TOBI 4 - Kalate Zambe Nnomo a Mfefe Mfefé Nkôñelan

Melebe Tôbi a ve monafame wé

¹ Môs ôte Tôbi a nga simesane moné a nga naane e be Gabaél, Ragues ya Médie

² ane a nga jô émiene na: Tame yen, me ja'aéya awu; ke ma yiane ji'a loone monafame wom Tôbias a kate nye ajô ya moné nyô nté me za wo'ok.

³ A nga lôme nloone e be mone wé Tôbias na a zu nye bebé; ane a nga jô nye na: Eyoñe ma ye wu, ô jame ma ane da yian. Sémé'é nyua. Te li'i nye ja'a ve môse wua ya ényiñe jé. Bo'o jôm ése *a nye'e. Te ve nye ôlun e *nlem a jam éziñ.

⁴ A mone wom, simesa'an abime mesis a nga bili éyoñ ô mbe nye abum. Eyoñ a ye wu, ô jame nye e fefele jam, bia nye soñe jia.

⁵ Nté ya melu môé, simesa'ane Nti; te kañese bo *abé nge tyame metiñe mé. Mimôse mise ya ényiñe jôé, bo'o mam me ne *zôsôô a te tôñe mezene ya ékotekot;

⁶ amu nge wo bo benya mejô, mam mese wo bo ma ye ke ôsu, aval ane ma bôte ba bo mame ya *zôsôô.

⁷ E biôme bise ô bili, va'a mimvolan ya *mvam e be ba bese ba bo zôsôô; a te jôban éyoñe wo bo de. Te solé *nzôzoé môt asu dôé, nalé Zambe a ye bo te solé asu dé e be wo.

⁸ Va'a mvolan abim ô bili, aval ane akume dôé e né. Nge ô bili tyôtyoé, te ko woñe ya ve mon abim ô bili:

⁹ wo tôkan akum abui e môse ya beta minjuk;

¹⁰ amu mvolan wo nyii mfa'a ya awu, a wo kamane mfa'a nsusane dibi ya awu été;

¹¹ amu mvolan ô ne mbamba mvean e mise me Nyô-a-dañe-bôte-bese-yôp.

¹² Tabe'e ntyele ya bo mbia élat, a mone wom; jam ôsu, nyoñe minga ya ayoñe beéso. Te lu'u minga biku, nyô a nji bo ayoñ éso; amu bi ne bone bekulu mejô ya *zôsôô. A mone wom, simesa'ane betate bangan Noé, Abraham, Izak a Yakob: ataté melu kôa, bese be nga lu'u bivuvumane biap; ajô te be nga bi ébotan e bone bap, a ayoñe dap da ye nyoñe *si nyô.

¹³ Nalé fe wo a mone wom, nyeke'e bobenyoñ; te bo bobenyoñe mebun, bendôman a bengone ya ayoñe dôé, a te bene lu'u minga ya e zañe jap; amu mebun ma dutu ôsame a mebua, nalé fe beta azoé a te ngômôtô; amu éles j'adutu zaé.

¹⁴ Te ba'ale ma'ane me mbo ésaé akekui mametyé; jika'a ya'ane nye a nge wo saé, Zambe nye fe a ye ya'ane wo jam ese wo bo. Mezene môé mese, liti'i bôte na ô ne mone ya mbamba nye'elan.

¹⁵ Te bo nyô mbok jam ô nji nye'e be bo'o wo. Te nyu woon akekui wo sok a te wulu ane nso'o bilam.

¹⁶ Va'a ba ba wô'ô zaé bidi, a ba be ne soé, va'a be mengômesane môé. Biôm ô bili abui, va'a bie minzôzoé; a te jôban éyoñ wo bo de.

¹⁷ Kele ve abui bidi vôme ba yône môte ya zôsôô; ve te bo nalé awu ya be mbia môt.

¹⁸ Sili'i fek e be mimfefek a te biasé mbamba *melep.

¹⁹ Jam ese da kui wo, va'a Zambe duma; sili'i nye na a telé mezene môé *zôsôô, a na a tôé mimvañ miôé. Amu fek é nji bo ve a ngum ayoñ; ve Nti émien nye a ve mvaé ése. Nkômbane wé, a bete yôp, nge suu si akekui vôme ya miñwuane mi né. Eyoñe ji, a mone wom, ba'ale'e minye'elane miam a te ve'ele tyame mie e nleme wôé été.

²⁰ Nde ma zu kate wo na me nga naane betalañ be argent awôm e be Gabaél, mone Gabri, e Ragues ya Médie.

²¹ Te ko woñ a mone wom nge bi nto minzôzoé; ô bili akum abui nge wo ko Zambe woñ, nge wo sa'ale aval *abé ese, a nge wo bo aval ane Nti Zambe wôé *a nye'e.