TOBI 9 - Kalate Zambe Nnomo a Mfefe Mfefé Nkôñelan

Rafaél baa Ragues

¹ Nde Tôbias a nga loone Rafaél a jô nye na:

² A mojañ Azarias, nyoñe bebo bisaé benyin a bekamel bebaé; kelek e Ragues, e be Gabaél a liti nye kalate mba'alane moné bi nga san a nyoñe moné ate; za'a fe émien abôk aluk.

^3-4 Wo yeme na Tate a lañe tañe melu é li'iya; a nge me bété alu da, jame te da ye ndeñele nye. Nalé fe wo te wô'ô nkobô Raguél na me bo te kôlô va, a me se ngule ya sôane nkômbane wé.

⁵ Ane Rafaél a nga ke e Ragues ya Médie a bebo bisaé benyin a bekamel bebaé, a ke bômbô e be Gabaél. Ane a nga ve nye kalate, a kañete nye foé ya alu'u Tôbias mone Tôbi, a kalane fe nye mbañete ya ke tabe abô'aluk. Gabaél a nga ji'a lañe minkuta mi moné mise mi bili besitam, a be nga ka'a mie e bekamel yôp.

⁶ Be nga kune kôlô si mametyé, a ke abô'aluk. Be nga ke nyine *nda Raguél a koone Tôbias a ja'a bidi ya mamengôé; ane a nga ji'a tebe tetele a Gabaél. Nde Gabaél a nga yôn a botane nye a jô na: Mfañe nya moné ya mfañe beta môt, *zôsôô a nkoone bôt éngôngol! Nti a va'a wo bibotane ya yôp, a wo, a nyô ngal, a ésaa nyia minga wôé! Ma ve Zambe akéva, amu me yeneya monyañe wom Tôbi émien.