Jobe 19 - Bhiblia Yo Sawuleka

Xamulo ya Jobe Anu mi ni ruketete

¹ Kambe Jobe a to xamula, a txi khene:

² Mi na funya muhefemulo wangu, kala yihi mbimo, mi txi ni phatulela ngu mapswi kani?

³ Se mi ni ruketete digumi da makhati; kha mi nga ni tingana ku mi ni wukelako.

⁴ Hambi kuva ngu ditshuri ni ti onhile, mnandu wangu wu na zumba ni nani.

⁵ Ngako mi txo ni wukela mi ni lwisa, mi txi ni sola ngu wuhambunyeti wangu.

Txizimu txi ni xanisile ngu makhombo

⁶ Ti ziveni nkonku taku, Njizimu txi nga ni poyila, se txi ni ranganyeta ngu likoka la txona.

⁷ Wona taku na banguluka: Na lwiswa! Aniko kha ni pfiwi; na keta: Nyandayeyo! Aniko kha ku nga ni wululamo.

⁸ Txizimu txi kete maphala ka nzila yangu, se kha ni na kupinda; amu ka tisoko tangu txi vekile txidema.

⁹ Txizimu txi honyote wudhundo wangu; txi thavisile m'bhoti ha msungo kwangu.

¹⁰ Txi ni funyeletete ngu ka otshe madhawa, se ani na tsula; txi dute themba yangu, ku nga mndonga.

¹¹ Txizimu txi mahile ti to ni hiswa ngu txiviti txa txona, txi ni veka ku nga no va mmweyo wa valala va txona.

¹² Masotxhwa a txona ma tile ngu diganda, me ta lulamisela nzila ya txona yo ni wukela, se me zumba madhawani ka ditenda dangu.

Maxaka angu ni vangana, va tsute kule

¹³ Txizimu txi vekile vanathu kule ni nani, se avale va ni zivako va so ti lava ve ni nyenya.

¹⁴ Maxaka angu ma ni lekile, se avale ni zivanako navo va to ni divala.

¹⁵ Vawuyi vangu, ni sithumi sangu sa txisikati va ni woni ni ti wa walo; ni ti ta maha wa matiko masoni kwawe.

¹⁶ Ni dhani txithumi txangu txa txiwamna, aniko kha txa ni xamula, ni zile ni dila ngu txisofu txangu.

¹⁷ Maheta angu ma nungeta msikati wangu; ni kudila kwangu, ka vanana va mndani kwangu.

¹⁸ Hambi vafana va ni txhipisa, se ni txi no khukheleko, vo ni poyilela.

¹⁹ Votshe va va zivako txihunja txangu va ni nyenya, ni vale ni nga ti ti va randa, va ni wukela.

²⁰ Marambu angu ma namarete ka didhowo dangu ni ka nyama yangu, ni to sala dwe ni didhowo da makwasa angu.

²¹ Ni xanisekeleni anu vangana vangu, ni xanisekeleni, nguko dianza da Txizimu di ni gwesile.

²² Mi ni xupha ngu kutxani, kufana ni Txizimu, mi si kolwi ngu nyama yangu kani?

Muemeli wangu wa hanya

²³ Mapswi angu konkuwa, ngu nga ma no mana kubhalwa! Nga ku na bhalwa amu ka dibhuku!

²⁴ Eko ngu tshoka ya txikete, ni simbi yo nemela, yotshe mbimo si txi lotelwa ha ka dirigwi!

²⁵ Nguko na tiziva taku Mtiruli wangu wa hanya, niku ngu kugwitisa a na ema txitimwi ka mafu.

²⁶ Se msana ka ku di ti gumile didhowo dangu, ni txi ngadi ni hanya nyamani kwangu, ni na wona Txizimu.

²⁷ Ni na muwona ani nipune, se maso angu, na i si nga mamwani, ma na muwona; ngu kumaha keto, mbilu yangu ya tshokoma mndani kwangu.

²⁸ Ngu ditshuri, mi ti ti dingana ku khanu: Eko hi mxuphela txani kani? Nguko mtwi wa mnandu wa kona, wu maneka kwangu.

²⁹ Anu mipune, thavani ditxhari; nguko txiviti txi tisa sitsayiso ngu ditxhari, ku va mi txi na tiziva taku waho mlamuli.