TOBI 3 - Kalate Zambe Nnomo a Mfefe Mfefé Nkôñelan

Meye'elan me Tôbi

¹ Nleme njalan a ôlun, me nga kuli mili'i mis a yi du, nde me nga taté meye'elan a abui ñyôn na:

² O ne *zôsôô, a Nti, a mimboone miôé mise mi ne *zôsôô. Mezene môé mese me ne *mvam a benya mejô; ô ne *ntyi'i mejô ya si ése.

³ Ajô te, a Nti, simesa'ane ma, fombô'ô a te ve ma meleb amu mam *abé mam, nge amu bivuse biam, nge bi betate bam be nga bo asu dôé.

⁴ Be nga bo te vô'ôlô mebendé môé, ajô te ô nga ve bôte na be sa bia a kee bia e minkôm a awu; bi nto *nkana a ébifianga, jôme *meyoñ mese ma kpwe'ele, e me ô nga mane tyamelane bia été.

⁵ Ya, mintyi'ane mejô miôé mi ne betotii, éyoñ wo bo ma aval ane mam *abé mam a ma bimvame biam me né; amu bi nga bo te ba'ale mebendé môé, nge wulu bebela été ôsu viôé.

⁶ Ajô te éyoñ ji, bo'o ma ane wo nye'e, bendé'é na mvebe ényiñe wom ô kôlô be ma, me kôtéban e *si nyô a beta bulan e metek. E ne mvaé na me wu, a lôte na ma nyiñ, amu me wô'ôya ane ba ta ma teke mekua; ma wô'ôtan beta ôlun e be mamien été; bendé'é na me kôtéban ôlune wuna été, jôké'é ma me ke étaba'a ya nnôm éto a te vaa asu dôé e be ma, a Nti. Ya, e ne mvaé na me wu, a dañe na ma tôbane abime nju'u di nté ényiñe jam ése a wô'abime meta di.

Mbo ésaé minga Sara a taa nye

⁷ Môse te ôbien, e tisone ya Médie, Sara, ngone Raguél ya Ekbatan, a nga wôk ane mbo ésaé wé a mbe minga a ta nye.

⁸ Amu na Sara a nga ke aluk biyoñ zamgbwal, a Asmôdé, mbia *nsisim, a nga zu wôé beyôm be Sara éyoñe te be ngenan te fulane nye aval ane da yian alu'u été. Mbo ésaé ate a nga jô nye na: Wo wo wôé benyo beyôm! Be veya wo fame zamgbwal, ô nji bi éyôlé môte wua wua ya été.

⁹ Wo ndeñele bia a jé na benyo beyôm ba mane wu? A nto ve tôñe be, ndemben bia ye bo te yen nge monafame wôé, nge monaminga wôé!

¹⁰ Môse te, ôlun e nleme ne lut, a nga bete yôp étune *nda ésaa, a kômbô'ô timbane nkol; ve a nga fas a jô na: Ke bôte ba ye kpwe'ele tate a jô na: O nga bili ve monaminga wua ô nga nye'e, éyoñe ji a timbaneya nkol amu minju'u mié. Ma ye suu nnôme tate e vôme ya miñwuan a ôlune *nlem. Ma ye bo te wôé mamien, ve ye'elane Nti a nyoñe ma, me za bili ékpwe'ele ngum ényiñe wom ôse.

Meye'elan me Sara

¹¹ Eyoñe te ébien, a nga same mo mfa'a ya vundi a bo meye'elane ma: Ebotan é bo'o be wo, a Zambe ya nkoon éngôngol! Ebotan é bo'o jôé dôé akekui nnôm éto! Bikôma'a biôé bi bota'ane wo akekui nnôm éto!

¹² Eyoñe ji, ma bete asu dam e be wo a ma kôñelane mise mam.

¹³ Bo'o na me kôlô e si nyô a te fe beta wu ékpwe'ele.

¹⁴ A Nti, wo yeme na me nga nyiñ *mfuban, a fam é ngenan te nambe ma.

¹⁵ Nge jôé dam, nge jôé ésaa wom, me nji ve me mvit e si minkôm me ne nyô. Me ne atyi'i ngone tate, a nji bi mone mfe a ye nyoñ éli'i jé; a ne te monyañ e fefele jé, a nji fe bi évuvuman éziñ nje éte ma yiane luk. Me jañeleya beyôme zamgbwal, ma ye beta nyiñ amu jé' Ve nge ô nji kômbô na me wu, a Nti, a nto ve kee alo dôé mfa'a ya ékpwe'ele jam.

Engele ba loone Rafaél a volô Tôbi baa Sara

¹⁶ Awolo te ebien, meye'elane me Sara me nga kui e fefele duma Zambe a Zambe a nga kañese me

¹⁷ a Rafaél a nga nyoñe nlômane ya zu saé be bebaane: a nga vaa Tôbi ônyañ ane a nga yen éfufube Zambe a mise mé; a nga ve Sara, ngone Raguél, a bo minga Tôbias mone Tôbi, vôm a nga vaa mbia nsisime Asmôdé e be nye. Amu njôan ô mbe na Tôbias nye a nga yiane nye luk, sa bôte befe bese. Awolo da da, Tôbi a nga kôlô nseñ a ke nyine *nda jé, a Sara ngone Raguél a nga sis, a so'o étune *nda yôp.