ni ndi na tshuketela nga mthangeli.

³⁸ Ngako mafu ma txi ni dhana, ni kungako ni txi dila ni khongela.

³⁹ Ngako ni ti dyite mihando ya mafu ni si nga ni male, ni daya vanyamne va kona,

⁴⁰ ngu fulaho ni na velekelwe mipa ngu sevhadha ni velekelwa nyasavari. Ma gumile mapswi a Jobe.