Jobe 17 - Bhiblia Yo Sawuleka

¹ Moya wangu wa guma, masiku angu ma pfhiteka, se nova ni dithitha masoni kwangu.

² Ina kha va nga hafuhi ni nani valala vangu kani? Se ina maso angu kha ma ku woni ku ni xanisa kwawe kani?

Vathu vata ve ta ni thurela khoheni

³ Thembisa nkonku ku ni ninga muemeli masoni kwako; i mani a kuho wo dingana ku ni vhuna kani?

⁴ Nguko mbiluni kwakwe u sisile wutxhari, ngu kumaha keto, khu na mbi va guleta.

⁵ A wule ngu kutsaka a gelako vangana vakwe, vanana vakwe va na pfhupeliswa maso.

⁶ Aniko ani a ni vekile kuve txisekiso ka vathu, se ni gwitisile kuva txinyenyeko kwawe.

⁷ Ngu kumaha keto, maso angu se ma phumile ngu kupanda, kambe sotshe siro sangu se si fana ni mtsudi;

⁸ avale vo lulama, va xamate ngu tona tiya, se awule wo mbi na mnandu a na wukela mkanganyisi.

⁹ Se awule wo lulama a na londisa nzila yakwe a di tsani, ni wu wa manza o sawuleka, mtamo wakwe wu na engetelwa.

¹⁰ Aniko ngu ditshuri, tshumelani motshenu, mi wuya kheno, nguko hagari kwanu kha ni mani ni wammweyo wo txhariha.

Yi hani themba yangu kani?

¹¹ Masiku angu ma pindile, se mialakanyo yangu yi fite, i ku kunavela ka mbilu yangu.

¹² Va phemberusile wusiku va txi kha vona ditshiku; liwoningo li hafuhi ni kugwita, ngu mhaka ya txidema.

¹³ Ngako ni txi wona dithitha ku nga nyumba yangu, ni kuveka m'bhedhu wangu amu txidemani,

¹⁴ ngako ni txi kwangula ka dithitha, ni txi khani: Awe ngawe tate wangu; ni ka timbungu ni txi khani: Anu nganu mwamwangu ni ndiyangu;

¹⁵ Sekoko themba yangu yi ndi nava hani kani? Ina, themba yangu i mani waku a nga yi wona kani?

¹⁶ Themba yiya ni na relela nayo ka wukhalo wa Xeole, mbimo yi hi no ya mana kuhumula.