Jobe 21 - Bhiblia Yo Sawuleka

Xamulo ya Jobe Kha ni dhukiswi ngu ni wihi m'thu

¹ Sekoko Jobe a to xamula a txi khene:

² Engiselani kha kwati ditshuri dangu; kambe tona tiya ti na mahe to mi thavelela.

³ Ni xanisekeleni, ani ni na womba-womba; se msana ka kuva ni ti wombawombile, ni mimeleni.

⁴ Ina ani na dhuka ni ti bika ka m'thu wokari kani? Hambi i di kova toneto, moya wangu wu si xaniseki ngu txani kani?

⁵ Ni woneni mi xamala; se mi veka dianza ha txisofuni,

⁶ Nguko ni txi ti alakanya tiya, na xaniseka, se nyama yangu ya dhudhumeliswa ngu kudhukiselwa.

Vabihi va embelela, ve tsaka

⁷ Kasi va hanya ngu kutxani vaonhi, va kumbako, ni kutikarata ngu mtamo kani?

⁸ Liveleko lawe li anda masoni kwawe; se ni vanana vawe masoni kwawe.

⁹ Tinyumbani kwawe ku ni kuthutha, kha va nga ni kuthava; ni ndonga ya Txizimu kha yi nga txitimwi kwawe.

¹⁰ Madhuna awe ma velekisela, kha ma phazami, tihomu tawe ta veleka kha ti txhisi.

¹¹ Va humisa vanana vawe ku nga mtxhambi, na va txi ndaka-ndaka.

¹² Va guleta mapswi nga kutuma ka txingomana, ni haripa, ni misengele.

¹³ Kuhumelelani kwawe, va heta masiku awe, se ngu mbimo yayidotho ve relela dithithani.

¹⁴ Se va veka ni ku kha vona ka Txizimu: Khukha hawa kwathu; nguko kha hi naveli kumana wuzivi ka tinzila tako.

¹⁵ I mani wa Mtamo-wotshe, wa ku na za hi mthumela athu kani? Niku ti na hi vhuna txani kumaha mikombelo kwakwe kani?

¹⁶ Wonani koko taku, tithomba tawe kha ti ti ngu manzani kwawe; wu nave kule ni nani wudhota wawe.

Muonhi a na mane txitsayiso

¹⁷ Nzikhati singani kumahekako ti to me timeka malambu a vaonhi, ku txi ta kwawe kukhudumuswa kwawe kani? Se Txizimu kuhenyani ka txona, txi abana navo kupandiseka!

¹⁸ Nguko ku nga mwasi masoni ka moya, ni ku nga mtungu wu wusako txihuhuri.

¹⁹ Txizimu txi vekela vanana vawe kulwa ka txona, se ka vaonhi txa va ninga hakhelo, kuva va txi na txi ziva.

²⁰ Maso awe ma wona kufuviswa kwawe, se ene a sela kuhenya ka wule wa Mtamo-wotshe.

²¹ Nguko ngutsaka muni a ndi no kumana nyumbani kwakwe msana kwakwe, ngako a txi wilelwa mitxima yakwe kani?

²² Ina Txizimu txi ndi na gondiswa kuziva, eko txona txi lamulako sotshe sa nzumani kani?

²³ Mmwani afa a di ngadi tsani ngu kuhetelela mtamoni kwakwe, na a ti malate, a txi thuthelo.

²⁴ Titshumbu takwe ti tate ngu masi, ni marambu akwe ma ni moloko wo rawula.

²⁵ Se mmwani afa na moya wakwe wu di mu ka xomulo, a sa nga nga duketa kupfa ta tinene.

²⁶ Ngu wumbidi wawe va otela lithuluni. Se ve tshulelwa ngu timbungu.

Vangana vangu, kuthavelela kwanu diphanga

²⁷ Wonani taku ani na ziva kha kwati maalakanyo anu, ni mipimiso yanu yo biha ayi mi ni wukelako ngu yona.

²⁸ Nguko mi na khanu: Yi hani nyumba ya mthangeli, niku di hani ditenda dile a nga txi zumba ka dona muonhi kani?

²⁹ Ina kha ma wotisa ka vale va pindako ngu nzila, niku kha mi zivi sikombiso sawe kani?

³⁰ Taku wo biha a xayiselwa ditshiku da kuhasamulwa, ni kuguletwa ngu ditshiku da txiviti kani?

³¹ I mani a no sola nzila yakwe masoni kwakwe kani? Niku i mani a no mninga hakhelo ya tile a mahako kani?

³² Ngu kugwitisa wa yiswa dithithani, eya hungala kona mule ka diyiva.

³³ Mati ma khulungako mkovani ma mtshambela, kambe a ndindela kwakwe votshe vathu; na kuve asi se vaho ene, ku ti ti ni vo mbi balwa.

³⁴ Se mi sikotisa kutxani koko ku ni thavelela ngu ta walo kani? Ina, nguko amu ka mixamulo yanu ku ni makuhu.