Yd 10 - Kalate Zambe Nnomo a Mfefe Mfefé Nkôñelan

Yudit a ke be Hôlôfern

¹ Avale te nde Yudit a nga yône be Zambee Israél. Amané meye'elan,

² ve kôlô éjô'ôba mbia ôlun a nga bôô bubutu, ve loone mbo ésaé minga wé, ve ke e *nda a mbe a tabe'e melu me *sabat a *mebôk.

³ E *nda été wé, ve vaa nkuta ô nga yalé nye nyô a vaa fe mengômesane meyep, a nga wobane mendim a ôlobinda a ne beta tañ, a mane vasé nlô, a jaé ntôm a mengômesane mevak a mbe a jaék éyoñe Manasé, nnôme wé a nga vee.

⁴ A nga jaé besilefase bé, minsanga mié, bilondo bié, adô'ô dé, bivônga bié, biôme bi nyanga bié bise a nga bo na a yené abeñ abim a mbe nguleya bo na a wone mise me bôt ma ye yene nye.

⁵ Mvus éte a nga ve mbo ésaé minga wé nde'e woon a vie'e mbon, a nga jalé mfek a biwôlé bi avute fôn, biwôlé bibuma bi ne nkôt a belet é ne *mfuban, ve kalane nye nga'aban éte ése ndutane mbom.

⁶ Nde be nga kui mfa'a *mbé ba loone Bétuli. Be nga koone Ôzias wé baa bemvendé bebaé ya tison môé na Kabris a Karmis.

⁷ Eyoñe be nga yene Yudit asu nkôñelan a mengômesane ntyendan, abeñe dé e nga bo be na be dañe tebe menyu me yoo, éfia momo. Nde ba jô na:

⁸ E Zambe b'ésaa bangan a telé'é wo e mvame jé été! A bo'o na asimesane dôé e tôéban asu duma bone b'Israél a duma Yérusalem!

⁹ Yudit a nga kañe Zambe a jô be na: Bo'one na be dii ma *mbé ya tison, me kui atan a tôé miñyiane mise mi ndôme tote me valé. Ane be nga bendé bisoé beba'ale *mbé na be dii nye wô aval a nga sili.

¹⁰ Be ve bo mewôk a Yudit a nga kui atan baa mbo ésaé minga wé, bôte ya tison be nga lôô nye nté ôse a nga siliki nkô a kui a nga dañe mone mbi'ili. Mvus éte be nji fe beta yene nye.

¹¹ Mbôlô be mbe be wulu'u *zôsôô ôsu viap, e mone mbili'i été, nde ba koone bezimbi y'Asiri be tele vaa ôsu,

¹² éyoñe be biya Yudit, bee nye na: O ne ngame fé? Wo so vé? Wo ke vé? Nye na: Me ne ngone Beyude, ma tube be, amu ba ye bo bidi bienan ana'ana.

¹³ Mfa'a wom, me zuya yen Hôlôfern, asuzo'o ya nkane mewosane wônan, mfa'a ya kate nye e mam a yiane yem me ne bebela. Ma ye liti nye e *zen a yiane lôt asu ya nyoñe nkôl ôse teke dimili môte wua nge ényiñe jia.

¹⁴ Eyoñe be nga wôk ane a kobô, bôt be mbe be fombô'ô nye fe'e ne vema, amu étua abeñ be nga yene nye;

¹⁵ be nga jô nye na, ke nzuane wo te zu ôsu a siliki na ô yene masa wongan ô nyiiya wo! Kele ñhe koone nye e *nda éndelé jé été, bôte b'éziñe ya be bia mbe ba, na be li'itane wo a kee wo e mo mé.

¹⁶ Nné ane wo ye teb'asu dé, te ko jôm éziñe woñ. Ba'ala'ane kate nye jam ô ndôme jô bia, a ye belane wo *mvo'é.

¹⁷ Nde ñhe be nga kandé ntete ya bôte bap, be ve fulane nye a mbo ésaé minga wé nsamba a kee be e *nda éndelé Hôlôfern.

¹⁸ Amu foé ya nsoone wé é nga mialan e menda bindelé, nde éngengam é nga bo e minkane mise. A ngenan atane ya *nda éndelé Hôlôfern a yange'e na foé ya nsoone wé é kateban, a koo kooé na bôte be bômaneya nye njiñelete.

¹⁹ Bôt be nji kate nye'e ba yene nye a kam abeñe dé, a su'ulane fe nye'e bôte ya Israél amu nye. E mbe e jô'ôba'an a minyamete mise na: Za ñhe a ne beta biasé ayoñe bôt e bili mevale me binga ma? Da ye bo te yené atyeñe mboone na fame jia y'été é li'i tetele! Bôte ba ye nyiñ be ne nguleya wone ngume si ôse!

²⁰ Ane bezimbi ba ba'ale Hôlôfern a ba ba ba'ale yate jé be nga kui a nyiñeli Yudit e *nda éndelé été.

²¹ Hôlôfern a mbe a woko'on a bôô énoñ é too mbôma'ane ntendé a to mboon a édima évele éndelé, ñyañane nyanga a mvot, a émérôd a bidima meko'o bife.

²² Nde ba kate nye ajô Yudit, ane a nga kui atan a tebe e mon andil a mbe e *mbé yôbe ya *nda éndelé, bebe'e belambe be argent be kele nye ôsu.

²³ Eyoñe Yudit a tabeya ézezañ asuzo'o a bezimbi ba ba'ale yate jé, abeñe y'asu dé e nga kpwé bese mvuk. A nga ku si bubutu ôsu vié. Ve bebo bisaé be nga bete nye si.