Jobe 10 - Bhiblia Yo Sawuleka

Ni na phofula

¹ Dihika dangu da swihala ngu wutomi wangu; ni na laphisa mbimo ni txi ti tsetsa, ni na womba-womba kupandisekani ka muhefemulo wangu.

² Ni na khani ka Txizimu: U nga ni sunge; ni gele ati ulwako ni nani ngu tona.

³ Ta kudingana kha kwati ku ni xanisa, u lamba mthumo wa manza ako u woningeta txitimwi ka dibanza da vo biha kani?

⁴ Ina u nga va ni maso a nyama kani? Awe u wonisa tonti a wonisako tona m'thu kani?

⁵ Ina masiku ako mo fana ni masiku a m'thu kani? Mwendo malembe ako ma fana ni malembe a m'thu,

⁶ kuva u ziva wubihi wangu, ni kuxola sionho sangu kani?

⁷ Awe wa tiziva ngu kumweko taku, ani kha ni nga m'bihi; kambe kha nga ho ni wammweyo wa ku ni thavisa manzani kwako.

U na ni maha niva lithulu

⁸ Manza ako ma ni vangile, me ni rendeleta; kambe ona ma ni fuvisa.

⁹ Ni kombela taku u alakanya tito, ngako ni ku dibumba, u ni rendeletile, ni ti to u na ni tshumeta ni ya lithuluni.

¹⁰ Ina eko khwa ni kutula kufana ni masi, ni ku ni bangisa nga tximbwanda kani?

¹¹ U ni ambekile ngu nyama ni didhowo, se ngu marambu ni misiha u ni tsanisile.

¹² U ni ningile wutomi ni tithomba; kambe wumbilu wako wu xayisile moya wangu.

¹³ Aniko totshe tiya u ti sisile mbiluni kwako; ani na tiziva kha kwati taku, totshe tiya ti ti ti kwako.

¹⁴ Ngako ni txi onha, awe wa ni wona; ka wubihi wangu, khu na mbi ni divalela.

¹⁵ Ni di muonhi, dikhombo kwangu! Ni di mlulami, kha ni na mbi guleta msungo; ni taletwe ngu tingana, se na wona wusiwana wangu.

¹⁶ Nguko ni txo guleta msungo, awe wa ni xota ku nga ngonyamo ya tshofu, wa tshumela u maha sixamaliso so ni wukela.

¹⁷ Awe wa lotela tifakazi tako ku ti txi ni wukela, kambe wa engetela txiviti txako kwangu; wa wuyeletela ku ni xanisa.

Awe Txizimu, ni leke ngu kuthutha!

¹⁸ Ngu kutxani koko u nga ni humisa mndani ka mame kani? O! I tiku moya wu ti ko ni ninga tito, ni maso ma sa ni wona!

¹⁹ Sekoko ti mahekisile ku nga kha ti zivi kumaheka; se nga ni ti khukhete mndani ni ya dithithani!

²⁰ Ina masiku angu hi nga madotho kani? Ema koko, u ni leka, kasi ku ni na mana kuhumula ka kudotho;

²¹ ni sanzi kutsula do gwita, da kuva ni si wuyi kambe, mafuni ka txidema ni mtsudini ka lifo;

²² mafuni ko kidiva nga txidema txipune, mafu a mtsudi wa lifo, kambe ma singako ni txhatxhameto ni ya yimweyo, emo liwoningo li fanako ni txidema.