TOBI 1 - Kalate Zambe Nnomo a Mfefe Mfefé Nkôñelan

¹ Kalate mimboone mi Tôbi, e mone Tobiél, e mone Ananiél, e mone Aduél, e mone Gabaél, mone Rafaél, e mone Raguél, e mvoñe bôte Ariél, *nda bôte Néftali.

² A nga too e sii Néftali, e Galilé ya akôé, e tisone Tisbé, e zañe Kadés akôé, Hasor e jôbe da dim a Fôgor e nké. E nne a nga kôlô valé a ke minkôm Asiri, éyoñe Salmanazar a mbe njô bôte ya si éte.

Tôbi a wulu ane metiñ me Zambe ma jô

³ Ma, Tôbi, me nga tôñe mezene ya benya mejôô a me nga bo mbamba mimboon melu mese ya ényiñe jam; akume dam, me nga ve de bobejañ e mimvolan a bôte ya ayoñe dam, mbe bia be be bi nga zu e minkôme Ninive, e si ya Asiri.

⁴ Eyoñe me mbe si jam, sii Israél, valé me ngenane ndôman, ayoñe mvamba Néftali ese e nga kandane *nda bôte David a Yérusalem, e tison é nga toban ézezañe *meyoñ mese ya Israél na é bo vôme ya mimvean, e vôme *nda Zambe é né, étaba'a Zambe, é nga teléban étyi a lôñeban asu miaé mi bôte mise mia zu.

⁵ Bobejañe bese a *nda bôte Néftali émvame jangan, be nga ve *bityi'a e minkôle mise ya Galilé, a kañe mone nyak Yérôbôam, Njô bôte ya Israél a nga télé e Dañ.

⁶ Ve ma, abui biyoñ, me nga ke étam e Yérusalem, éyoñe ya *mebôk, aval ane njôan ô né Israél ase e abendé ya nnôm éto été. Me nga ke mbil e Yérusalem a *bembômô, a mintôle mi biôm, a *ngab awômô ya biyem, a ntyi'ane mimvote mintômba y'ôsu

⁷ a me nga ve bie betuni, bone b'Aron, asu ata'a metuna'a. Me nga ve fe *ngab awômô ya fôn, nyô ya woon, nyô ya ôlive, nyô ya begrenade a befig, a bibuma bife, me nga ve bie bone be Lévi ba saé e Yérusalem; mbu ôse, me nga nyoñe moné ya *ngab awômô baa a ke belane je e Yérusalem.

⁸ Ngab awômô lale, me nga ve je bobenyui, minkuse mi binga a bikul ba be bone be Israél be too. Me nga so je a ve be je mimbu milale mise, a bi nga di je aval ane e ne ntilan e kalate metiñe me Môze, a miñye'elane mi Débôra, nyia ésaa wom Ananiél, amu ésaa wom a nga wu a li'i ma monenyui.

⁹ Eyoñe me boya nya môtô, me nga lu'u minga ya mvoñe bôte beésa bangan a to jôé na Anna; e be nye me nga biaé mon a yôlé nye jôé na Tôbias.

¹⁰ Mvuse nkeane minkôme ya Asiri, amu mamien me mbe nkôm, me nga zu e Ninive. Bobejañe bese a bôte ya ayoñe dam be mbe be ja'a bidi betebuni:

¹¹ ve me me nga tabe ntyele ya di bidi bite.

¹² Amu me nga simesane Zambe wom a e nleme wom ôse,

¹³ Nyô-A-Dañ-Ôyabe-Yôp, a nga bo na Salmanazar a yene mvaé a me nga kuse nye biôm bise a nga kômbô;

¹⁴ akekui awu dé, me mbe me kelek e Médie a kuse nye biôm. E Médie wé, e be Gabaél, monyañe Gabri, me nga li'i minkuta tañe betalañ be argent awôm.

¹⁵ Eyoñe Salmanazar a wuya, mone wé Senakérib a nga nyoñ éto éjôé jé; ane mezene ya Médie me nga ndaman amu mbia be bôt; ane me nga jô'é te fe beta wulu wé.

¹⁶ Melu me Salmanazar, me nga ve bobejañe ya ayoñ abui mimvolan ba be nga wô'ô zaé,

¹⁷ me nga ve be fembé jam, a ba be mbe soé, me nga jalé be mengômesan. Nge me nga yene mbime môte wua ya be bia ô jô'ô aka'a Ninive yat, me nga jame wô.

¹⁸ Ba bese Senakérib a nga wôé, me nga jame fe be. A ba bese Senakérib a nga wôé melu a nga mate a tub a so'o e Yudéa, éyoñe Njôô ya yôp a nga yaa nye amu a nga biasé nye, ma me nga jame be, amu abui ayaa dé, été a nga wôé abui bone be Israél, ve me nga solé mimbime miabe na me jame mie. Senakérib a nga bo na be jeñe mie, ve te ke mie yen.

¹⁹ Ane môt éziñe ya Ninive a nga ke kate Njô Bôte na ma me mbe me jame mie, nde me nga sobô; Ajô te, éyoñe me yemeya na Njô Bôt a yemeya mam me nga bo, a na ba kômbô me bi a wôé ma, me nga ko woñ a tup.

²⁰ Be nga mane wôlé biôm biam bise a ke bie e *nda akume Njô Bôt. Be li'i ma ve minga wom Anna a mone wom Tôbias.

²¹ Melu mewôm menyin me ngenan te kui, nde bone be njô bôt bebaé be nga wôé nye be tube fe a ke e minkôle ya Arara. Mone wé Asaradoñ a nga nyoñ éto njôane jé. Ane a nga télé Ahikar, ndômane mojañ Anaél mba'ale akum ese ya éjôé a évete ya *nda jé.

²² Nde Ahikar a nga ye'elan ajô dam a me nga beta ke e Ninive. Amu na melu ya éjôé Senakérib Njô ya Asiri, Ahikar a mbe beta mbi *élaé Njô Bôt, mba'ale sitame Njô Bôt, a to fe évete ya éjôé a akum; Asaradoñ a nga ba'ale nye e bito bite bise; adañedañe na, Ahikar a mbe mone mojañ, môte ya bivuvumane biam.