Yd 12 - Kalate Zambe Nnomo a Mfefe Mfefé Nkôñelan

¹ A nga bo na Yudit a nyiin e vôme bisua bi argent bié bi mbe, a bo na be ve nye bidi bié a ve fe nye ngabe ya woone wé na a nyu.

² Ve Yudit a nga jô na: Ma ye tabe ntyele na me di, e za bo mfa'a wom, zene ya kop. Jôme ma te soo je, ja ye yiane ma.

³ Hôlôfern nye na: Nge nga'abane jôé ja man, bia ye bo nguleya ve wo avale te vé? Môte y'ayoñe denan a nji bo be bia va.

⁴ Tabe'e *mvo'é a Monti! Ma, mbo ésaé minga wôé, ma ye bo te mane di nga'abane jam ése te na Nti a belane ma asu ya tôé asimesane dé!

⁵ Ane beba'ale yate Hôlôfern be nga kee nye e *nda éndelé jé e vôm a nga ke ôyo a kui zañ alu. Eyoñe ndibe tyé ô nga subu bebé, a nga kôlô si.

⁶ A nga lôme môt a ke jô Hôlôfern na: Monti a kañese'e bendé na be suu mbo ésaé minga wé a kui atan asu meye'elan,

⁷ Ane Hôlôfern a nga jô beba'ale bé na be bo te kamane nye. A nga tabe e yat été valé melu melaa. A mbe a kuik a alu mfa'a ésala'a Bétuli a woba'ane ki anjeñ mfa'a vaa bezimbi a mbe.

⁸ Eyoñ a bulan, a mbe a ye'ela'ane Nti e Zambe Israél na a wulu e jam a kômbô bo asu ya bete bone y'ayoñe dé si.

⁹ Eyoñ a maneya tuneban, a mbe a bula'an a tebe e *nda éndelé jé a kui éyoñe ba soo nye bidi bié mamengô'é.

Yudit e dina be Hôlôfern

¹⁰ E môse nyini, Hôlôfern a nga bo beta dina, a nga bañete ve bivete bezimbi bié, ba ya mesu bisaé momo été.

¹¹ A nga jô Bagôas, *miak ô mbe ô bale'e mame mé na: Kele ñhe bo na ngone Beyude é ne be wo, é kañese zu bia be nye bi di a nyu nsamba wua.

¹² Da ye bo ôsone mfa'a wongane na, bi suu avale minga di e ke, bia be be te folane mam. Nge bia bo te kui vôm a ne bo nye na a zu, ba ye fo'o woé bia.

¹³ Nde Bagôas a nga kôlô e be Hôlôfern a kui atan, a nyiin e be Yudit, nye na: Ye ésoé abeñe ji ja ye ñhe fo'o kañese zu be Masa wom te yange? A ye tabe éto duma ba nye be lôane mesu, bia be nye bia ye nyu woone mevak, a bo émiene den nyô a ne wua bengone y'Asiri be ne *nda njô bôte Nébukatnétzar.

¹⁴ Yudit a nga yalane na: Me ne ñhe za ane me ne tabe me lôô Monti, wom asu? Jam ese da ye bo mvaé e mise mé, ma ye bo de avôl a jame te da ye bo jame mevak mfa'a wom a kui môse y'awu dam!

¹⁵ A nga kôlô si a jaé mengômesan a mimbote mi nyanga binga mié mise, mbo ésaé minga wé a mbe nye ôsu a taa ékôbe tite si ndôba'ane mesu mesu a Hôlôfern, nje Bagôas a nga ve Yudit asu mebelane mé ya môse te, ane a ne nguleya tab'été na a di.

¹⁶ Yudit a nga nyiin a tabe si. Ane *nlem Hôlôfern ô nga nyô'ôé, njalan a mevak amu nye, a nsisime wé ô nga kpwemetan, vuñe ngu a ju'ulan; ngule nkômbane ya fulane nye é nga bi nye, amu ataté *môs a nga yene nye, a mbe a jeñek mbamba éyoñ asu ya wone nye.

¹⁷ Nde a jô nye na: Nya'a ñhe! Kaba'an ava'a dangan!

¹⁸ Ma nyu teke ben a Monti, amu na ane me bialé, me ngenane te yen ényiñe mvaé ve môse wu!

¹⁹ Ve nyoñe jôme mbo ésaé minga wé a nga yame nye, ve di a nyu asu Hôlôfern.

²⁰ Hôlôfern a nga dutuban a bili a ayase dé, ajô te a nga nyu woon abim a nji tame nyu *môs éziñ y'ényiñe jé.