YOANES 17 - Kalate Zambe Nnomo a Mfefe Mfefé Nkôñelan

Beta meye'elan me Yésus

¹ Eyoñe Yésus a maneya kobô mejô mete, ane a nga bete mis e yôp a jô na: A Tat, awolo e kpwaneya. Wumulu'u Mone wôé, Nyômone ki a wumulu wo;

² aval ô nga ve nye ngule ya jôô bôte, e nde te bôte bese, ô nga ve nye a ve be ényiñ ya melu mese.

³ Enyiñe ya melu mese ki é ne na bôt be yeme wo na wo étam ô ne nya Zambee, be yeme fe nyôô nga lôm, nye a ne Yésus Krist.

⁴ Me nga ve wo duma e *si nyô, amu me maneya sondô ésaé ô nga ve me na me bo.

⁵ Ve éyoñe jina ki, a Tat, womien wumulu'u ma a duma me nga tame bi be wo valé *si nyô é ngenan te bo.

⁶ Me nga bo na e bôte ô nga ve ma e si ndône mu be yeme jôé dôé. Be mbe émbôé, e nde ô nga ve me be, ane be nga ba'ale ajô dôé.

⁷ Eyoñe ji be yemeya na mam mese ô nga ve ma ma so fo'o be wo.

⁸ Amu na mejô ô nga kalane ma me nga kalane be me, ane be fe be nga nyoñe me a yeme bebela na mamien me nga so be wo, a be nga buni fe na wo fo'o ô nga lôme ma.

⁹ Ma ye'elan asu dap, me nji ye'elan asu si ndôn, fo'o ve asu bôt ô nga ve ma, amu be ne émbôé,

¹⁰ a biôme biam bi ne émbiôé, a émbiôé bi ne émbiam, a ma nyoñe duma e be bôte bete.

¹¹ Mfa'a wom, me nji fe bo e si ndône mu, ve be be ne e si ndôn, amu ma zu be wo. A Tate ô ne Mfufup, ba'ale'e be a jôé dôé, di ô nga ve ma, nde be bo jôme jia aval ane bia wo bi né.

¹² Eyoñe me nga too bia be be, me nga ba'ale be a jôé dôé, di ô nga ve ma, a me nga kamane be, a wua éziñe ya be be a nji jañ, sesale ve mone ya njañ, ane jam e ne ntilan da ye tôéban.

¹³ Eyoñe ji ma zu be wo, a ma kobô mam ma e si ndône mu ane be ne bi ava'a dam njalane e be be ne lut.

¹⁴ Me nga mane ve be mejô môé, ane *si nyô é nga wô'ô be biko, amu be nji bo bôte ya si mu, aval fe mamien me nji bo môte ya si ndôn.

¹⁵ Me nji ye'elane wo na ô vaa be e si ndôn, ve na ô ba'ale be, amu Mbia Môt a ne.

¹⁶ Be nji bo bôte ya si ndôn, aval fe mamien me nji bo môte ya si ndôn.

¹⁷ Tune be a benya mejôô. Mejô môé me ne bebela.

¹⁸ Aval ane ô nga lôme ma e *si nyô, nalé ate fe me nga lôme be e *si nyô.

¹⁹ A ma ve mamien ane metuna'a asu dap, na be fe be ve bebien ane metuna'a e bebela été.

²⁰ Me nji ye'elane wo ve asu bana étam, ma ye'elane fe asu ba bese ba ye buni ma amu mejô map,

²¹ ane be bese be ne bo jôm jijia, aval ane wo, a Tat, ô nee be ma, a ma fe e be wo, e nde be fe be bo jôm jia e be bia éyoñe te si ndôn ja ye buni na wo fo'o ô nga lôme ma.

²² E duma ô nga ve ma, ma fe ma ve be de na be bo jôme jia aval ane bia wo bi ne jôme jia.

²³ Ma e be be, a wo fe e be ma, nalé ba ye tu'a bo jôme jia, ajô te si ndôn ja ye yeme na wo fo'o ô nga lôme ma, a ô nga nye'e be avale fe ô nga nye'e ma.

²⁴ A Tat, ba ô nga ve ma, ma yi na e vôm me too be fe be tabe valé bia be be, ane ba ye yen étôto'o jam mamien, nje ô nga ve ma amu ô nga nye'e ma *si nyô é ngenan te boban.

²⁵ A Tate ô ne *zôsôô, *si nyô é nji yeme wo, ve ma me nga yeme wo, a bana fe be nga yeme na wo fo'o ô nga lôme ma.

²⁶ Me nga mane bo na be yeme jôé dôé, a ma ye ke ôsu a bo na be yeme de, nalé ate nye'an ô nga nye'e ma wo ye tabe be be a mamiene fe e be be.