Jobe 18 - Bhiblia Yo Sawuleka

Kuwombawomba ka wumbidi ka Bhilidhadhe Malala Jobe, u pfisisa

¹ Sekoko Bhilidhadhe, Musuwita, a to xamula, a txi khene:

² Mi na thumisa wurindi kupinda mapswi kala mbimo muni kani? Pimisani kha kwati, msana keto hi na womba-womba.

³ Hi mahiswa ku nga ho va sihari, ni ku nga vamahi va wubihi masoni kwanu ngu txani kani?

⁴ O awe u tshatulelako moya wako ngu kuhenya, ina ma na lekwa mafu ngu mhaka yako kani? Ma na rindilika marigwi ngu wukhaloni ka ona kani?

Magwito a vabihi

⁵ “Ngu ditshuri, liwoningo la wa kubiha li na timeka, hambi tshatsha ya ha m'tini kwakwe, kha yi na mbi ketika.”

⁶ Liwoningo li na phuma matendani kwawe, kambe dilambu dakwe di na timeka.

⁷ Mazambo akwe o tsana ma na koma, se milayo yakwe yipune yi na mkhundumusa.

⁸ Nguko a na wuletwa likokani ngu mikondo yakwe yipune. Kambe a na tsimbila ka tingoti to riyelwa.

⁹ Litshenga li na mmana ngu ha ka txizenende, se txigevenga txi na mtsindaveta.

¹⁰ Ku ni dibzweto di nga sisala hahatshi ka mafu; se ni mlawu wu ku ha ka lisoko.

¹¹ Kuthava ku na m'dhukisa ka otshe madhawa, ku mmaha e tutuma eya khe ni khe, ni hani ha a no tutumela kona.

¹² Mtamo wakwe wu na guma, se e pfa nzala, kukhundumuswa ku m'verete didhawani kwakwe.

¹³ Siro sakwe si na mitwa, ina, matiwula a kufa ma na mita siro sakwe.

¹⁴ A na thaviswa ditendani kwakwe, emo a nga ti thembile kona, se a na heleketwa ka mfumeli wo thisa.

¹⁵ Ditendani kwakwe a na ya zumba wule i nga ti si nga ene; ku na xwayelwa txivavula txitimwi ka nyumba yakwe.

¹⁶ Hahatshi, mitwi yakwe yi na oma, se txitimwi ma na wilelwa madhavi a kona.

¹⁷ Maalakanyo akwe ma na lova mafuni, ditina dakwe kha di na mbi maneka mithandani.

¹⁸ Ngu kuwonekelani va na mtshotsha txidemani, kambe va na mtutumisa ha ditikoni.

¹⁹ Kha na mbi va ni mwanana hambi mtukulu ka vathu vakwe, kha ku na mbi maneka ni wammweyo wo sala tinyumbani kwawe.

²⁰ Ngu ditshiku da kona, va na xamala avale va nota, se avale va kale va na ndakandakiswa ngu kudhukiselwa.

²¹ To nga eto, ngu tona ngu ditshuri, tinyumba ta vahambunyeti, se awuwa ngu wona wukhalo wa wu asi ziviko Txizimu.