Jobe 27 - Bhiblia Yo Sawuleka

Xamulo ya Jobe Ni na simama kuthembekani kwangu

¹ Se Jobe a to simama ni karingani yakwe, a txi khene:

² Txizimu txi hanyako, txi ni honyote ditshuri dangu, wa Mtamo-wotshe a nga swihata moya wangu.

³ Ku di nga diho kutsaka kwangu, ni kufuteta ka Txizimu tithonvuni kwangu,

⁴ txisofu txangu kha txi na mbi womba-womba kubiha, hambi lidimi langu kuangula ko kanganyisa.

⁵ Ti nave kule ni nani taku, ni mi emela; kala kuza nifa, kha ni na mbi dhuka ni leka ditshuri dangu.

⁶ Ni na tsana ditshurini kwangu ni si di leki; mbilu yangu kha yi na mbi ti sotela kuhanyani kwangu.

Valala vangu va na tsayiswe

⁷ Mlala wangu a na tsayiswe kufana ni wo biha; se ni wule a nga ni wukelako, a na fanane ni muonhi.

⁸ Nguko yi na va yihi themba ya mkanganyisi, wa likungo, ngako Txizimu txi txi honyola moya wakwe kani?

⁹ Ina Txizimu txi nga dhuka txipfa kudila kwakwe, ngako a txi telwa ngu sikarato kani?

¹⁰ Niku mwendo a tsakela wule wa Mtamo-wotshe, hambi kukhumbuka Txizimu yotshe mbimo kani?

¹¹ Ni na mi gondisa ati ti tsimbilelanako ni dianza da Txizimu, kambe kha ni na mbi mi sisela ti a ku nato awu wa Mtamo-wotshe.

¹² Wona taku, anu motshenu, se mi ti woni eto; ngu kutxani koko mi lovako amu kukanganyisani kani?

Kuwombawomba ka wumune ka Zofari Txizimu txa tsayisa vabihi

¹³ Wona taku, i nave txyavelo txa kuta ngu ka Txizimu, i kuthomba ya m'bihi, kambe i thomba yile vaxanisi va no yi amukela ngu ka wa Mtamo-wotshe.

¹⁴ Ngako vanana vakwe va txi maha votala, va na dawa ngu ditxhari, ni vatukulu vakwe kha va na mbi khura ngu dipawu.

¹⁵ Avale va no sala kwakwe, va na fa ve kelelwa, kambe tinoni tawe kha ti na mbi va dila.

¹⁶ Ngako ku txi sengeletwa silivhela nga lithulu, ni kuveketela syambalo kufana ni ndope,

¹⁷ muonhi a na si veketela, aniko si na ambalwa ngu wule wo lulama, ni wule wo mbi na mnandu a na phakelwa silivhela.

¹⁸ Ene a aka nyumba yakwe ku nga sumba, ni kufana ni muwoneleli a ti akelako m'dhuti.

¹⁹ A otela a di ni tithomba to tala; a txi tula maso, se tithomba takwe ti hangalakete.

²⁰ Kuthisa ka mtalela nga mati; se ni wusiku a txi pekwa ngu txingulu.

²¹ A na huhiswa ngu moya wa wutxani e penga; wu na m'hiyela ngu kubhubhula ka wona ka wukhalo wakwe.

²² Se Txizimu txi na tisa txikarato txitimwi kwakwe, kha txi na mbi mtsetsa; a na tutuma manzani ka txona.

²³ Vathu va bhwabhwatela manza, va txi mmimela, kambe va txi veta miloti va di ha wukhaloni kwakwe.