Yd 1 - Kalate Zambe Nnomo a Mfefe Mfefé Nkôñelan

Bita bi Nébukatnétzar baa Arfasad

¹ Mame ya mbu awôm a baa, éjôé Nébukatnétzar e môt a nga jôô bôt y'Asiri e beta tisone ya Ninive, éyoñe melu Arfasad, e môt a nga jôô bôte ya Médie e Ekbatan.

² Arfasad ate a nga lôñ beta akak a mbaane *mekok mbôma'ane a tison Ekbatan, ndam ako'o da, tañe meta jia a étun, nté ki, bebé meta éla. A nga bete aka'a meko'o te yôb tañe meta mewôm melal a jia a étun, ndam y'été ke tañe meta mewôm mebaé a ébaé a étun.

³ E mimbé mi akak, a nga telé beta minkum e menda yôb tañe meta mewôm menyiin a étaan, mbôka'a ki ndam tañe meta mewôm mebaé a zamgbwa.

⁴ Nté nkôñ ya mimbé mibien ô mbe meta mewôm melal a jia a étun, ndam ki meta awôm a muam, asu nlôta'ane minsamba bezimbi mia ye bo mi sela'an, mi mi be'e biôm mewosan a mi mia wosan mi wulu'u si.

⁵ Melu mete mme njôô bôt Nébukatnétzar a nga tya'a njôô bôt Arfasad bita e vôm si é mbe nje'ese, afôla te e to e si ya Ragawu.

⁶ Ane bôte bese be nga ke lat a nye, e bôte be too e minkôle minkô, a ba be mbe be too biwom bi asôé ya Efrat, Tigre a Hidasepa, a ba ya nje'ese mesi ya be Ariyok, njôô bôte bone ya Elima. Meyoñ me bôt abui me nga mane zu tôkan na ba zu volô luman bone be Kelewud bita.

⁷ Ane Nébukatnétzar, njôô bone ya Asiri a nga lôme bôt, be ke yen bôte bese ya si Pers, a ba bese ya mfa'a jôb da dim, e bôte ya si Silisi, a Damas, e Libañ baa Antiliban e ba bese be too ékôte mañ,

⁸ e bôte bese be ne e ngab bôte ya Karmel, a Galaad, a Galilé ya akôé, a nje'ese si ya Esdreloñ,

⁹ e bôte bese ya si Samari a bitisone bié, a kindi'i Yordane yat akekui Yérusalem, Batané a Kélus, a Kades, a beta ôsôé ya Ejipte, Tafnes a Ramses a si ése ya Gésem,

¹⁰ akelekui mfa'a Tanis a Memfis ya yat, e bôte bese be too si ya Ejipte akekui nnéé si ya Etiôpi.

¹¹ Ve bôte bese ya si ése be nga biasé nkobô Nébukatnétzar, njôô bôt bone ya Asiri, a be nji ke late nsamba mewosane wua baa be nye, amu be nji bo be koo nye woñ. E nde bese tyiñe jia be nga ben mejô mé a bulane bôte bé a mvus, ve mo ve mebo, ôson a mise mese.

¹² Ane Nébukatnétzar a nga wô'ô si ésese'e angôndô ôlun. A kane fe bebela, e jôé éto njôô jé a si ébien a jôô na, a ye kun émien a ndaman meku'u me si mese ya Silisi, a Damas a Siri, a na a ye wôé a nkpwaté mekône wé, e bôte bese ya Môab, a bone b'Ammon, éfuse si ése ya Yudé, a bôte bese ya Ejipte akekui nnéé si ya mañ mebaane.

¹³ E nde ñhe a nga ta'a minkane bita mié nsamba na a ke wosan njôô bôt Arfasad e mbu awôm a zamgbwale. Ane a nga dañe nye ngu e bita bite, a tulu fe nkane bita Arfasad e fé e bezimbi bese ba wosan be wulu'u a mebo, a ba bese ya bemetua yôp.

¹⁴ E nde a nga mane nyoñe be bitison, akekui Ekbatan, a nyoñé minkum menda ya été, a mane sa biôme ya minseñ, e jôm ése é ne abeñ été, a mane je kôñelan ôson ôson.

¹⁵ Ane a nga bi Arfasad e minkôl ya Pagawu, a mane tulane nye a mekoñ mé mebien a jañele nye ékok ajañ ajañ.

¹⁶ E nde a nga beta ke so baa be be a zu kui e Ninive, a nye a nsamba wé, e beta ébubua nkunda bôte mewosane bé. Ane be nga tame tabe valé, be woka'an a di biôm, nye émien a nkane bita wé, tañe melu ntet a mewôm mebaé.