TOBI 5 - Kalate Zambe Nnomo a Mfefe Mfefé Nkôñelan

Tôbias baa Rafaél ba ke e Médie

¹ Nde Tôbias a nga yalan ésaa wé na: A Tat, ma ye bo aval ese wo jô ma.

² Ve jame da, ma ye bo aya na me ke nyoñe moné ate, Gabaél nye te yeme ma, me te yeme nye? Za ndeme me ne liti nye ndemben a ye buni ma a ve me moné ate? Adañedañ, me nji yeme zene ja ke e Médie!

³ Tôbi a nga yalane mone wé Tôbias na: Bia Gabaél bi nga mane sane kalate wua; me nga tyi'i kalate ate zañ bitune bibaé a môt ase a nga ba'ale étune jia; a me nga futi énjé e moné été. Eyoñe ji, a mone wom, jeñe môt ô too nye ndi, a ke liti wo; bia ye ya'ane nye éyoñe mia ye bulan. Kele ñhe nyoñe moné ate e be Gabaél.

⁴ Ane Tôbias a nga kui atan a ke jeñe môt ba nye be mbe ngule ya ke, a tuka'a yeme zene ya Médie. Mbé yôp, a nga tôbane Rafaél; ve a nji yeme na a mbe éngele Zambe.

⁵ A nga jô nye na: Wo so vé, a mvôé jam? Engele a nga jô nye na: Me ne mone Israélite, wua ya bobenyoñ; me nga zu jeñe bisaé e nlame wu. Tôbias a nga sili nye na: Ye wo yeme zene ja ke e Médie'

⁶ Engele a nga jô nye na: Ya, me kuiya wé abui biyoñ, a ma yeme mezene mese ya wé nlô. Me ju'uya ke e Médie, me tabe'e *nda monyañe wongan Gabaél, nyô a ne e Ragues ya Médie. Dulu ya *zen melu mebaé, wo téé Ekbatan a kui Ragues; minlame mite mibaé mi ne nlôñan e minkôle yôp.

⁷ Tôbias a nga jô nye na: Tame yange me va, a mvôé jam, me taté ke kat ésaa wom, amu ma kômbô na ô ke liti ma dulu; ma ye ve wo ma'ane môé.

⁸ Nyô mbok a nga jô nye na: Ya, ma yange wo va; ve te bo njiñelan.

⁹ Tôbias a nga bulane ke kat ésaa na: Tame yen, ma te tôbane môt, ane wua ya be bia, mone Israélite. Tôbi a nga jô nye na: Kele loone me nye, me tu'a yem ane mvô'ô za a ayoñ avé, a nge bi ne tabe ndi na a ne ke liti wo, a mone wom.

¹⁰ Tôbias a nga kui atan a ke loone nye a jô na: A mvôé jam, Tate a loone wo. Ane Engele a nga nyine *nda a Tôbi a nga taté batane nye. Nyô mbok a nga yalane na: Ma tame wo abui mvom. Tôbi nye na: Za mvome me ne beta bi? Me ne ndindim; me nji fe yen éfufup ya yôp; me kulu dibi été aval ane miñwuan mia ye bo te beta yen éfufup. Me ngenane me vee, ve ma nyiñ ane miñwuan; ma wô'ô metyiñe me bôt, ve me nji yene be. Engele a nga jô nye na: Bo'o ayo'o *nlem! Zambe a mbeme saé wo. Bo'o ayo'o *nlem! Tôbi a nga jô nye na: Mone wom Tôbias a kômbô ke e Médie; ye ô ne wulu nye a bo nye nlitizen? A mojañ, ma ye ya'ane wo. A nga yalane na: Ma kañese, me ne ngule ya ke liti nye; ma yeme mezene mese; me jaéya ke e Médie; me maneya tyi'ilane minje'ese a minkôle mise ya wé, a ma yem azezen ese.

¹¹ Tôbi a nga jô nye na: A mojañ, ô ne *nda bôte fé a ayoñ avé? Tame kate ma.

¹² Nyô mbok a nga jô nye na: Ayoñe dam da volô wo jé? Tôbi na: Ma kômbô fo'o tu'a yem a mojañ; ô ne mone za a ô ne jôé na za'

¹³ A nga yalane nye na: Me ne Azarias, mone Ananias, nya môtô wua ya bobenyañe bôé.

¹⁴ Tôbi a nga jô nye na: Zambe a bota'ane wo, a monyañe wom. Te wô'ô m'abé nge ma te kômbô yeme *nda bôte jôé. E yenéya na ô ne fo'o mojañ a wo so e nya *nda bôtô. Ma tu'a yem Ananias a Natan bebaane, bone be Sémélias. Bia be be bi mbe bi kelek e Yérusalem, a ke kañe Zambe e wé; be nji ve'ele yale feñ. Bobenyoñ be ne mbamba be bôt; wo so nya vômô. E boya *mvo'é.

¹⁵ A nga ke ôsu a jô nye na: Ma ve wo drakme wua *môs ôse; a mfa'a ya mba'alane *mvo'é, mia mone wom avale da.

¹⁶ Kele ñhe liti mone wom, a ma ye beté wo jôm éfe e ma'ane yôp.

¹⁷ Engele a nga jô nye na: Ma zu ke liti nye; te ko woñ éziñ. Mam mese ma ye mane wulu *mvo'é, meke a mebulane mangan, amu *zen é ne *mvo'é. Tôbi a nga jô nye na: Ebotan a wo, a mojañ! Nde a nga loone mon a jô nye na: A mone wom, kômesa'ane dulu a téé, mia monyoñ. Zambe ya yôp a ba'ale'e mia wé, a bula'an mia *mvo'é e be ma. Engele wé, a wulu'u wo a ba'ale'e wo, a mone wom! Ane Tôbias a nga kui atan a taté dulu; ane a nga wubane ésaa ba nyia. Tôbi a nga jô nye na: O wulu'u *mvo'é!

¹⁸ Ve nyia Anna a nga famé nyôn a jô Tôbi na: Amu jé wo te suu me mon a ke? Sa nye a ne bia ntumennômô a mongô ôkeminlôman'

¹⁹ Moné a nji yiane zu ba'a moné mfe e yôp; a nji yiane bo mfi a lôte mone wongan.

²⁰ Abim ényiñ Nti a nga ve bia da yian.

²¹ Ve a nga jô nye na: Te tyelé nleme yôp amu mone wongan; mam mese ma ye mane wulu *mvo'é mfa'a wé meke, nalé fe mebulane mé; a wo ye yene nye a mis e *môs a ye so *mvo'é.

²² Te tyelé nleme yôp a te ko woñ éziñ, a kale jam: mbamba éngele a ke liti nye; dulu dé da ye wulu *mvo'é a a ye bulane *mvo'é.

²³ Ane a nga jô'é nyôn.