TOBI 13 - Kalate Zambe Nnomo a Mfefe Mfefé Nkôñelan

E jia Tôbi

¹ Tôbi a nga jô na:

² Ebotan a vevea Zambe nnôm éto! Ebotan a éjôé jé! Nye a ve *melep a nye fe *a jamé. A sili si akekui éto miñwuan, mfa'a bido'o ya si; a bete fe yôp a vaa mfa'a ya étôtôlan. Jôm éziñ é vo'o kôlô e mo mé.

³ A bone b'Israél, kañane nye, asu *meyoñ a maneya tyamelane mia été;

⁴ valé, a maneya liti mia anene dé! Wumula'ane nye e mise bevevee bese, amu a ne Nti wongan, Zambe wongan, Esaa wongan; a ne Zambe ya nnôm éto!

⁵ A ve mia *melep amu mam *abé menan, ve a ko mia bese éngôngo, a vaa mia e meyoñe mese a nga mane tyamelane mia été.

⁶ E môse mia ye beta bulane e be nye, a nleme wônan ôse a nsisime wônan ôse, a bo bebela e mise mé, wôna a ye bulane zu e be mia, a bo te fe solé mia asu dé.

⁷ Eyoñe ji, tame yenan abime mam a boya mia; wumula'ane nye tyiñe yôp. Va'ane Nti ya *zôsôô akéva a kañane Njô ya nnôm éto.

⁸ Mfa'a wom ma wumulu nye e si éto minkôme me né. Ma liti ngule jé a anene dé e be ayoñ e ne mbia be mam. A bebo *abé, bula'an! Bo'one *zôsôô asu dé; za *a yem! Ndô'ôtô amu mba nleme wé, a ye wô'ô mia éngôngo.

⁹ Ma ve Zambe wom duma a ma tyele si a mevak e be Njô ya yôp.

¹⁰ Bôte bese ya Yérusalem, be yôta'an anene dé a kañe nye. Yérusalem, mfufube tison, Zambe a ve wo melep amu mimboone mi bone bôé, ve a beta wô'ô bone be bôte be ne *zôsôô mintaé.

¹¹ Wumulu'u Nti ane da yian, a kañe Njô ya nnôm éto, ndembene Nda Endélé jé ja ye beta lôñeban e be wo a mevak.

¹² E be wo, a ve avak e be minkôm mise mi mekaban; e be wo, *a nye'e bingôngole bise akekui miaé mise.

¹³ Beta éfufub a ye faé akekui susu'a si. Abui *meyoñ da ye so ôyap a bôte ya meku'u mesi mese ba ye zu e be mfufub jôé wôé mo njalan a mimveane ya ve Njôô ya yôp. Miaé ya miaé mi bôt wo ye ve wo beta avak; a jôé ya Njô be nga tob da ye tabe akekui miaé mia zu.

¹⁴ Biyo'é a ba bese ba bo wo ayok! Biyo'é a ba bese ba tyam a kpwé mimfin miôé e si, ba bese ba ye sô'ôlô minkum menda miôé, a di'i menda môé! Ve ébotan nnôm éto a ba bese ba ye semé wo!

¹⁵ Va'ak, amu bone be bôte be ne *zôsôô, amu ba ye tôkan a kañe Nti ya nnôm éto. Ebotan a ba ba nye'e wo! Ebotan a ba ba ye vak amu *mvo'é jôé!

¹⁶ Ebotan a ba bese ba ye wô'ôlun amu minju'u miôé! Amu ba ye fôn e be wo a yen ava'a ya nnôm éto. Ya, ma kañe Nti, beta Njô Bôt,

¹⁷ amu ba ye beta lôñe Yérusalem; a *nda jé ja ye tebe e tison été nnôm éto. Ma ye vak nge *mebuka'a ya ayoñe dam ma ye yen étôto'o jôé a wumulu Njô ya Yôp. Mimbé ya Yérusalem mia ye lôñeban a safir a émerôd; mimfin mia ye boban a meko'o me ne édima. Minkume ya Yérusalem mia ye bo or a aleme ya yôb été e ne or a dañe *mfuban. Minjoñe ya Yérusalem mia ye boban a meko'o me ne émerôd a meko'o me orfir.

¹⁸ Mimbé ya Yérusalem mia ye yia bia ya beta mefôn; a menda mé mese ma ye yia na: Alléluia! ébotan é bo'o Zambe ya Israél! A ba be ne ntoban ba ye kañe mfufube jôé nnôm éto.