YONA 4 - Kalate Zambe Nnomo a Mfefe Mfefé Nkôñelan

Zambe a ko bôte ya Ninive éngôngo

¹ Ane Yôna a nga wô'ô *njaman Nti a nga jamé bôte ya Ninive *abé a dañe yaa.

² Ane a nga ye'elane Nti a jô nye na: Éé a Nti! ye sa jam me nga jô di éyoñ me mbe si jam? Jam ébien é nga tindi ma na me ke Tarsis nde ñhe di: Me nga yeme na ô ne Zambe a ne *mvam a ñwô'ane bôt mintaé, ôte'etek ya yaa, njalan a *njaman, nyô a wô'ô jôban *abé a te kômesane na a bo.

³ Eyoñ ji a Nti, a ntoo ve nyoñ ényiñe jam: amu ma yene awu mvaé a dañ'ényiñ.

⁴ Ane Nti a nga yalan nye na: Ye wo bo mvaé ane wo yaa'

⁵ Ane Yôna a nga kôlô tison a ke tabe mfa'a jôp da tôô tison. Ane a nga lôñe émien ébem, a tabe si e vôm évôvoé é mbe, a yange'e yen jam da ye kui tison Ninive.

⁶ Ane Zambe Nti a nga kôm élé bek é faa a yaé Yôna e nlô yôp a ve nye évôvoé a vaa ôlun ô mbe nye *nlem: nde a nga dañe vak, amu élé be'e te.

⁷ Tyé kpwaa, éyoñ éfufup ja taté faé nde Zambe a nga kôme fos, ane é nga di be'e nyô: nde é nga mane kôt.

⁸ Eyoñe jôp é nga tô'ô, Zambe a nga lôme beta évuñulu a too ayôñ, a so'o e jôp da tôô; ane ayôñe jôp é nga jimbi Yôna e nlô, nde atek é nga bi nye, ane a nga ku si, a nga sili na a wu, nye na: Awu é ne ma mvaé a dañe ényiñ.

⁹ Ane Zambe a nga sili Yôna na: Ye wo bo mvaé ane wo yaa amu ajô élé bek? Yôna na: Ma bo mvaé ane ma yaa, a jeñe awu.

¹⁰ Nde Nti a nga jô Yôna na: Wo wô'ô ôlun ajô élé bek nje ô nji nyoñe nju'u éziñ nge yale kik, é nga faa alu da a kôte fe alu da.

¹¹ Ve wo kômbô na me bo te wô'ô ôlun ajô Ninive, a ko nye éngôngo, beta tison ate, vôm bôt ba nyiñ a lôte toyini ntet a mewôm mebaé be too te yeme kandé mbo nnôm a mbo ngal, avale te fe bizu'u biyem.