Yd 11 - Kalate Zambe Nnomo a Mfefe Mfefé Nkôñelan

Yudit a Hôlôfern ba laan éyoñ ôsu

¹ Hôlôfern a nga jô nye na: Tabe'e ndi, a minga, te ko jôm éziñe woñ. Me ngenane te bo môt a tobeya na a saane Nébukatnétzar njôô ya si ése *abé.

² Eyoñe jina ébien, nge bôte bôé be too minkô be nji ye biasé ma, me nji ye bete akoñ a wosane be. Bebien mbe be nga yi nalé.

³ Ve kate ma, amu jé ô nga tube be a zu be bia? Ve da, nalé a ne nyiane wôé! Bo'o ayo'o *nlem! Alu ya dene di da ye beta yene wo ô vee a bôte bevo'o fe!

⁴ Teke môt a ye bo wo *abé, kelek! Ve ba ye belane wo *mvo'é, avale da boban a bebo bisaé be Masa wom, njô bôte Nébukatnétzar.

⁵ Yudit nye na: Tame jibi nyoñe nkobô *ôlo viôé *mvo'é a na mbo ésaé minga wôé a bo nguleya kobô ôsu viôé. Alu di ma ye bo te kobô minsos miziñ asu Masa wom.

⁶ Tame tôñ v'asimesane mbo ésaé minga wôé, a Zambe a ye wulu jame dôé e mane *mvo'é. Nti wom a ye bo te ku e mame mé a bo été.

⁷ Enyiñe Nébukatnétzar é bo'o ayap, nyô a ne njôô ya si ése, nyô a lômeya wo na ô sôane *nsisim ôse e nya zene, a ngule jé é tabe'e nnôm éto! Amu na, amu wo, saa ve bôt étam mbe ba saane nye, ve a minkumutu ya ngule jôé betite ya fé fe, mimbame betit a anone ya yôp, bia ye nyiñ asu Nébukatnétzar a asu *nda jé ése!

⁸ Bi nga wô'ô fo'o be kobô'ô ajô ya mvean ô ne be wo a mefo'o ya nsisime wôé. Si ése ja yeme na, e ngum éjôé ôse, ô n'éwôlô, ngum avale kum mfa'a ya mam wo yem, mfa'a ñwulane mam ya bita.

⁹ Nalé fe na, bia yeme nkobô Akior a nga kobô émo'o jôé été. Mbôlô bôte ya Bétuli be nga nyii nye, nde a nga kate be mam mese a nga jô wo.

¹⁰ Ajô te, a Masa a Monti, te bi mejô mé éngbwemese, ve ba'ale'e me éyoñ ése e nsisime wôé été, amu me ne bebela. E ne fo'o na mvoñe bôte jangan ja ye bo te tôbane *melep, nkpwaté mekôn wo ye bo te bo bone bé jam, vengevenge ve ba bo e Zambe wob *abé.

¹¹ Ve, e ne na, éyoñ ébien ji, nge Monti a nji kômbô ku nge biban, awu da ye silane be minlô, amu *abé e biya be, *abé te da bete ayaa Zambe wop yôp éyoñ ése ba ve bebien e nzametane mam.

¹² Nté ane bidi bi jembane be, a mendime ke ayaé ya yené, be tyi'iya na ba wôé betit ya mimbame miabe a belane jôm ése Zambe a kaman e metiñe mé été na be bo te di.

¹³ Teke jôm éziñ ja li'i, nje be nji tyi'i na ba di: Bembômô be nlisi, *ngab awômô woon a mbon, biôme ba ba'ale asu betuni be tele asu Zambe wongan e Yérusalem. V'e too ke na môt éziñ y'ayoñ a nji bi nguleya nambe biôme bite, ja'ane a mo.

¹⁴ Jam afe da bebe été yôbe na: Be lômeya bôt e Yérusalem na, be zuu be nkañesane e b'ékôane bemvendé, ane be fe be ne bo avale daa ane bôte bese.

¹⁵ Jame da ye kui be nde di: Nné ane nkañesan wo ye so a be taté na ba bo wô ésaé, môse te ôbien, ba ye vebane be wo asu njañe wop.

¹⁶ Eyoñe ma, mbo ésaé minga wôé, me wô'ôya mam mete mese, me nga tub me kôlô'ô be be. Zambe a lômeya ma na bia wo bi bo mame si ése ja ye kam, ba bese ba ye wô'ô foé nkañete ya mam mete.

¹⁷ Ve daa, *ôlo wôé ô ne mvebane ngum e be Zambe ya yôp, ma bo nye ésaé a kañe nye alu ba *môs. Nde ma ma kômbô na, me tabe fefele jôé, a Monti. Ma, mbo ésaé minga wôé, ma ye kui a alu a ye'elane Zambe ésalak été, nalé a ye bo me na, me yem éyoñ évé ba ye mane bo *abé dap.

¹⁸ Mvus éte ma ye bulane zu kate wo, nalé wo ye kui a nkane bita wôé ôse a teke wua ya be be a ye bo ngu asu dôé.

¹⁹ Ma ye wulu wo e Yudé ase a bo na ô kui ôsu Yérusalem. A ma ye bo na ô telé éto njôane jôé e teme tison été. Eyoñe te wo ye wuluu be ane mintômba mi ne te mba'ale, ja'ane mvu éziñ ja ye bo te yené mfa'a ya bam ôsu viôé. Me nga wô'ôtane mam mete mese ôsusua, be nga kate ma me ane e ne nlômane na me kulane wo me.

²⁰ Hôlôfern a beba'ale yate jé be nga wô'ô nkobô minga ate mvaé, amu be nga kame fe'e jé, nde be nga yôtane na:

²¹ Ataté aku'u si di a kui di avok, avale minga di e ne momo, étua abeñ a éjijin.

²² Hôlôfern a nga jô nye na: Zambe a nga yeme bo na a lôme wo ôsu y'ayoñ. Ngul ja ye bo e mo mangan, a njañ wo ye bo e be ba be nga biasé Masa wom.

²³ Mfa'a wôé aval ô n'abeñ, nde fe ô n'atyeñ e *minkobô miôé été. Nge wo bo avale wo te jô, e Zambe wôé a ye bo Zambe wom, a wo wo ye tabe e *nda njô bôte Nébukatnétzar, a wo ye nyoñe duma e si ése.