Yd 8 - Kalate Zambe Nnomo a Mfefe Mfefé Nkôñelan

Yudit a yené e be beteb'ôsu y'ayoñ

¹ Melu mete, biduñ bi nga kui e be Yudit. A mbe ngone Merari, e mona Ok, e mona Yôsep, e mona Oziél, e mona Hélkia, e mona Anani, e mona Gédéon, e mona Rafayin, e mona Akitôb, e mona Elie, e mona Kélkias, e mona Eliab, e mona Natanaél, e mona Salamiél, e mona Sarasadayi, e mona Israél.

² E nnôme wé a mbe Manassé, ayoñe dé a e *nda bôte jé, nye a nga wu melu ba kôane mefes bidi.

³ A mbe a fombô'ô ésaé bedutu mimbom mefes bidi ba bo e nje'ese; ayôñe jôb da di'an e nga jimbi nye nlô, e nde a nga bômbô si ve wu e tisone jé Bétuli. Be nga jame nye e vôme mesoñ b'ésaa me né, afub e ne zañe Dôtayim a Balamon.

⁴ Yudit a mbe a too e *nda jé valé, a li'iya nkus mimbu mila a ngon ényin.

⁵ A nga lôñe mone *nda andile ya *nda jé yôp; a mbe a jaaé nkuta angeteñe dé, a mbe fe a jaaé mengômesane me nkuse mé.

⁶ E mimôse mise ya éto nkuse jé a mbe a tyii bidi, ô vaa ve e mimôs mi Sabat a e mi mi tya'a mie mvus e meté me ngon a mimôs mi tya'a me mvus, e biyoñe *mebôk a mimôse mevak mi *nda bôt Israél.

⁷ A mbe abeñ éyoñ wo yene nye, a bili fe mbamba éyeka'a. Manasé e nnôme wé a nga li'i nye mvot, argent, bebo bisaé befam a binga, biyem a mefup, a mbe fe a too e biôme bié été.

⁸ Teke môt éziñ a mbe asu ya bo mfu'u ékobôkobô ajô dé, amu a mbe a dañe ko Zambe woñ.

⁹ Zô'é ya nkobô ébiasé bôt be nga kobô évet é nga kui be nye, amu be mbe mbiban amu njembane mendim. Zô'é ya mam mese Ozias a nga kobô be é nga kui fe be Yudit, éyoñ a nga kalane na a ye ve tison e be bôte ya Asiri mvuse melu metan.

¹⁰ Eyoñ a lômeya mbo ésaé minga wé, nyô a nga yiane li'i éli'i jé, nde a nga loon Ozias, Kabvis a Karmis, bemvendé ya tison.

Nkobô Yudit

¹¹ Be nga zu e *nda jé a nye ke a nga jô be na: Vô'ôla'ane ma a mia bivete bi bôt be too Bétuli, amu nkobô mi maneya kobô ô nji bo *zôsôô be bôt e môse wu, éyoñ mia te kalane minkale mite e zañe Zambe a mia, a kobô ajô ya kalane tison e be besiñe bangan, nge, e mvuse melu metan, Nti a bo te lôme mia mvolan.

¹² Eyoñe ji, mi ne beza, e mia mi maneya bôbôlô Zambe den a mi tele éjiane Zambe, ézezañe bone be bôt'

¹³ Eyoñe ji mi futiya Nti a ne ngul ése e *meve'ele été, ve teke bebé na, mia ye yeme jam.

¹⁴ Amu teke *zen mia ye yeme bido'o ya nleme môt nge tu'a wôk mimfasane ya atyeñe dé. Ngumane ke na mia soñolô e Zambe a nga bo biôme bite bise, ye mia ye yem ôsimesane wé nge wôk nta'ane mame wé? Momo, a bobejañ, te boone na Nti, e Zambe wongan a wô'ôlun.

¹⁵ Amu nge a nji bi nkômbane ya volô bia, e mvuse melu metan, ve a bili nguleya kamane bia éyoñ a kômbô, nge jiane bia ôsu be besiñe bangan.

¹⁶ Ve mia, te mia futi miabebien bikoé *tyiñ a tebe nta'ane mame Nti, e Zambe wongan e ngame yat, amu Zambe a nji bo ane môt na be ndômetane nye, nge ane mona môte na be tyi'i nye ajô.

¹⁷ Ajô te nté bia yange nyian wo so be nye, nlo'one nye na a volô bia a a ye wô'ô tyiñe jangan, nge a yene nalé mvaé.

¹⁸ Amu a nji yené e melu ya miaé miangan, a e dene nyô, teke ayoñ nge *nda bôt nge mvôk, nge tison éziñe ya be bia ja kañe azezambe e ne mboon a mo me môt, avale e nga kui melu kôa.

¹⁹ Amu nalé nye b'ésaa bangan be nga keeban e kpwaté mekôn, e nsa a besiñe bangan be nga dañe be bita.

²⁰ Ve bia bi nji tame yem ôzezambe ve Nye. Ajô te ndi é ne bia na a ye bo te yene bia *abé a a ye bo te vaa mvame jé a e nyiane wé e be ayoñe dé.

²¹ Amu nge ba nyoñe bia, Yudé ase fe a ye nyoñeban, vôme wongan a ne ntelan étyi a ye saaban a Zambe, e nkulane metyi été, a ye jô mesôñ ya ndaman étyi wé.

²² A ye bo na awu bobejañe bangan, nkeane minkôme ya si jangan a ôsame ngab éli'i jangan, bi ku bia e minlô, e *meyoñ bikul été e vôm bia ye bo belo. Bia ye bo ékolé ôbak a jôm ôson ôsu ya bewosane bangan.

²³ Amu éto *ôlo jangan ja ye bo te dutu betibili bangane na be mvamane bia, ve Nti, nyô a ne Zambe, a ye kôñelane jame te ôsame.

²⁴ Ajô te ñhe, a bobejañ, nlita'ane bobejañ éyoñ jina na ényiñe jap é tii be bia, na vôm a n'étyi, *nda Zambe a ata'a metuna'a bi bete be bia.

²⁵ Jam afe dina na, mva'ane Nti, e Zambe wongan akéva, e nyô a ve'ele bia avale a nga bo b'ésaa bangan.

²⁶ Simesa'ane mam mese a nga bo a Abraham, a abim avé a nga ve'ele Izak, a mam mese me nga kui Yakob e Mézôpôtami ya Siri, éyoñ a mbe a ba'ale'e mintômba mi Laban ndôme nyia.

²⁷ Amu avale a nga ve'ele be asu ya yemelan minleme miap, avale te fe a nji kun émiene be bia. Ve Nti a bôm e ba bese ba subu nye bebé asu ya lume be tumu.

²⁸ Ane Ozias a nga yalane nye na: E mam mese ô maneya jô ma wô'é a teke môt éziñ aa ye jô aval afe.

²⁹ Saa ke ve den étam e nye fe'e jôé ja yené. Aso mongô bôte bese ba yem fe'e jôé a bebela ya mintyi'ane miôé.

³⁰ Ve valé bôt be nga ye wu a évé; be nga yemete na bi bo avale bi nga jô be, a bi mbe ntindan ya tiñeti biabien ékoé *tyiñ, a nkanane ngana bi se nguleya tyam.

³¹ Ajô te ñhe ye'ela'ane Nti ajô dangan, amu ô ne e minga *a nye'e mame ya mbunan, ndemben a ye noo bia mveñ. Bilaba'a biangan bia ye jaé, a bia ye kôlô ôlun été.

³² Yudit a nga jô be na: Vô'ôla'ane ma: Ma zu bo e jame mvoñe bôte jangan ja ye wô'ô be kobô'ô ajô y'été, ataté miaé wu a kui wu ôvok.

³³ Teba'an e *mbé ya tison alu da zu di, a suu na bia mbo ésaé minga wom bi kui atan. Te na éyoñ mi nga tiñeti asu ya kalane tison e be besiñe bangan é kpwaan, Nti a ye zu volô Israél a bela'ane ma.

³⁴ Ve mia ye bo te jeñe na mi yem mimboone miam, amu ma ye bo te jô mia jam éziñ v'akekui e jame ma bo e maneya.

³⁵ E nde Ozias baa be bemvendé be nga jô nye na: Kele *mvo'é a e Nti, Nyô a ne Zambe a tebe'e wo ôsu a kune bia e be besiñe bangan.

³⁶ Eyoñe be kôlôya *nda éndelé Yudit, be nga bulan e mesu bita map.