Yd 6 - Kalate Zambe Nnomo a Mfefe Mfefé Nkôñelan

¹ Eyoñe zu'uzu'u ya bôt be mbe be bôma'ane émo'o a nga man, Hôlôfern, évet ôsu nkane bita ya Asiri, a nga jô Akior, beyeñ bese ya nsa'a mañ a bebialé bialé bese ya Môab be too na:

² Mi ne beza, wo Akior a mia, mi ne nkuaban e be Efrayim ane mia mane bo bia nkulane mejô avale dina den, a jô bia na bi bo teke wosane ayoñ Israél amu na e Zambe wob a ye kamane be? Za a ne Zambe ye saa Nébukatnétzar? E nye a ye lôme ngule jé a mane jiane be *si nyô a e Zambe wop aa ye ke kôté be.

³ Ve bia, bebo bisaé bé, bia ye bibi be ane môte wua a baa ye ke jibi ngule ya bikabela biañgan.

⁴ Amu bia ye di'i be lubu lubu; minkôle miap mia ye so'o metyi map a minje'ese miap mia ye jaé a miñwuane miap. Abo si ya mekule mebo map daa ye ke bi ngu ôsu viangan, ve ba ye wu *abé awu, nalé Nébukatnétzar, masa ya *si nyô ése a jô; amu a jôya a *minkobô mié miaa ye ke bo zezé bifia.

⁵ Ve wo, Akior, mone bezimbi Amon amu moné, e wo wo te kobô *minkobô mite e môse wo bene njôan, ataté den, wo ye bo te beta yen asu dam, akekui me kuneya mamien e be ayoñ é nga tub Ejipte te.

⁶ Nalé ate étyé ya minsamba miam a akoñe bivete bezimbi dam bia ye tulan e memvaé môé, a wo ye ku e bôt be ne mbalan été, éyoñe ma ye so.

⁷ Bebo bisaé bam ba ye kee wo éfuse si minkôl a li'i wo e tisone jia ya meyo me nkôle mé.

⁸ Wo ye bo te wu te na be jiane wo mia be be.

⁹ Amu wo buni, e nleme wôé été na, ba ye bo te bili, asu dôé e bo'o te bili atek. Me kobôya a teke da ya mejô mam da ye bo te bo jam da yiane bo.

¹⁰ Hôlôfern a nga bendé bebo bisaé bé be nga tele e *nda éndelé jé na be bi Akior be kee nye e Bétuli a ve nye e mo me bone be Israél.

¹¹ Ane bebo bisaé bé be nga bi nye a kee nye atane ya minkan, mfa'a ya nje'ese; akôlô ya valé be nga ke mfa'a minkôle mi né a kui bebé menjeñ me mbe Bétuli si.

¹² Eyoñe be nga yene befame ya tison é ne abôbône nkôl, be nga nyoñe mengale map a kui atane ya tison é ne abôbône nkôl; befam bese be bili betoloo, be nga kamane be na be bo te bet a be mbe be wu'a be *mekok.

¹³ Eyoñe be Sendéya e nkôle si be nga ka'a Akior, be li'i a bôô e nkôle si a ke e be Masa wop.

¹⁴ Ve bone be Israél be nga siliki be so'o tisone jab a kui e be Akior; éyoñe be tiiya nye ngata'a, be nga kee nye e Bétuli a liti nye bivete ya tisone jap.

¹⁵ Bivete ya melu mete bi mbe na: Ozias e mona Mika ya mvô'ô Siméoñ, Kabri e mona Otôniel ya Karmis e mona Melkiel.

¹⁶ Be nga bañete bemvendé bese ya tison; bisoé bendôman a binga be nga zu mimbil. Nde ba telé Akior ézezañe bôte bese a Ozias a nga sili nye jam é nga bo.

¹⁷ Eyalane jé été, a nga kate be mam me nga koban éso'o Hôlôfern, mam mese a nga jô ézezañe bivete bi bone ya Asiri a beta be mam bese a nga jô me wosa'ane *nda bôt Israél.

¹⁸ Ane ayoñ Israél e nga kute meboñe si a kañe Zambe be yôta'ane na:

¹⁹ A Nti, Zambe ya yôp, yenek abim ébiasé be né; koo ôsame wongan éngôngo a yene mesu ya ba be ne émbôé e môse wu.

²⁰ Be nga volô Akior *nlem a se'e nye vevea nse'an.

²¹ Ozias a nga nyoñe nye ékôan été a kee nye e *nda jé a bo bemvendé beta dina. Ngum alu ôse be nga loon e Zambe Israél.