TOBI 6 - Kalate Zambe Nnomo a Mfefe Mfefé Nkôñelan

Rafaél a lebe Tôbias na a lu'u Sara

¹ Ane mongô a nga kôlô a ke baa éngele; mvu jé é nga tôñe be. Be nga wulu *zen bebaane. Alu ôsu, be nga bômbô abôñ ôsôé Tigre.

² Tôbias a nga sis ôsôé na a ke sôbe mebo. Nde beta kos a nga yôô mendim été a kômbô zu mine nye abo. Mongô a nga yôn.

³ Engele a nga jô nye na: Bi kos éte a tuka'a je lat. Mongô ve bi kos a soo je e kindik.

⁴ Engele a nga jô nye na: Ku'i kos éte, va'a zôñ, *nlem a ések a naane bie; wu'a *miñya e fé; amu zôññ, *nlem a ések bi ne nya biañe.

⁵ Mongô a nga sale kose zañ, a nyoñe zôñ, *nlem a ések; ane a nga yañ abim éziñ a di; abim avok a nga kutane nku a naan.

⁶ Ane be nga ke dulu ôsu bebaane a kui bebé e Médie.

⁷ Nde mongô a nga sili Engele na: A monyañe wom Azarias, za biañ é ne bo *nlem, ések, a zôñe kos'

⁸ A nga yalane nye na: Nge mbia *nsisim a ndeñele fam nge minga, ane ô di'i *nlem a ése'e kos, ôtita ya été wo ye titane mbia *nsisim ate, wôna a ye bo te fe beta zu ndeñele be.

⁹ Mfa'a ya zôñ, nge môt a bili ônyañ, woko'o nye je mis; a nto ve vuñulu, wôna a ye bo *mvo'é.

Rafaél a lebe Tôbias na a lu'u Sara

¹⁰ Ane be nga nyine Médie a kui bebé Ekbatan,

¹¹ éyoñe te Rafaél a nga jô mone ndômane na: A mojañ Tôbias! A nga yalane na: A ntoo aya? Engele a nga jô nye na: Alu di, bia a ye ke bômbô e be Raguél, évuvumane jôé. A bili ngone minga é to jôé na Sara.

¹² Ane ô vaa Sara, a nji bi mona fam nge mona minga mfe; wo wo dañe nye bebé abialé; ajô te wo ô ne môt ôsu a yiane nye luk a nyoñe ngun ésaa. A ne mfefe'e mona minga, ôden, a fe angôndô ya abeñ; ésaa a ne nyamôtô.

¹³ A nga ke ôsu a jô na: Ô ne ngule ya lu'u nye. Tame vô'ôlô a mojañ, ngô'é nyô ébien, ma ye kobô ésaa a bia ye sili nye aluk a éyoñe bia ye so be Ragues bia ye bo abô? aluk. Ma yeme na Raguél a se ngule ya kamane wo nye, nge ve nye môte mfe; nge nalé momo, a yian awu, aval ane kalate Môze a jô, éyoñ a yemeya na wo wo yiane lu'u ngo jé. Nde ñhe, vô'ôlô'ô a mojañ, ngô'é nyô, bia ye kobô ajô mona minga ate a sili wo nye aluk. Abulane ya be Ragues, bia ye nyoñe Sara, a kee nye e *nda jôé.

¹⁴ Ane Tôbias a nga yalane Rafaél na: A monyañe wom Azarias, me nga wô'ô na Sara a keya aluk biyoñ zamgbwal a beyôm be mbe be wo'ok étune *nda aluk; a alu, ane be subu nye bebé, be ve wu. Bôte b'éziñ ba jô na mbia *nsisim nye a wôé be;

¹⁵ nde, ma ko woñ. Mfa'a wé émien, mbia *nsisim a nji bo nye jôm, ve nge môt a kômbô subu nye bebé, a wôé nye. Me ne atyi'i mone ésaa wom. Nge ma zu wu, Tate baa nane ba ye bi mbia ôlun a ma, akekui awu dap. A be nji bi mone mfe a ye jame be.

¹⁶ Rafaél a nga jô nye na: Ye ô vuaneya meleb m'ésoo, aval ane a nga tu'a yemete wo na wo ye lu'u minga ya ayoñe dôé? Nde, a mojañ, te tyelé nleme yôp amu ajô mbia nsisim; ve wo, lu'u Sara. Ma tu'a yeme na ngô'é nyô ébien, ba ye ve wo nye.

¹⁷ Ve éyoñ ô nyineya étune *nda aluk été, nyoñ éfus ése'e kos, a *nlem a beté bie e metye'e me nduane yôp. Enyum ja ye kui été, mbia *nsisim a ye je wôk, a ye tup, a ba ye bo te fe beta yene nye bebé vôme mona minga a né.

¹⁸ Eyoñe wo ye kômbô fulane nye, tata'a tebane tetele mia bebaane a ye'elan, sila'ane Nti ya yôp a ko mia éngôngol a ba'ale mia. Te ko woñ, é ne ntyian ataté nnôm éto na wo wo ye lu'u nye, a wo wo yiane nyii nye. A ye tôñe wo a ma yeme nya ñyemane na a ye ve wo abui *bon ba ye bo wo ane bobenyañ.

¹⁹ Eyoñ Tôbias a nga mane wô'ô nkobô Rafaél a yeme na Sara a mbe kale jé, ngone ya ayoñe dé, a *nda ésaa wé, a nga nye'e nye a nleme wé ô nga kabetane nye.