Jobe 12 - Bhiblia Yo Sawuleka

Xamulo ya Jobe ka vangana vakwe Nani na tiziva tona eto

¹ Sekoko Jobe a to xamula, a txi khene:

² Kha ditshuri nganu mokha mi ku vathu, kambe wutxhari wanu mi na fa nawo.

³ Nani ni ni mbilu yo fana ni yanu, kha ni nga wam'dotho kwanu; se i mani a si tiziviko timhaka to nga eto kani?

⁴ Ani ni txisekiso ka vangana vangu; ani na dhana Txizimu, se txona txa ni xamula; wamnene ni wo lulama vo maha sisekiso.

⁵ Ene njisase txa txisekiso, masoni ka vo zumbiseka, awule mikondo yakwe yi ku hafuhi ni kuphariyetwa.

⁶ Matenda a vaxaseli ma humute; kambe vale va lwisako Txizimu kha va tsani; Txizimu txa va ninga sotshe manzani kwawe.

Sihari si na m'gondisa

⁷ Se hi nga wotisa koko ka sihari, tximwetxo ni tximwetxo txi na kugondisa; ni ka sinyana sa nzuma, sona si na kuzivisa;

⁸ mwendo u womba-womba ni mafu, ona ma na kugondisa; hambi sihaka sa linene si na kuxawutela.

⁹ I mani asi ti pimiko totshe tiya, taku dianza da Mkoma di mahile tiya,

¹⁰ ni ti to mihefemulo ya sotshe si si hanyako, ni moya wa votshe vathu, si manzani ka Tizimu kani?

¹¹ Ina nzeve kha yi na kuxola mapswi, nga mkanani kupfako sakudya kani?

Txizimu txa wisa, txa xula, ni kukhundumusa

¹² Wutxhari wu maneka ka vahombe, se ni mapimo ngu kutala ka masiku.

¹³ Txizimu txi ni wutxhari ni mtamo; txi ni wudhota ni mapimo.

¹⁴ Wona taku txi txi khundumusa, kha ku aketwi; ni ka wule txi mtsivelako kha ku na mbi tulwa.

¹⁵ Txizimu txa emisa mati, ku txi oma; se txi txi ma tulela, ma onhetela mafu.

¹⁶ Mtamo ni wutxhari si ka Txizimu; mbwa Txizimu, wule a onhako, ni wule a onhisako.

¹⁷ Txa teka madhota na ma di handilwe, ni valamuli txa va xangisa.

¹⁸ Txizimu txa txhatxha tingoti ta tikathula ta vafumeli, txi sunga siwunu sawe ngu libhandi.

¹⁹ Txizimu txa teka vathangeli va di handilwe; vanyamitamo txa va thidhelisa.

²⁰ Ka vale vo thembeka, txa thavisa dipswi, txi tshumetela mapimo vale vo kumba.

²¹ Txa theketa kutxhipa txitimwi ka vathangeli, txo dheseta siwunu sa va mtamo.

²² Txizimu txa kombisa kutshima ka txidema, se txi tisa mtsudi wa lifo kuwonekelani.

²³ Txa andisa vathu, txi gwita txi va lovisa; txa hangalasa matiko txi tshumela txi ma wuyisa.

²⁴ Txa thavisa timbilu ta vathanglei va vathu va ha mafuni, txi va peperukisela siwulani, ko pwata nzila.

²⁵ Txidemani va tsimbila va txi mbumbutela, ngu kupwata liwoningo, se va txi dhedherekela nga madevi.