ULukha 24 - iBhayibhili Elingcwele 1978

Ukuvuka kukaJesu

¹ Kodwa ngosuku lokuqala lweviki, emadabukakusa, bafika elibeni bephethe amakha ababewalungisile.

² Bafumana ilitshe ligiqiwe elibeni.

³ Kuthe bengena, kabasifumananga isidumbu seNkosi uJesu.

⁴ Kwathi besadidekile ngalokhu, amadoda amabili ema labo, embethe ingubo ezicwazimulayo.

⁵ Besaba, bakhangela phansi; amadoda athi kubo: Lifunelani ophilayo kwabafileyo na?

⁶ Khumbulani ukukhuluma kwakhe kini eseseGalili,

⁷ esithi: INdodana yomuntu imele ukunikelwa ezandleni zabantu abayizoni, ibethelwe, ivuke ngosuku lwesithathu.

⁸ Basebewakhumbula amazwi akhe.

⁹ Sebebuyile bevela elibeni, babika konke lokhu kwabalitshumi lanye lakubo bonke abanye.

¹⁰ KwakunguMariya Magadalena, loJowana, loMariya unina kaJakobe; labanye ababekanye labo babatshela abaphostoli lokhu.

¹¹ Kodwa lawomazwi aba njengokukhuluma okuyize kibo, kabaze bawakholwa.[

¹² Kodwa uPetro wasuka, wagijimela elibeni, wakhothama, wakhangela phakathi, wabona amalembu ewodwa; wabuyela ekhaya emangele ngokwenzekileyo.]

Abafundi abaya eEmawusi

¹³ Ngalona lolosuku ababili babo babehamba, besiya emzini othiwa yiEmawusi, ongaba ngamakhilomitha alitshumi kusukela eJerusalema.

¹⁴ Babekhulumisana ngazo zonke lezizinto ezenzekileyo.

¹⁵ Besakhulumisana bebuzana, uJesu uqobo wasondela kibo, wahamba kanye labo;

¹⁶ kodwa amehlo abo ayebambekile ukuba bangamazi.

¹⁷ Wasesithi kubo: Yizindaba bani elikhulumisana ngazo lihamba na? Basebesima bedanile.

¹⁸ Omunye wabo, othiwa nguKleyopha, wamphendula wathi: Wena nguwe wedwa isihambi eJerusalema ongazaziyo izinto ezenzekileyo kulezinsuku na?

¹⁹ Wathi kubo: Yizinto bani na? Bathi kuye: NgoJesu waseNazaretha obengumprofethi olamandla ngemisebenzi langelizwi phambi kukaNkulunkulu lasebantwini bonke,

²⁰ ukuthi abapristi abakhulu lababusi bethu bamnikela ukuba agwetshelwe ukufa, abethelwe.

²¹ Kodwa thina besithemba ukuthi nguye obezakukhulula uIsrayeli; kodwa phezu kwakho konke lokhu sekulusuku lwesithathu lezozinto zenzakele.

²² Njalo abesifazana abathile basimangalisile, bebeyile elibeni ekuseni,

²³ kuthe bengasifumani isidumbu sakhe, babuya besithi babonile lombono wezithunywa ezithe uyaphila.

²⁴ Labathile bakithi baya elibeni, bafumana kunjalo njengokutsho kwabesifazana, kodwa yena uqobo kabambonanga.

²⁵ Wasesithi kibo: O lina elingelakuqedisisa elilenhliziyo ezivilaphela ukukholwa konke lokho okwatshiwo ngabaprofethi!

²⁶ UKristu ubengamele yini ukuba ahlupheke ngalezizinto, anduba angene ebukhosini bakhe na?

²⁷ Esusela kuMose lakubo bonke abaprofethi, wabachasisela emibhalweni yonke izinto eziqondene laye.

²⁸ Basebesondela emzini ababesiya kuwo; yena watshaya kungathi udlulela phambili.

²⁹ Kodwa bamncenga kakhulu, besithi: Hlala lathi, ngoba sekuzakuhlwa, lemini isiyedlule. Wangenake, wahlala labo.

³⁰ Kwathi esehlezi ekudleni, wathatha isinkwa, wabonga, wasihlephuna, wabanika.

³¹ Amehlo abo avuleka, basebemazi; wanyamalala kibo.

³² Bakhulumisana besithi: Inhliziyo zethu bezingavuthi yini phakathi kwethu, lapho ekhuluma lathi endleleni, lalapho esivulela imibhalo na?

³³ Basebesuka ngasona lesosikhathi, babuyela eJerusalema; bafumana abalitshumi lanye lababelabo bebuthene ndawonye,

³⁴ besithi: Impela iNkosi ivukile, ibonakele kuSimoni.

³⁵ Basebelandisa labo okwenzekileyo endleleni, lokuthi bayazi kanjani ekuhlephuneni isinkwa.

Ukuzibonakalisa kukaJesu kubafundi bakhe

³⁶ Besakhuluma lokho, uJesu uqobo wema phakathi kwabo.

³⁷ Kodwa batshaywa luvalo, besaba besithi babona isipuku.

³⁸ Wasesithi kubo: Likhathazekelani, kuveleleni imibuzo enhliziyweni zenu na?

³⁹ Khangelani izandla zami lenyawo zami, lazi ukuthi yimi uqobo; lingibambe, libone, ngoba isipuku kasilanyama lamathambo njengoba lingibona ngilakho. [

⁴⁰ Esekutshilo lokho wabatshengisa izandla zakhe lenyawo zakhe.]

⁴¹ Kodwa bengakholwa ngenxa yentokozo, bemangala, wathi kibo: Lilakho ukudla lapha na?

⁴² Bamnika iqatha lenhlanzi ephekiweyo.

⁴³ Walithatha, walidla phambi kwabo.

⁴⁴ Wasesithi kibo: Yila amazwi ami engawakhuluma kini ngiseselani okuthi: Kumele ukuba kugcwaliseke konke okwalotshwa ngami emlayweni kaMose, lakubaprofethi, lakumahubo.

⁴⁵ Wasevula ingqondo zabo, ukuze baqedisise imibhalo.

⁴⁶ Wathi kibo: Kulotshiwe ngokunje ukuthi uKristu uzakuhlupheka, avuke kwabafileyo ngosuku lwesithathu,

⁴⁷ kutshunyayelwe ebizweni lakhe ukuphenduka, lokuthethelelwa kwezono ezizweni zonke, kuqalwe eJerusalema.

⁴⁸ Linake lingofakazi balezizinto.

⁴⁹ Khangelani, ngiyathumela kini isithembiso sikaBaba; kodwa hlalani emzini, lize lambathiswe amandla avela phezulu.

Ukwenyuka kukaJesu

⁵⁰ Wasebathatha ephuma labo, baze bafika ngaseBethani, ephakamisa izandla zakhe, wababusisa.

⁵¹ Kwathi esababusisa, wehlukana labo, wenyuselwa ezulwini.

⁵² Babuyela eJerusalema, belokuthokoza okukhulu.

⁵³ Babekhona ethempelini njalo bemdumisa uNkulunkulu.