Jobe 15 - Bhiblia Yo Sawuleka

MABHULO A WUMBIDI (Sipimo sa 15 kala 21 ) Kuwombawomba ka wumbidi ka Elifazi Awe u wombawombisa tiya ngu mhaka ya txionho txako

¹ Sekoko Elifazi Mutemani a to xamula, a txi khene:

² Ina txhari yi nga dhuka yi ninga xamulo ngu wuzivi wa moya kani? Niku yi nga tata mrumbu wa yona ngu moya wa wutxani kani?

³ Yi ti kona ngu mapswi ma si vhuniko txilo, ni ditshuri di si dinganiko kulondolwa kani?

⁴ Awe wa maha ti to kuthava ku si vhuni txilo, u hungula sikombelo masoni ka Txizimu,

⁵ nguko txisofu txako txa nuwela wubihi wako; na kuve awe u sawute lidimi a titxhari.

⁶ Txisofu txako txa ku kona, na i si nga ani; kambe sisofu sako si ni wufakazi wo kuwukela.

⁷ Ina u ngava u ti wamwamna wo khata kuvelekwa awe kani? Ni ku mwendo u vangilwe ku si se vaho mimango kani?

⁸ Mwendo u pfite txilayelo txa txihunja txa Txizimu, mwendo u gwitetwe ngu wutxhari kani?

⁹ Nji txani u txi zivako awe hi nga si txi zivi athu kani? U ziva txani txa kuva txi singaho kwathu kani?

¹⁰ Kambe vaho kwathu vale vokumba vo kumba ngutu, vo kumba kupinda tate wako.

¹¹ Ina mwendo kuthavelela ka Txizimu ngudotho kani? Niku mwendo to kari ta timeleka kwako kani?

¹² Ngu kutxani yi gulekako mbilu yako, niku u tsopetisela maso ako ngu kutxani kani?

¹³ Moya wako wu tshuralela Txizimu ngu kutxani, se u leka mapswi o ngeto me huma ngu mkanani kwako kani?

¹⁴ Njitxani m'thu, konaza eva a di sawulekile kani? Ni ti taku awule a velekwako ngu wamsikati, eva wo lulama kani?

¹⁵ Wonani taku, nga thembisa kutxani vasawuleki va txona, hambi nzuma yi nga mbi sawuleka masoni ka txona.

¹⁶ Ti mahisa kutxani taku m'thu e ti nyenyezisa ni kuva ni manyala, e sela wubihi ku nga mati kani?

M'bihi, a xaniseka kuhanyani kwakwe kotshe

¹⁷ Ni engise, ni na kukombisa; kambe a ti ni nga ti wona, ni na kugeletela;

¹⁸ atile ti nga wombwa ngu sizivi, ni tile si nga tipfa ka vatate va sona kha sa malala nato

¹⁹ (i ku vale va nga ti ningela mafuni, kambe ni wammweyo wa hahanze kha nga maneka hagari kwawe):

²⁰ Otshe masiku m'bihi wa ti khawulisa apune, malembe a mtengo wa wudotho ma veketwe m'thu wa tshofu.

²¹ Diguwa da tihuwa di tinzeveni kwakwe; hambi mu ko thutha, wata kwakwe mxaseli.

²² Kha tumeli taku a na huma ngu txidemani, na kuve wa verelwa ngu ditxhari.

²³ A peperukela e tsimbila e lava dipawu, a txi khene: Di hani kani? Wa tiziva kha kwati taku, ditshiku da txidema di hafuhi.

²⁴ Mtsudi wa kuxaniseka ni xomulo wa mfenengeta; kufana ni mfumeli wo longela ku yalwa.

²⁵ Nguko a nawulutile dianza dakwe e wukela Txizimu, e henyela wule wa Mtamo-wotshe.

²⁶ E kuluveta kuyela Txizimu ngu wulala, na a di ni siholoma sa sitxhavangu sakwe.

²⁷ A maheto a di lemile khohe yakwe ngu mafura, se e khura ha koza e huma ni m'bhwese.

²⁸ Se a to ya zumba ka madhoropa o xaselwa, ka tinyumba tile ni wammweyo a nga si zumbi ka tona, ti zile ti maha marumbi.

²⁹ Kha yi na mbi tala, hambi kulaphisa mbimo thomba takwe, mwendo kuanda ha mafuni asile si mlumbako.

³⁰ Kha na mbi huluka txidema; m'dhikila wa mndilo wu na omisa sile si thungako, se ngu kufuteta ka Txizimu, yi na hangalaka.

³¹ A nga thembe ta wugwili wakwe, e ti kanganyisa apune, nguko wukanganisi i nava hakhelo yakwe.

³² Yona yi na guma di si se hoka ditshiku da kona; se didhavi da kona kha di na mbi tshumela di nakana.

³³ Mauvha a kona ma na mbambamela i di ngadi mambisu, kufana ni a muuvha wo wisetela siluva nga muolivha.

³⁴ Nguko kutala ka vaxengeteli ku na maneka i di kusavala, mndilo wu na tshokomisa matenda a wuxaveleli.

³⁵ Va ni sirumbu sa mthumo wo veleka wubihi, se tindani kwawe kululamisela wukanganyisi.