Yd 13 - Kalate Zambe Nnomo a Mfefe Mfefé Nkôñelan

¹ Eyoñ alu e ntoo abui, bivete bezimbi bi nga bo avôle ya ke. Bagôas a nga dibe *nda éndelé mfa'a y'atan, a koone na a maneya kuli ba bese be nga too été atan be kôlô Masa wé fefe. Be nga ke bômbô si nte'an amu nyuan bilam a dañe nné,

² a Yudit a nga li'i étam ba Hôlôfern, nkuan énoñe jé, mbilane bilam.

³ Yudit nyee mbo ésaé minga wé na a tebe atan, bebé a étune *nda ba bômbô a yange'e nkuane wé aval a mbe a bo'o *môs ôse. A nga bo fe atyeñe ya jô na a ye kui asu meye'elane mé a a nga kobô fe Bagôas avale da.

⁴ Bese be nga mane kôlô be Hôlôfern a te ke môt, nyô a ne anen, nge tyôtyoé, a nga li'i étune *nda ba bômbô. Yudit a nga jô émien été a tele fefel énoñe na: A Nti, Zambe a ne ngul ése, awolo di, bo'o ésaé ya mo mam tyi'ibi asu duma Yérusalem.

⁵ Eyoñe ji nje é ne éyoñe ya bulane nyoñ éli'i jôé, a tôé minkômbane miam asu ya ko'o besiñ be tebeya na ba wosane bia.

⁶ Ve subu ôsu mfa'a mbôñ énoñ ô né bebé nlô Hôlôfern, ve tii nyamele ôtyeñ wé,

⁷ a subu bebé a énoñ ve bi ésile môte nyô a jô na: Bo'o me na me bo ngu e môse wu, a Nti, e Zambe Israél!

⁸ Nd'a nga ba'é nye biyoñ bibaé *tyiñ a ngule jé ése a tyi'i nye nlô.

⁹ Wôna a nga bi'iti nyôl ôyab a énoñ a vaa bindelé bi nga tii mekôn. Ôbe aboñ ô lôteya, a nga kui atan a kee mbo ésaé minga wé nlô Hôlôfern,

¹⁰ nye ve futi wô e mfe'e bidi été a bebaane bese be nga kui atane minkan avale be mbe be bo'ok asu ya ke ye'elan. Nné ane be nga mane tyi'ilane minkan, be nga tyiñelan ésalak, be bete nkôle Bétuli a kui mimbé.

Yudit a soo nlô Hôlôfern e Bétuli

¹¹ A tele ôyap, Yudit a nga yôtane beba'ale mimbé: Di'an, di'ane *mbé! Amu Nti, e Zambe wongan, a ngenane be bia asu ya bo bitua bi mam Israél été a liti ngule jé e be besiñe bangan aval a boya môse wu.

¹² Eyoñe bôte ya tison be nga wô'ô tyiñe jé, be nga bo avôle ya sis e *mbé ya tisone jab a loone bemvendé.

¹³ Ataté mone môt a kui beta môt, bôte bese be nga zu mimbi amu be nji yange nsoone wé. Ane be nga diine *mbé, be nga nyoñe binga bete bebaé a kôbane nduan mfa'a ya yene be a bômane be.

¹⁴ Yudit a nga jô be tyiñe yôbe na: Kañane Zambe! Kañane nye! Kañane Zambe, a nji vaa mvame jé be *nda bôt Israél, ve a bu'uya besiñe bangan alu di a wo wom.

¹⁵ Ve vaa nlô e mfe'e wé été a liti be wô: Nlô Hôlôfern évet asuzo'o ya nkane mewosan y'Asiri ñwô wu, a bindelé a nga bôô e mbilane bilame wé été mbie bi! Nti a bibiya nye a wo minga!

¹⁶ Nti a tabe'e nnôm éto, nyô a te ba'ale ma ésaé jam été! Amu asu dam da te wone môt ate v'asu njañane wé. A nji bo *abé a ma, asu ôsone viam a nsilibane si wom.

¹⁷ Amu beta mfô'ane minlem a nga bi bôt, nde bese be nga kumbu si mfa'a ya kañe Zambe, be yôta'ane tyiñe jia na: Ebotan a wo, a Zambe wongan, wo ô boya besiñ be bôte bôé momo môse wu!

¹⁸ Ozias ve jô Yudit éyoñe jé na: A wo ngo jam, Zambe a n'ôyabe yôp, a bota'ane wo a dañe binga bese ya si nyô; a Nti nyô a ne Zambe, a bo'o ébotan, nyô a nga té yôb a si, nyô a maneya wulu wo na ô tyi'i nlô évete ya besiñe bangan!

¹⁹ Teke na ndi *nlem ô maneya liti éve'ela ja ye tyamban e *nsisim bôt; ve ba ye simesane ngule Zambe nnôm éto.

²⁰ Zambe a bo'o na ô wume nnôm éto a toyini mvaé a bo'o ma'ane môé, amu ô nji ke ye'e ényiñe jôé éyoñe mvoñe bôte jangan é tôbaneya ôsame, ve ô boya na njañane wongan ô ke bia ôyap amu ñwulane *zôsôô asu Zambe. Bôte bese be nga yalane na: Amen! Amen!