TOBI 2 - Kalate Zambe Nnomo a Mfefe Mfefé Nkôñelan

Tôbi a ku ndim

¹ Ajô te, e éjôé Asaradoñ, me nga bulane *nda jam e Ninive a be nga bulane ma minga wom Anna a mone wom Tôbias. Abô'ô Pantekôt dangan, nalé a ne na e mfufub abô'ô besondô, be nga bo ma beta dina. Me nga tabe tawôlô ndian

² a be nga zu ve ma abui mbamba bidi; nde me nga jô mone wom Tôbias na: A mone wom Tôbias, tame ke jeñe ma *nzôzoé éziñ ézezañe bobejañ be ne minkôm e Ninive, nyô a simesane Nti a *nlem ôse, a zu bia nye bi di. Ma ye yange akekui wo ye bulan.

³ Tôbias a nga ke a jeñe *nzôzoé e be bobejañ. Ve a nga bulan a jô na: «A Tate!» Me nga jô na: «Nde ñhe, a mone wom'» Nye na: «A Tate, ke ba te wôé môte ya ayoñe dangan, a wua mbim nseñ éwônga; ô ngenan ô jô'ô valé.»

⁴ Ane me nga valé si, teke tame nambe dina, a ke vaa môt, a ke bôé nye étune *nda, a yange jame nye mamengô'é.

⁵ Eyoñ me bulaneya e *nda, me nga wobane mendim a di bidi biam a ôlun e *nlem,

⁶ me simesa'ane ajô *nkulu mejô Amôs a nga kobô Bétél na: ma ye veñesane mebô'ô menan me bo meyeb, a bia bienan bi bo miñyôn. Ane me nga yôn.

⁷ Eyoñe jôb e nga dim, me nga ke fa'a soñ a jame nye.

⁸ Bôte be mbe ma bebé be nga woé ma be jô'ô na: A nto te fe ko woñ! Nga be nga kômbô wôé nye a avale mame di? Biyoñe ya ôsu a nga tup. Sa nye a beta jame bôte nyô!

⁹ Alu te, éyoñ me maneya woban, me nga kui atan a ke bômbô fefele mfine ya nseñ, asu e yoo ma amu ayôñ.

¹⁰ Me nji yeme na bemvokuma be mbe mfin été, e nlô wome yôp, ayôñe beko'o dab e nga toé ma e mis a bo me bifumulu meton été. Me nga ke e be mingengañ mi saé ma; ve abim ese be nga saé, ônyañ ve nenenen a me nga su'ulane ku ndim. Me nga tabe ndim mimbu minyin; a bobejañ be nga wô'ô ma éngôngol. Ve Ahikar a nga toñe ma mimbu mibaé azukui nkeane wé e Elimayis.

¹¹ Melu mete, minga wom Anna a nga yen ésaé ya vul a tiñe mimvote mintômba;

¹² a nga bo a kele'e suu bie e be bemasa bé, a be nga ya'ane nye tañe jé. E ngone distrôs é to melu zamgbwal, a nga sondô ésaé éziñ a ke ve bemasa bé, be nga ya'ane nye tañe jé ése a ve fe nye mone ékela ya di.

¹³ Eyoñ a nga kui *nda, ékela é nga tat. Me nga loone minga wom a sili nye na: Mon ékela nyô a so e vé? Ye ba te nye wup? Kele nye bulane e be bôte be ne nye! Bi nji yiane di jôme ya wup.

¹⁴ A nga jô na: A ne das ba te bo ma, ma'ane ya ésaé jame yôp! Ve me nga ke ôsu a bo te buni njôane wé a dañe yemete nye na a ke bulane nye e be bemiene bé. Amu nalé, me nga dañe wô'ôlun a nye. Nde a nga yalane ma na: Abui mveane mvame dôé e ne vé? A abui mbamba mimboon dôé? Bôte bese be yeneya ne ngeññ e jôme mam mete ma volô wo.