YAKOB 3 - Kalate Zambe Nnomo a Mfefe Mfefé Nkôñelan

Beye'ele be ba'ale'e ôyeme viap

¹ A bobejañe bam, te boone beye'ele abui, amu mia yeme na ntyi'an ajô wongan wo ye dañe bo ngu.

² Amu bia bese bia kob abui. Nge môt éziñ a bo te kop a nkobô, nyôlé a ne étua mbamba môt, nyô a ne nguleya bi ngume nyôle wé ngbwak.

³ Nge bia tiñeti bityé e menyu bikabela na bi wô'ô bia, bi jôôya fe ngume nyôle wop.

⁴ Fomba'ane fe be sitima, abui anen be né, abime ngul ôkôs wo jimbi be ô né, ve ba liti be *zen ba yiane ke a ôyôm ngap.

⁵ Avale te fe ôyem, ô ne ôyôme ébu'a, ve ô ne nguleya tametane na wo bo beta be mam. Fomba'ane fe ane ôyôme nduan ô wô'ô di'i beta afan.

⁶ Oyem ô ne fe nduan, si *abé. Oyem ô ne ébu'a jia ya nyôle jangan, ñwô wo ve ngume nyôle wongan ôse mvit a di'i ngum ényiñ wongan ôse. A ôbien, ô ne ndi'an a nduane ya étôtôlan.

⁷ Môt a bili nguleya tooé mevale me biôme mese ngbwak, betite ya fé, anon, betite ba woñ a kos.

⁸ V'ôyem, môt a se nguleya tooé wô ngbwak; ô ne *abé, a wo fô'ôsan éyoñ ése, njalan ne lut a nsul wo wôé.

⁹ Ñwô bia botane Nti a Tate, ñwô fe bia yo'é wô bôt be ne ntéan a éve'ela Zambe.

¹⁰ Anyu daa da nde bibotan a biyo'é bia so. A bobejañ, e nji yiane bo nalé.

¹¹ Ye anjeñe da da kuli évôvoé a ayôle mendim'

¹² A bobejañ, ye figié a ne wum ôlive nge ndi'i woone ke e wume fige? Anjeñe mendim me bili nku, e se ngule ya kuli bivôvoé mendim.

E fek ja so yôp

¹³ Za a ne fek a atyeñ e zañe jenan? A liti'i ndem e mbamba ntabane wé été, e mboone mame wé été a nsuane émiene si a fek.

¹⁴ Ve nge minleme mienan mi ne njalan a mbia éviele a nsisime mesengan, te boone mebun a viane ndeñele bebela e minsose mienan été

¹⁵ fe'éte é nji so e yôp; é ne nyô ya *si nyô, nyô betit, nyô Satan.

¹⁶ E ne été na, éviele a nsisime mesengan bia soo nzametane mam a *abé mevale mese.

¹⁷ Ve fe'e ja so yôp, ôsusua, é ne *mfuban, évôvoé, mvaé, ja late bôte ngbwa, ja ko éngôngo, ja wume mbamba bibuma, teke ôbangam nge bebadu'u.

¹⁸ Ebuma *zôsôô ja béban e *mvo'é été asu ba ba jeñe *mvo'é.