Jobe 16 - Bhiblia Yo Sawuleka

Xamulo ya Jobe ka Elifazei Mapswi amangi ngutu

¹ Sekoko Jobe a to xamula a txi khene:

² Ni khala ku nga pfa to tala to nga tiya; anu motshenu mi vathaveleli vo xanisa.

³ Ina kha ma na mbi guma mapswi awa a moya kani? Niku mwendo nji txani txi ku henyisako uza u xamulisa tiya kani?

⁴ Ina nani ni ndi na wombawombisa tona ti mi wombawombisako tona, i ti kova ku moya wanu wu ka wukhalo wa moya wangu kani? Niku mwendo ni ndi na mi wukela ngu mapswi o tala, ni mi weketela msungo wangu kani?

⁵ Kukhata mi ndi na ti tsanisa ngu txisofu txangu, se kuthavelela ka txisofu txangu, ku da boxisa kupandiseka kwanu.

⁶ Ngako ni txi womba-womba, kupandiseka kwangu kha ku gwiti; se ni txi malala, ku hani kuhehukelwa kwangu kani?

Txizimu txi ni tshindile

⁷ Kha ditshuri konkuwa na xaniseka; awe u xasete otshe maxaka angu.

⁸ Wufakazi wa kona, ngu ku u ni mahile ni thuvika, se kugoma kwangu ka ni wisa hahatshi, ni khoheni kwangu ku ni wufakazi wo ni wukela.

⁹ Txizimu txi ni phatulete kuhenyani ka txona, se txi ni tutumisile; txi gegeresete makwasa ngu ku ni henyela; mlala wangu wa ni ronolela ngu maso akwe.

¹⁰ Va tula sisofu ve ni wukela; va ni kwiritile ve ni dayisa txiletu, se votshe vata ve ta ni randela.

¹¹ Ni ningele ka vahambunyeti awe Txizimu, kambe ni wise manzani ka vaonhi.

¹² Ani ni ti ti humute, kambe Txizimu txi ni phatulete; se txi to ni ñola ngu thamo txi ni phatulela. Kambe txi ni mahile wo bzwetwa.

¹³ Va jangeti va tingove va ni randete; txa ni fula titsho, txi si ni tsetsi; se nyongwa yangu yi thekela ha mafuni.

¹⁴ Txi ni phatulela ngu tivandwa txitimwi ka tivandwa; txi ti rinza kwangu kufana ni m'thu wa mtamo.

¹⁵ Rungani mkhwasi aha ka nyama yangu, se mi rindilita msungo wangu lithuluni.

¹⁶ Yotshe khohe yangu yi simbile ngu kudila, se txitimwi ka timboni tangu ku ni mtsudi wa lifo,

¹⁷ hambiko ku singako ni kulwa manzani kwangu, ni mkombelo wangu wu nga mbi sawuleka.

Nzumani, ni ni wu a ni emelako

¹⁸ O! Mafu, u nga kuletele mnoha wangu; kambe ku nga maneke wukhalo wa kudila kwangu!

¹⁹ Sekoko konkuwa, yiho fakazi yangu nzumani, ni muemeli wangu txitimwi.

²⁰ Vangana vangu ngu vona va ni poyilelako; maso angu ma theketa mirongo masoni ka Txizimu.

²¹ O! Iti ku waho wo phota ka Txizimu ngu mhaka ya m'thu, nga mwanana wa m'thu ngu mhaka ya mngana wakwe!

²² Nguko ngu kupinda ka malembe amadotho, ani ni na londisa nzila yi ni no mbi tshumela ni wuya ngu yona.