TOBI 11 - Kalate Zambe Nnomo a Mfefe Mfefé Nkôñelan

Tôbi a saéban

¹ Eyoñ be nga kui bebé Kaserin, asu Ninive, Rafaél a nga jô na:

² Wo yem aval avé bi nga li'i éso.

³ Ntaté'é ke minga wôé ôsu bi ke kôme *nda, nté a zu a bôte bevok.

⁴ Bebaane be nga ke ôsu. Rafaél a nga jô Tôbias na: O ba'ale'e zôñ bebé. Mvu é nga tôñe be mvus.

⁵ Anna a nga too, a fombô'ô e zene mon a mbe a yi'ane so.

⁶ A nga yene nye a za'ak, ane a nga jô ésaa wé na: Tame yene mone wôé ane a zu, a môte ba nye be nga ke;

⁷ be ngenan te kui ésaa bebé, Rafaél a nga jô Tôbias na: Ma yeme na mise mé ma ye kuiban.

⁸ Ô woko'o nye zôñe kos e mis: biañ éte ja ye vaa nye ônyañ a bibas e mis. Wôna ésoo a ye bo te fe beta bo ndim a a ye yen éfufup.

⁹ Anna a nga bumu si a ke wubane mon a jô nye na: A mone wom, nde wo ma beta yene nyô! Me nto ñhe ngule ya wu. A nga yi.

¹⁰ Tôbi a nga kôlô si, a kele a ndembe étam, a tulane *mbé ya nseñ.

¹¹ Tôbias a nga ke tôbane nye, a bili zôñe kos e mo; a nga vuñulu nye je e mis a jô nye na: O tabe'e ndi, a Tat! Ane a nga wo'o nye biañ e mis a bane je ôyôme nté.

¹² Wôna a mo mé mebaé, a nga kôé bibase meku'u me mis.

¹³ Nde Tôbi a nga wubane nye, a yônôk, a jô nye na: A mone wom, nde wo ma beta yene nyô, éfufube ya mise mam!

¹⁴ A nga jô na: Ebotan é bo'o e be Zambe! Ebotan a jôé dé é ne anen! Ebotan a mimfufub beéngele bé! Jôé dé é ne anen é tabe'e e be bia! Ebotan a be éngele bese nnôm éto! Amu Nti a nga yite ma a nkasa ve éyoñe ji me yeneya mone wom Tôbias.

¹⁵ Tôbias a nga nyine *nda été, a mevak, a kañe Zambe tyiñe yôp. A nga kañete ésaa ane dulu e nga wulu nye *mvo'é, ane a nga soo moné, a aval avé a nga lu'u Sara, ngone Raguél. Nye na: Tame yen, a nga zu, a nto bebé *mbé ya Ninive.

¹⁶ Tôbi, njalan a mevak, a va'a fe Zambe akéva, a nga ke tôbane mbom e *mbé Ninive. Eyoñe bôte ya Ninive be nga yene nye a lôtôk, a wulu'u *mvo'é, teke'e môt a liti'i nye *zen, be nga semé. Tôbi a nga kate be na Zambe a nga ko nye éngôngo a kui nye mis.

¹⁷ A nga subu Sara bebé, nga mone wé Tôbias, a botane nye a jô na: Ma tame wo mbamba nsoon a ngo jam! Ebotan a Zambe wôé, nyô a te soo wo e be bia! Ebotan a éso! Ebotan a mone wom Tôbias a ébotan a womien a ngo jam. A nto ve nyine *nda nyô, é ne énjôé a mevak a bibotan, a ngo jam

¹⁸ Môse te, Beyude bese ya Ninive be nga vak.

¹⁹ Ahikar ba Nadan, bone be monyañe Tôbi, be fe be nga zu va'a be e *nda jé.