Jobe 30 - Bhiblia Yo Sawuleka

Vathuvo va ni poyilela ni ku ni wukela

¹ Se konakuwa, mbanana vavadotho va ni sekako, evo vatate vawe ni nga nyenya ku va veka kumweko ni timbwa to wonelela mitxhambi yangu.

² Kona kambe wu ndi na ni vhuna txani mtamo wa manza awe, mtamo wa vathu va wu nga hetwa ngu kukumba kwawe kani?

³ Va rerilwe ngu kugoma ni nzala; se va ti ti thavela ka makhalo a kuoma, a txihala txa txisapa ni txiwula.

⁴ Va ti ti hapha mazokoro sitingani, kambe va ti ti dya mikoloti ya minzomi.

⁵ Va ti ti tutumiswa hagari ka vathu, (va ti ti viketwa nga makhamba),

⁶ va txi ya zumba maphalani ka mikovani, mibhalani ka mafu, ni tiphakoni ka marigwi.

⁷ Va ti ti keta hagari ka sitinga, se va ti ti tshangana kumweko sitxhotxhotani.

⁸ I ti ti vanana va siphuku-phuku, vanana va vathu vo mbi na matina, va ti ti tutumiswa ditikoni.

⁹ Se kona kuwa, ani ni ndando yawe, kambe va ni maha divingu dawe.

¹⁰ Va ni nyenya, ve tutuma ve tsula kule ni nani, kambe kha va emi ku ni thurela khoheni.

¹¹ Nguko Txizimu txi nawulutile ngoti ya txona txi ni khozisa; ngu kumaha keto, va rinzile matomu awe khoheni kwangu.

¹² Majaha ma wukela ngu didhawa da txinene; va retha mikondo yangu, ve lulamisa nzila yo ni fuvisa ngu yona.

¹³ Va khulumetela nzila yangu; i ku wukulungu wangu; vathu vo pwata ni wo va vhuna.

¹⁴ Va ni telisa ku nga vo wulela ngu lifa la hombe ve rindilikela hagari ka marumbi.

¹⁵ Ni wetwe ngu kuthava; vo nga moya va txi tutumisa kudhundeka kwangu, se kutsaka kwangu kupindisa ku nga direfu.

Awe wa ni xanisa

¹⁶ Se konkuwa, moya wangu wu thekete; masiku a kuxaniseka ma ni talete.

¹⁷ Ni wusiku na gogonywa ngu marambu angu, kambe kubiha kuwa ku ni xomulako, kha ku humuli.

¹⁸ Awe Txizimu, mtamo wa wubihi wangu wu mahile dibhaji dangu, wu txi ni namarela nga dibhaji do kama.

¹⁹ Txizimu txi ni rinzile amu ka lidhaka ni za ni txi fanana ni lithulu ni dikhuma.

²⁰ Na dila kwako Txizimu, aniko awe khu ni xamuli; ni emile, aniko khu ni engiseli.

²¹ U ti mahile txigevenga u ni wukela; ngu mtamo wa dianza dako, wa simama ku ni lwisa.

²² Wa ni gula ngu txihuhuri, u ni maha ni txi txi gadha, kambe wa ni nyekisa ni si vhuni txilo.

²³ Nguko ani na tiziva taku u na ni yisa kufani, ni nyumbani mu kuverelako votshe vo hanya.

²⁴ Ina khu na mbi sanzeka dianza txitimwi ka m'thu wu a nga gwitelwa, ngako ku txi pfala kudila kwakwe kani?

²⁵ Ina kha na dilela wule a nga ti ti xaniseka, mwendo moya wangu kha wa xomuleka ngu wule wa txisiwana kani?

²⁶ Hambi keto, mbimo yile ani ni nga txi verela wunene, wu to ta kwangu wubihi; ni mbimo yi ni nga txi verela liwoningo, ni to telwa ngu mtema.

Ni kombela kuvhunwa

²⁷ Mndani kwangu ku vhilukile, kha ku mani kuthutha; masiku a kuxaniseka ma ni jumile.

²⁸ Ni hisilwe, aniko na i si nga ngu ditambo; ni txi ema msengeletanoni, no dilela kulamulelwa.

²⁹ Ni ti mahile ndiya ya maxolwa, ni txi ti maha mngana wa timbuwu.

³⁰ Didhowo dangu di to nzihala, ni marambu angu ma hisilwe ngu lisani.

³¹ Sekoko txitende txangu nja nyawudile, ni msengele wangu, dipswi da vale va dilako.