Yd 16 - Kalate Zambe Nnomo a Mfefe Mfefé Nkôñelan

¹ Ane Yudit a nga jô na: Yi'ane Zambe wome bia a mengom, yi'ane Nti bia a bizan biwoé, kômane mfefé Sam ya lu'u nye, fula'ane sam a jia asu dé, wumela'an a loone jôé dé!

² Amu Nti a ne e Zambe a tyame bita; a nga vule minkane mié ézezañe ya bôte bé, asu ya wôlé ma e mo besiñe bam.

³ Asiri a nga siliki a so'o minkôle y'akôé, a nga zu a b'akutu ya nsamba mewosane wé. Jama bôte wé a nga ye'e atôñ, bikabela biab bi nga yiane minkô.

⁴ Be mbe be kobô'ô ajô ya futi si jame nduan, ajô ya wôé bisoé bi bôte biam a nkpwaté mekôn, ajô ya wua benyañbéé bame si, ajô ya ve bone bam e nsa, a bengo be binga bam abom.

⁵ Ve Nti a ne Ngul Ese a nga kamane be de a wo minga.

⁶ Amu mbene wob ô nji ku ôsu bisoé bendôman, sake bone mimfône mi bôt mbe be nga wôé nye, nge *meyabe me bôt ma buni mebien mme me nga tya'a nye, ve Yudit, ngone Merari, nye a nga wôlé nye mengaa a abeñe y'asu dé.

⁷ A nga vaa ngômesane meyebe jé asu ya ve bewô'ôlune y'Israél ngule nyô, a nga wo'o beôlobinda asu dé,

⁸ a nga solé ésile jé e ntôme si, a nga jaé ézingi léñ asu ya wone nye.

⁹ Silifase wé a nga ve mise mé avak, abeñe dé e nga bi nleme wé nkôm a nyamele ôtyeñ a nga tyi'i nye *tyiñ!

¹⁰ Beperse be nga nyeñeban amu ayo'o dé a Beméde be nga tabe bivô amu ngule nleme jé.

¹¹ Eyoñe te bôte bam ba sili bebiene si be nga yôn a be be nga ko woñ, mintete'e miam mi nga bam, a woñ ô nga bi be; be nga bete metyiñe mabe yôp a be be nga bulane mvus.

¹² Aval ane *bon b'ayôme binga, be nga wôé be, a aval ane *bon ba kôñelan a tub a ke ngame yat, be nga lume be mekoñ a wôé be. Be nga tub ane mintetek a mane wu e mewosane me Nti wom!

¹³ Ma zu yia Zambe wome mfefé jia. A Nti, ô n'anen, ô n'étôtok, ô n'étua e ngule jôé été a nyô be se nguleya dañ.

¹⁴ Jôm ése ô nga té é bo'o wo bisaé! Amu ô nga jô a biôme bi vee bi nga boban, ô nga lôme mvebe wôé ane bi nga lôñeban, a môt éziñ a se nguleya tebe tyiñe jôé ngame yat.

¹⁵ Ye minkôl mia ye bulekan a fulan a mendim, ye mekôm ma ye nyeme ane nkone wôé ôsu viôé' Wo ye beta yené mvaé ve be ba ba ko wo woñ.

¹⁶ Ya! Mvean ô ne mbamba menyum ô ne te ke mfañe jôm, e be Nti, avoñ ba di'i wo ane mvean ô ne ngumba nde da beta dañe dañ; ve nyô a ko Nti woñ a ne beta môt éyoñ ése.

¹⁷ Bidim a meyoñe biku ma tebe a wosan ayoñe dam! Nti a ne Ngul Ese a ye ve me melep e môse ntyi'ane mejô. A ye lôme nduan a minsoñ e minsône miab été a ba ye yôn a mintaé nnôm éto.

¹⁸ Eyoñe be nga kui Yérusalem, bese be nga kumbu asu Zambe a éyoñe bôt be maneya tuneban, be nga ve mimveane miab mia di'ibane ngumba, mimvean miab mi ne ane *nlem wo kômbô, a mimveane mevale meva.

¹⁹ Ane Yudit a nga telé biôme bi Hôlôfern bise bôt be nga ve nye étyi asu Zambe, nalé fe bindelé émien a nga to'é énoñe jé.

²⁰ Bôt be nga fôn ôsu ya Nda Zambe, e Yérusalem, tañe ngon élaa, Yudit a nga tabe ba be be.

Asu'ulan y'ényiñ Yudit

²¹ Eyoñe te é lôteya, ane môt ase a nga bulan e vôme wé. Yudit a nga bulan e Bétuli a tabe été e *nda jé. Eyoñ a nga vee, a nga wum e si ése.

²² Abui bôt e nga sili nye aluk, v'a nji yeme môt melu mese y'ényiñe jé, ataté éyoñe nnôme wé Manasé a nga wu a ke kui mfa'a a mbe nlatan a bôte bé.

²³ Duma dé e nga dañe dañe nen nté a nga bo nyamôtô e *nda nnôm wé. A nga kui mimbu ntet a mitan. A nga ve mbo ésaé minga wé éto fili jé, wôna a nga wu e Bétuli a jambe e mbas akok vôme nnôme wé Manasé a mbe a woko'on.

²⁴ Ayoñ Israél e nga bo abô'ô y'awu dé tañe melu zamgbwa. A ngenane te wu, a nga kab akume dé e zañe bivuvuman bi nnôme wé Manasé a émbié bibien.

²⁵ Teke môt a nga tyelé bôte y'Israél minleme yôb melu me Yudit a ayab éyoñe fe e mvus awu dé.