TOBI 14 - Kalate Zambe Nnomo a Mfefe Mfefé Nkôñelan

Awu Tôbi

¹ Susu'a mejô me Tôbi asu mvean akéva.

² Tôbi a nga wu éjijin été a to mimbu ntet awôme da a mibaé, a be nga jame nye a beta étôtok e Ninive. A mbe mimbu mewôm saman a mibaé éyoñ a nga ku ndim; éyoñ a nga beta yen, a nga too afo'été, a volô'ô minzôzoé, a ke ôsu a ve Zambe akéva, a kañete'e duma dé.

³ Eyoñ a nto bebé ya wu a nga loone Tôbias mone wé a ve nye minye'elane mi. A mone wom, kelee benyôbon,

⁴ jika'a kôlô e Médie, amu ma buni njôane Zambe a nga kobô anyu Nahum mfa'a Ninive; mam mete mese ma ye tôéban a zu ku Assur ba Ninive e yôp; mam mese bekulu mejô ya Israél Zambe a nga lôm be nga jô, ma ye boban. Teke ajô da ya mejô map da ye vaseban; mese ma ye boban biyoñe biap. E Médie, bôt ba ye tabe *mvo'é a dañ Asiri a Babilôn. Amu ma yem a buni na mam mese Zambe a nga jô ma ye tôéban a boban: ajô da ya minjôane mié da ye bo te ku e si. Bobejañ bese be to si ya Israél, ba ye mane lañe bese a ke be minkôm ôyap a mbamba si wop. Si ése ya Israél ja ye bo éwôwôlé; Samarie a Yérusalem teke môt. Ba ye di'i Nda Zambe a mane je sa ngum nté.

⁵ Ve Zambe a ye beta wô'ô be éngôngol a beta bulane be e si ya Israél. Ba ye beta lôñe Nda jé, ve sa avale ya atata'a, akekui e môse biyoñ bia ye kpwaan. Mvuse valé, bese ba ye bulane so minkôm a zu beta lôñe Yérusalem a to abeñ. Nda Zambe ja ye lôñeban aval ane bekulu mejô be nga jô.

⁶ Bese, aso *meyoñ mese ya si ése, ba ye kôñelan a ko nya Zambe woñ. Ba ye li'i bengunemelane ya minsos be nga jañele be a ba ye kañe Zambe ya nnôm éto a bo mam me ne *zôsôô e mise mé.

⁷ Melu mete, Zambe a ye nyii bone be Israél bese ba ye simesane nye, a ye tôkane be a bulane be e Yérusalem. A ye ve be si Abraham a ba ye tabe été *mvo'é nnôm éto. Ba bese ba tu'a nye'e Zambe ba ye vak; ve bebo *abé a mbia bivus bia ye jañe e *si nyô.

^8-9 Nde, a bone bam, vô'ôla'ane mebendé mam: tuka'a boone Zambe ésaé a bo'one mam a yene mvaé. Ye'ela'ane benyôbone na be bo *zôsôô a ésôs e be minzôzoé, be bo te vuane Zambe ve kañe jôé dé mfa'a ya jam ese, a benya mejôô a ngul. Mfa'a wôé, a mone wom, kôlô'ô Ninive a te tabe va. Eyoñe wo ye jame nyua e soñ e fefele jam, te beta bômbô alu da e si ya nlame wu. Amu me lô ékotekot é ne été abui, a bôt ba laa minsos teke fe wô'ôson.

¹⁰ A mone wom, tame yene jame Nadan a nga bo ésaa ntoñe wé Ahikar: a nga futi nye e soñ vevee. Ve Zambe a nga kôñelane mbia ôsone jam ate: Ahikar a nga beta bulan éfufub été a Nadan a nga nyin e dibi ya nnôm éto, amu a nga kômbô wôé Ahikar. Amu Ahikar a mbe ésôs e be minzôzoé, nde a nga dañe mbia ôlame ya awu Nadan a nga yaa nye; ve Nadan émien a nga bili ôlame wé a jañ.

¹¹ Nde ñhe a bone bam, mi lôô ane ésôs é ne mvaé, a aval avé awu da yange ba ba bo mbia be mam. Ve me lôô me nga zu wu. Ane be nga bôé nye si énoñe jé, nye ve wu. Ane be nga jame nye a beta abôk.

Amané ya ényiñe Tôbias

¹² Eyoñe nyia a wuya, Tôbias a nga jame nye soñ e fefele ésaa. A nga ke e Médie ba minga wé a *bon a ke tabe Ekbatan, e be ntyi wé Raguél

¹³ A nga toñe betyi akekui be nga yômbô. Awu dap, a nga jame be e Ekbatan ya Médie; ane a nga nyoñ élik akume Raguél ése, avale fe ane ji ésaa wé Tôbi.

¹⁴ A nga wu a nto mimbu ntet, awôme da a zamgbwal; bôte bese be semé'é nye.

¹⁵ Eyoñe te a ngenan te wu, a nga wô'ô foé ya njiane Ninive; a nga yene minkôme Beninivite be su'ane Médie, ba Siazar njô bôte ya Médie a nga ke be. A nga kañe Zambe amu mam mese a nga bo bôte ya Ninive a Assur. A nga vak amu jam e nga kui Ninive a a nga kañe Nti ya nnôm éto. Amen.