TOBI 10 - Kalate Zambe Nnomo a Mfefe Mfefé Nkôñelan

Tôbi baa minga wé Anna be ne biyebe été

¹ Nté te ôse, Tôbi a lañe tañe melu a meso a meke zene ya Ragues. Melu mese me lôteya, ve mon a nji bulan.

² A nga jô *nlem été na: Ye be bu'uya nye ayap? Ndô'ôtô Gabael a wuya a teke môt a ne ve nye moné.

³ A ne a nga taté ko woñ.

⁴ Minga wé Anna a nga jô na: Mone wom a jañeya, a nji fe bo ngabe ya bôte be vee. A nga taté nyoñ a simesane mone wé a jô'ô na:

⁵ ngo'o ma, ngo'o mone wom! Me nga suu wo na ô ke, wo, éfufube ya mise mam!

⁶ Tôbi a nga yalane na: Tabe'évô, tabe'e ne séé, a kale jam, a ne mvo'é; jam éziñ ya atemetem e kuiya be wé; môte baa nye be né a ne môte ya tabe nye ndi, a ne monyañe wongan. Te tyelé nleme yôp, a kale jam, a ntoo bebé ya zu.

⁷ Ve a nga yalane nye na: Te beta me jô jôm éfe, ô jô'é fe me laane minsos: mone wom a wuya. Amôs ôse, a nga ji'a kôlô si a ke fombô e zene mon a nga ke, amu a nji fe tabe môt ndi. A éyoñe jôp e nga dim, a mbe a bula'ane *nda a ke yôn a yi nté alu teke ke ôyo.

Tôbias a kômbô bulan e be ésaa wé

⁸ Eyoñe sondô ébaé ya abôk alu'u Raguél a nga tyi'i na a bo ngo jé é nga lôt, Tôbias a nga zu jô nye na: Su'u ma me ke, amu ma yeme na tate a nane ba simesane na ba ye bo te fe beta yene ma. Ajô te ma ye'elane wo, a tat, su'u ma me ke a bulane e be ésaa wom; me kateya wo aval avé me nga li'i nye.

⁹ Ve Raguél a nga jô Tôbias na: A mone wom, ntabe'e va. Ma ye lôme bôt be ke kate éso Tôbi mimbañete ajô dôé. Tôbias a nga jô na: Momo, ma ye'elane wo; su'u fo'o ma me ke e be ésaa wom.

¹⁰ Eyoñe te ébien, Raguél a nga ve nye Sara minga wé, a ngabe baa ya akume dé ese: Bebo bisaé, binga a befam, benyak a mintômba, bijakas a bekamel, biyé, argent a abui biôm afe.

¹¹ A nga suu be be ke a mevak. A nga ya'ane Tôbias a bifia bi: Ma tame wo *mvo'é ya minsôn a mone wom, a mbamba dulu! Zambe ya yôp a liti mia *zen, mia nyô nga Sara. Me to ndi na ma ye yene benyôbon nté me ngenan te wu!

¹² A nga jô ngo jé Sara na: Kele e be nyôntyiafam. Ataté éyoñe ji, be nto bebiaé bôé aval ane ba be nga ve wo ényiñ. Kele *mvo'é, a mone wom, a ma yiane wô'ôtan ve mam me ne mvaé me so'o be wo, nté me ngenan me vee. Nde a nga ya'ane be a suu be be ke.

¹³ Mfa'a Edna, a nga jô Tôbias na: A mba mone wome ya nye'an, Nti a bula'ane wo. Nti a bo'o na me yene bone bôé mia ngojam nté me ngenan te wu. E mise me Nti, ma ve wo ô ba'ale ngone jam. Te ve nye ôlune *nlem môs éziñ ya ényiñe jé. A mone wom, kele *mvo'é. Ataté éyoñe ji, me nto nyua, a Sara a ne nyo kal. Ngo'o nge bia ye yen aval mvome da nté melu ôse ya ényiñe jangan. Eyoñe te a nga wubane be a suu be be ke *mvo'é.

¹⁴ Nde ñhe Tôbias a nga kôlô e be Raguél, njalan a mvom a mevak, a va'a akéva, amu Nti ya yôp a si, Njôô ya émo minlañ a nga botane dulu dé. Raguél a nga jô nye na: Nti a va'a wo ngule ya semé bebiaé bôé nté melu mese ya ényiñe jap.