Jobe 24 - Bhiblia Yo Sawuleka

Vabihi vapa

¹ Ti komba ku timbimo kha ta vekwa ngu wu wa Mtamo-wotshe, ngu kutxani va si woniko masiku akwe vale va m'zivako kani?

² Vaho vale hambi mihingano va yi thavisako; vepa mitxhambi, se ve yi dyisa.

³ Va teka mbongola ya wo felwa ngu vaveleki; ve ñola homu ya noni ve vekisa ngu yona.

⁴ Va hambukisa nzilani avale vo pwata; se sisiwana sa ha mafuni si sisala sotshe.

Sisiwana sa dyelelwa ngu vabiha

⁵ Wonani to si fana ni timbongola ta txitinga, so phindula si huma kuya xota sihari; txiwula txa ninga sakudya ka sisiwana ni ka vanana va sona.

⁶ Thembweni sa funyela sakudya sa sona, ni kukamela mivhinya ya vaonhi.

⁷ Va otela wusiku wotshe va sa ambala simaha, ngu ku va va si nga ni so fenengela ve sisala pheho.

⁸ Va nakaniswa ngu mati o khukhela mimangoni, se va pwata ni ko thavela kona; va khutarelana ni marigwi.

⁹ Mwanana wo felwa ngu tate, a thaviswa tshumbuni, ve amukela txo vekiswa ngu txisiwana.

¹⁰ Va maha ti to va simbwiri ve tsimbila va sa ambala txilo, kambe va honyola sakudya ka vanyanzale.

¹¹ Mndani ka maguma awe va maha mtona; va kamela sa kusela mapipani, aniko va ngadi ni ditora.

¹² Madhoropani va keta vathu, ni moya wa vo dayiswa wa kwangula; aniko Txizimu kha txi na mhaka ngu wuphukuphuku wawe.

Vabihi, sidayi, magelegele, makhamba

¹³ Vona va hagari ka vale va lwako ni liwoningo; kha va ti zivi tinzila tawe, kambe kha va tsani tinzilani kwawe.

¹⁴ Txidayi txa wuka ngu mabimbi-kutxa, txi daya txisiwana ni vo pwata se ni wusiku txi ti maha dikhamba.

¹⁵ Nga kule maso a digelegele ma ronolelako wuronga, di txi kha dona: Kha ni na mbi wonwa ngu diso ni da dimwedo, di ti tsiva ni khohe,

¹⁶ txidemani si riyela miti yile si nga yi veka sivango ni mitshikari, kha si zivi ka nga lavana ni liwoningo.

¹⁷ Nguko ka sona sotshe, mixo, yi nga mtsudi wa lifo, nguko si txi tumbulwa, si pfa kuthisa ka mtsudi wa lifo.

Kuwombawomba ka wuraru ka Zofari Txizimu txa fuvisa vabihi

¹⁸ Va deluka txitimwi ka mati; thomba yawe yi ruketetwe txitmwi ka mafu; kha va tshumeli ngu nzila ya mivhinya.

¹⁹ Kuoma ni lisani sa phwisa mati a hunguva; diyiva di na va fuvisisa toneto, avale va nga onha.

²⁰ Mndani mule ku nga va veleka ku na va divala, timbungu ti na vadya ti txi pfa kutshamba; kha va na mbi ngadi ve va alakanywa, se wubihi wu na funyekisa ku nga mndonga.

²¹ Va xanisa wule i ku txifule asi velekiko, kambe kha va mahi ta tinene ka noni;

²² ngu mtamo wawe va ndinda ni vale va mtamo ngutu; se ngako vona va txi wuka, kha ku nga ni kuhanya ko tsana.

²³ Ngako Txizimu txi txi va ninga kuhumula, va omelela ka toneto; sekoko maso awe ma tinzilani kwawe.

²⁴ Va guleka ngu mbimo yayidotho, ve kuluveta kumwalala; va wuna kufana ni votshe vamwani, se ve wilwa kufana ni titshoka ta m'buru.

²⁵ Se konkuwa ngako i si nga tona, i mani a no ni kaneta ni kukhundumusa ditshuri dangu kani?