YOANES 11 - Kalate Zambe Nnomo a Mfefe Mfefé Nkôñelan

Yésus a wômôlô Lazar

¹ Môt éziñ a mbe a konôk, e Lazar ya Bétani, e jal Marie baa monyañe wé Martha.

² Marie ate a mbe minga a nga wo'o Nti mbone menyum a fimine nye mebo a ésile ya nlô wé, ndôme minga ate, Lazar, e nje é mbe é konôk.

³ Ane bekale be nga lôme nye mbañete na: A Nti, yeme na nyômvôé a kon.

⁴ Awô'ô Yésus a nga wô'ô nalé, nye na: Okon ôte ô nji bo ôkon awu, ô ne asu Duma Zambe, ane Mone Zambe a ye nyoñe duma été.

⁵ Yésus a mbe a nyeke'e Martha baa monyañ a Lazar.

⁶ Eyoñe ñhe Yésus a maneya wô'ô na a kon, e nde a nga beta tabe vôm ate tañe melu mebaé,

⁷ e mvuse valé ane a nga jô beyé'é bé na: E nkelan, bi bulan e Yudé.

⁸ Beyé'é ki be nga jô nye na: A Rabbi, ke beyude be ndôme jeñ ana'ana na ba lume wo *mekok, éyoñe te wo téé na wo beta ke wôé'

⁹ Ane Yésus a nga yalane na: Ye *mewolo me nji bo awôm a mebaé e ngumba *môs? Nge môt a wulu a *môs, a ye bo te kolé ôbak, amu a wulu a yene éfufub ya *si nyô.

¹⁰ Nge môt a wulu a alu, a kolé ôbak, amu éfufub é nji bo be nye.

¹¹ Eyoñ a maneya kobô mejô mete, mvus éte nje a zu jô be na: Mvôé jam Lazar, a ne ôyo; ma ke vele nye ôyo.

¹² Ane beyé'é be nga jô nye na: A Nti, nge a ne ôyo, ke a ye ñhe nyiñ.

¹³ Yésus nye a mbe a jô'ô na a wuya, be ke be buni'i na a kobô ajô zezé nya ôyoo.

¹⁴ Eyoñe te ñhe Yésus a zu kate be ne ngeññ na: Lazar a wuya,

¹⁵ ve ma yene de mvaé asu denan na mi buni'i, amu me nji ke tabe wôé. Nkelane ñhe vôm a né.

¹⁶ Ane Thomas nye ba loone Didime a nga jô beébe beyé'é na: Bia fe nkelan, bia be nye bi ke wu.

Yésus Nwômôlô bôt a ényiñ

¹⁷ Ake ñhe Yésus a nga ke kui, a kooé na a mbôô soñ melu menyin.

¹⁸ Bétani baa Yérusalém be mbe fo'o zañ bebé tañe kiliméta éla.

¹⁹ Beyude abui be nga ke fe tabe Martha baa Marie ébeñese na be volô be minlem ajô awu ndôme jap.

²⁰ Eyoñe Martha a wô'ôya na Yésus a zu, e nde a nga ke tôbane nye. Marie ki a li'i a to si e *nda.

²¹ E nde ñhe Martha a nga jô Yésus na: A Nti, nge ô to tabe va, ve nge ndôme jam é nji ke wu.

²² Ve, éyoñ ébiene ji, ma yeme fe na e jôm ése ô ne sili Zambe, Zambe a ye ve wo je.

²³ Ane Yésus a nga jô na: Nyo ndôm a ye wômô.

²⁴ E nde Martha a nga jô nye na: Ma yeme fo'o na a ye wômô éyoñe ñwômane ya môse wo su'ulan.

²⁵ Ane Yésus a nga jô nye na: Ma me ne ñwômôlô, me to fe ényiñ. E môt a buni ma, ja'ane a wu, a ye nyiñ,

²⁶ a môt ase a nyiñ a buni'i ma, a se ngule ya wu nnôm éto. Ye wo buni jame te'

²⁷ E nde a nga jô Yésus na: Owé, a Nti, me buniya ayab na wo ô ne Krist Mone Zambe, e nye a zuya e si ndône mu.

Yésus a yi

²⁸ Aman a nga mane kobô nalé, e nde a nga ke loone Marie monyañ wé a la'a nye ôfôfoé na: Nye'ele a ntoo va, a loone wo.

²⁹ Eyoñe nye ki a wô'ôya nalé, ane a nga kôlô si ne vup, a ke mfa'a a mbe.

³⁰ Valé Yésus a ngenane teke kui e nlam, a ngenane ve vôme Martha a nga ke tôbane nye.

³¹ E Beyude baa be Marie be nga too e *nda été valé na ba ve nye ayôñe nyô, ayene be nga yen ane a kôlô si avôl avô a kui atan, be nga ke ba tôñe nye, be si'ako na a ke soñ na a ke yôn.

³² Eyoñe Marie a nga kui e vôme Yésus a mbe, ayen a nga yene nye, ane a nga bibane si e mebo mé été a jô'ô nye na: A Nti, nge ô nga ye tabe va, ve ndôme jam é nji ke ye wu.

³³ Eyoñe Yésus a yeneya ane a yôn, Beyude baa be nye be nga zu nsamba be fe be yônôk, ane *nlem ô nga tôlé nye abum, a nga fô'ôban

³⁴ a jô na: Mi nga jame nye vé? E nde ba jô nye na: A Nti, za'a yen.

³⁵ Ane Yésus a nga yi.

³⁶ Beyude be nga ke ba jô na: Mi lôô abim avé a mbe a nyeke'e nye!

³⁷ Bôte bevo'o ya été ki ba ke ba kobô na: E ne môt a nga bo ndindime na mise me yombô nye, a nga kate bo aya na môte nyô a bo te wu'

Lazar a bulan ényiñ

³⁸ E nde *nlem ô nga beta tôlé Yésus, ane a nga téé a ke e soñ. Soñ éte é mbe mbas akôm, akok e butu été yôp.

³⁹ Ane Yésus a nga jô na: Feneka'an akok! Ane Martha, kale môt a nga wu a zu jô nye na: A Nti, ke a nga nyum, amu k'a wu den melu menyin.

⁴⁰ Ane Yésus a nga jô nye na: Ye me nji kate wo na nge wo buni wo ye yene duma Zambe'

⁴¹ E nde ñhe be nga vaa akok. Ane Yésus a nga bete mise yôb a jô na: A Tat, ma ve wo akéva, amu ô wô'ôya ma.

⁴² Me ma zu ma yeme na wo wô'ô ma kom ése, ma te kobô kobô ve asu ba bôtô a tele me mbôma'ane nyôl na be buni fo'o na wo fo'o ô nga lôme ma.

⁴³ Eyoñ a maneya kobô mame ma, ane a nga yôtane tyiñe yôb ngu a jô na: A Lazar, kui atan!

⁴⁴ Ane môt a nga wu a nga kui atan, mo a mebo nka'an a bibab biyé, ndombo é to nye ñyalan asu. E nde Yésus a nga jô be na: Ti'ane nye biôme nyôl, mi jô'é fe nye a ke.

Emo'o ya wôé Yésus

⁴⁵ Abui ba Beyude be nga zu be Marie, éyoñe be yeneya mame Yésus a nga bo, be nga buni nye.

⁴⁶ Ane bevo'o ya été be nga ke yene Befarizieñ a mane kañete be mame Yésus a nga bo.

⁴⁷ E nde Minlô Betuni baa Befarizieñ be nga bañete Ekôane Bôbenen a jô na: Bia ye bo aya, e môte nyô a bo'ok abim abui bitua bi mame di'

⁴⁸ Nge bia jô'é nye nalé, bôte bese ba ye buni nye, éyoñe te bôte ya Rôm ba ye so, be mane wôlé afôla si dangan a ayoñe bôte dangan.

⁴⁹ Ane môte wua ya be be, Kayifa, Nlô Betuni ya mbu ôte, a nga jô be na: Mi nji fo'o yeme jam éziñ.

⁵⁰ Ye miaa simesane ke na, e ne mia mfi nge môte wua wua nye a wu asu babôtô, a lôte na ngum ayoñe bôt ôse ô jañ'

⁵¹ A nji kobô jame te e so'o be émien, ve amu e nye a mbe Nlô Betuni ya mbu ôte, e nde a nga kobô a kulu mejô na Yésus a ye wu asu ayoñe bôt,

⁵² sake ve awu ya asu ayoñe bôt étam, a ye fe bo na, e bone be Zambe be nga mane tyamelan, a tôkane be a bo be jôme jia.

⁵³ Ataté *môs ôte, bôte bete be nga bu ñhe fe'e ya wôé nye.

⁵⁴ Yésus a nto teke fe beta wulu éngengeñ, e Beyude été, e nde ñhe a nga kôlô valé, a ke e jal e mbe afane bebé, e tison ba loone na Efrayim, a ntoo wé, baa beyé'é bé.

⁵⁵ Valé Pak Beyude a nto bebé, ane bôte abui be nga téé dulu be so'o mefôla ya si éte ôsusua Pak, a bet a ke e Yérusalém na ba ke fubu bebien.

⁵⁶ E bôte be mbe e Nda Zambe été be nga jeñe ñhe Yésus e mis, ba ke ba kobô e zañe jab na: Mia simesan aya? Ye a ye fo'o zu abôk ye momo'

⁵⁷ Bivet betuni a Befarizieñ ki be nga mane ve abendé na nge môt éziñ *a yem e vôm a né, a kula'ane de, be bi nye.